समृद्धी महामार्गावर शेतकऱ्यांचे आंदोलन; पोलिसांशी धक्काबुक्की, आमदार नितीन देशमुखांसह आंदोलक ताब्यात

अतिवृष्टी आणि पीक नुकसानीमुळे आर्थिक संकटात सापडलेल्या शेतकऱ्यांना हेक्टरी एक लाख रुपयांची मदत मिळावी, या मागणीसाठी शिवसेना ठाकरे गटाने समृद्धी महामार्गावर आंदोलन केले. आमदार तथा उपनेते नितीन देशमुख यांच्या नेतृत्वाखाली शुक्रवारी वाशीम जिल्ह्यातील वनोजा येथे हजारो शेतकरी आणि शिवसैनिक रस्त्यावर उतरले.

या आंदोलनाला पोलिसांनी परवानगी नाकारली होती. तरीही आंदोलकांनी महामार्ग रोखण्याचा प्रयत्न केला, आणि त्यावेळी पोलीस व आंदोलक यांच्यात जोरदार धक्काबुक्की झाली. परिस्थिती नियंत्रणात आणण्यासाठी पोलिसांना सौम्य लाठीमार करावा लागला. त्यानंतर पोलिसांनी आमदार नितीन देशमुख यांच्यासह अनेक आंदोलकांना ताब्यात घेतले.

शेतकऱ्यांना फक्त पाच हजार रुपयांची तात्पुरती मदत देण्याऐवजी अतिवृष्टी आणि पीक नुकसानीची योग्य भरपाई मिळावी, अशी आंदोलकांची मागणी आहे. त्यासाठी प्रत्येक शेतकऱ्याला हेक्टरी एक लाख रुपयांची आर्थिक मदत द्यावी, अशी भूमिका ठाकरे गटाने घेतली आहे. शेतकऱ्यांच्या जमिनी संपादित करून उभारलेला समृद्धी महामार्गच आता शेतकऱ्यांच्या न्याय्य हक्कांसाठी रोखला जात आहे, असे आमदार नितीन देशमुख यांनी स्पष्ट केले.

आंदोलनाला मोठा प्रतिसाद मिळावा, यासाठी आमदार देशमुख आणि शिवसेनेच्या पदाधिकाऱ्यांनी अकोला व वाशीम जिल्ह्यांत दौरे केले होते. या दौऱ्यांत त्यांनी शेतकऱ्यांना आंदोलनात सहभागी होण्याचे आवाहन केले होते. त्यानुसार शुक्रवारी सकाळपासूनच वनोजा येथे शेतकरी आणि शिवसैनिकांची मोठी गर्दी जमू लागली.

आंदोलनाच्या पार्श्वभूमीवर प्रशासनाने मोठा पोलीस बंदोबस्त तैनात केला होता. विभागातील वेगवेगळ्या जिल्ह्यांमधून दीड हजारांहून अधिक पोलीस अधिकारी आणि कर्मचारी आंदोलनस्थळी आले होते. एवढा बंदोबस्त असतानाही आंदोलकांनी समृद्धी महामार्गावर रास्ता रोको करण्याचा प्रयत्न केला, आणि त्यामुळे पोलीस व आंदोलक यांच्यात संघर्षाची परिस्थिती निर्माण झाली.

दोन्ही बाजूंमध्ये धक्काबुक्की झाल्यानंतर आंदोलकांना पांगवण्यासाठी पोलिसांनी सौम्य लाठीमार केला. या कारवाईनंतर आंदोलकांनी शासनाविरोधात संताप व्यक्त केला. दरम्यान, पोलिसांनी आमदार नितीन देशमुख यांच्यासह आंदोलनात सहभागी झालेल्या कार्यकर्त्यांना ताब्यात घेतले.

समृद्धी महामार्ग हा राज्यातील महत्त्वाचा द्रुतगती मार्ग आहे. तिथे रास्ता रोको केल्यास वाहतुकीला अडथळा येतो आणि प्रवाशांच्या सुरक्षिततेचा प्रश्नही निर्माण होऊ शकतो. याच कारणामुळे पोलिसांनी आंदोलनाला परवानगी नाकारली होती, तसेच आयोजकांना नोटिसाही बजावल्या होत्या. पोलिसांच्या मनाईनंतरही ठाकरे गटाने आपल्या भूमिकेवर ठाम राहत महामार्गावर आंदोलन केले. त्यामुळे वनोजा परिसरात काही काळ तणावाचे वातावरण होते.