वानाडोंगरीत महिलेचा खून उघड, करंट लागल्याचा बनाव; जालन्याच्या आरोपीला जळगावातून अटक

नागपूरच्या MIDC पोलीस स्टेशन हद्दीतील वानाडोंगरी भागात, मातोश्री लेआउटमध्ये एका महिलेचा मृत्यू झाला होता. तिचा मृत्यू करंट लागून झाला असावा, असा आधी अंदाज बांधला जात होता. मात्र शवविच्छेदनाच्या प्राथमिक अहवालात तिचा खून झाल्याचे उघड झाले आणि तपासाला वेगळे वळण मिळाले.

मृत महिलेचे नाव कविता गणेश पिंपळशेंडे (38) असे असून त्या मातोश्रीनगरमध्ये राहत होत्या. सोमवारी सकाळी सुमारे आठच्या सुमारास त्या घरात मृतावस्थेत आढळल्या. घराच्या स्वयंपाकघरात हीटरवर पाणी गरम होत होते. कविता यांच्या अंगावर करंट आणि चटके लागल्यासारखे व्रण होते, म्हणून करंटने मृत्यू झाल्याचा अंदाज बांधून पोलिसांनी अकस्मात मृत्यूची नोंद केली होती.

शवविच्छेदन करणाऱ्या डॉक्टरांनी मात्र कविता यांचा मृत्यू डोक्यावर जड वस्तूने प्रहार झाल्यामुळे झाल्याचे सांगितले. हीटरने चटके देऊन करंटने मृत्यू झाल्याचा बनाव रचल्याचेही यातून समोर आले. त्यानंतर पोलिसांनी खुनाच्या दिशेने तपास सुरू केला.

घटनेच्या वेळी कविता यांचे पती गणेश घरी नव्हते. ते सिक्युरिटी गार्ड म्हणून काम करतात आणि मूळगाव भंडारा येथे गेले होते. त्यांच्याकडे केलेल्या चौकशीत संशयास्पद काहीही आढळले नाही.

त्यामुळे नागपूर पोलिसांनी कविता यांच्या मोबाइलचा सीडीआर तपासला. त्यात सर्वाधिक कॉल जावेद याला केले गेल्याचे दिसले. घटनेच्या वेळी त्याचे लोकेशनही वानाडोंगरीत होते, तर सोमवारी संध्याकाळी त्याचे लोकेशन जळगावमध्ये मिळाले.

डीसीपी एस. ऋषिकेश रेड्डी यांच्या मार्गदर्शनाखाली इन्स्पेक्टर बाबूराव राऊत यांनी लगेच एक टीम जळगावला पाठवली. या टीमने जावेदला त्याच्या घरातून अटक केली. अटक झालेला आरोपी जावेद शेख शहीद मन्यार (33) हा जालन्यातील शिव कॉलनीचा रहिवासी असून व्यवसायाने इलेक्ट्रिशियन आहे. कविता यांचा मृत्यू करंटने झाल्याचे दाखवण्यासाठी त्याने हीटरने अंगावर चटके दिले आणि नंतर हीटरवर पाणी गरम करायला ठेवले, असे पोलिसांच्या तपासात समोर आले आहे.

गणेश यांनी कविता यांना फोन केला, पण प्रतिसाद मिळाला नाही. म्हणून त्यांनी नातेवाइकाला फोन करून मुलांना घरी सोडायला सांगितले. मुले घरी पोहोचली तेव्हा आई बेशुद्ध अवस्थेत दिसली आणि घटना उघडकीस आली. एपीआय गजानन कोठेवाड यांच्या फिर्यादीवरून पोलिसांनी खुनाचा गुन्हा दाखल केला आहे.

चौकशीत असेही कळले की कविता मेसमध्ये काम करत होत्या आणि गेली 15 वर्षे त्यांचे जावेदशी प्रेमसंबंध होते. पती घरी नसला की जावेद नागपूरला येत असे, पण अलीकडे तो कविता यांच्याकडे दुर्लक्ष करत होता. शनिवारी गणेश गावी गेले आणि रविवारी जावेद नागपूरला आला. कामात व्यस्त असेन असे सांगून कविता यांनी दोन्ही मुलांना नातेवाइकांकडे ठेवले होते. त्यांनी जावेदकडे लग्नाची मागणी केली, पण तो अंतर ठेवू इच्छित होता. यावरून दोघांत वाद झाला आणि सोमवारी सकाळीही पुन्हा वाद झाला. त्यात आरोपीने जड वस्तूने कविता यांच्या डोक्यावर वार केला आणि त्यांचा मृत्यू झाला, असे तपासात समोर आले आहे.

मंगळवारी पोलिसांनी जावेदला न्यायालयात हजर केले. न्यायालयाने त्याला 17 ऑक्टोबरपर्यंत पोलीस कोठडी सुनावली आहे. अवघ्या काही तासांत पोलिसांनी खुनाचा उलगडा करून आरोपीला अटक केली.