व्हॉट्सअॅपवर सर्वसामान्यांना मेसेजचे पैसे नाहीत; बिझनेस मेसेजच्या शुल्कात बदल
व्हॉट्सअॅपवर प्रत्येक मेसेजसाठी पैसे पडणार असल्याची चर्चा सुरू आहे. प्रत्यक्षात मेटाने बिझनेस एपीआयच्या बिलिंग नियमांत बदल केले आहेत आणि सामान्य युजर्ससाठी सेवा मोफतच राहणार आहे.
इंटरनेट आणि सोशल मीडियावर सध्या एक चर्चा वेगाने पसरत आहे. १ ऑक्टोबरपासून व्हॉट्सअॅपवर पाठवलेल्या प्रत्येक मेसेजसाठी पैसे द्यावे लागणार, असे त्यात म्हटले जात आहे. ही बातमी पूर्णपणे खोटी नाही, पण तिचा वेगळाच अर्थ काढला जात आहे. मेटा (Meta) कंपनीने व्हाट्सऐप बिझनेस एपीआयच्या (WhatsApp Business API) बिलिंग नियमांमध्ये काही बदल केले आहेत, एवढेच खरे आहे.
हा नवा बिलिंग नियम फक्त कॉर्पोरेट कंपन्या, बँका, ई-कॉमर्स प्लॅटफॉर्म आणि एंटरप्राईज लेव्हलच्या बिझनेस अकाऊंट्ससाठी लागू आहे. जे ग्राहकांना ऑटोमेटेड मेसेज, बँकिंग अलर्ट, डिलिव्हरी अपडेट किंवा ओटीपी पाठवतात, त्या कंपन्यांनाच नव्या नियमांनुसार शुल्क भरावे लागेल. हा सगळा पैसा थेट मेटा कंपनीकडे जमा होणार आहे.
मेटाने १ ऑक्टोबर २०२५ पासून २४ तासांच्या कन्व्हर्सेशन बेस्ड मॉडेलमध्ये बदल करून प्रति मेसेज पैसे आकारण्याची प्रक्रिया सुरू केली होती. आता १ ऑक्टोबर २०२६ पासून त्यात आणखी काही महत्त्वाचे बदल लागू झाले आहेत. पूर्वी ग्राहकाने मेसेज केल्यानंतर २४ तासांच्या विंडोमध्ये पाठवले जाणारे काही युटिलिटी मेसेज मोफत असायचे. आता त्यावरही शुल्क लागणार आहे.
लहान व्यवसायांना दिलासा देण्यासाठी प्रत्येक बिझनेस फोन नंबरला दरमहा १००० मोफत सर्व्हिस रिप्लाय दिले जातील. हा कोटा संपल्यानंतर अतिरिक्त मेसेजसाठी कंपन्यांना प्रति मेसेज पैसे द्यावे लागतील.
मित्र, कुटुंब किंवा नातेवाईकांना मेसेज करण्यासाठी किंवा चॅटिंगसाठी सर्वसामान्य लोकांना पैसे द्यावे लागतील का, असा प्रश्न अनेकांना पडला असेल. त्याचे उत्तर 'नाही' असे आहे. सामान्य युजर्ससाठी व्हाट्सऐप नेहमीप्रमाणे पूर्णपणे मोफत (Free) राहणार आहे. एखाद्या बिझनेस अकाऊंटशी चॅट केले तरी त्यासाठी तुम्हाला कोणतेही चार्जेस द्यावे लागणार नाहीत.
WhatsApp Business प्लॅटफॉर्मवरील मेसेजचे दर प्रकारानुसार वेगवेगळे आहेत. मार्केटिंग मेसेज म्हणजे प्रमोशनल ऑफर्स हे सर्वात महाग असतील. त्यासाठी कंपन्यांना प्रति मेसेज सुमारे ८६.३१ पैसे (जीएसटी वगळून) मोजावे लागतील.
युटिलिटी मेसेज म्हणजे ऑर्डर स्टेटस, डिलिव्हरी अपडेट आणि ओटीपी. यासाठीचा बेस रेट सुमारे ११.५ पैसे प्रति मेसेज (GST पूर्व) आहे. त्यावर १८ टक्के जीएसटी जोडल्यास हा खर्च प्रति मेसेज जवळपास १३.६ ते १४ पैसे या दरम्यान येतो.
थोडक्यात, हा संपूर्ण बदल फक्त व्यावसायिक वापरासाठी आहे. सामान्य नागरिकांच्या व्हाट्सऐप वापरात कोणताही बदल झालेला नाही.
