वाई पाथवे कामात दगडाचा दर अवाजवी? ढेकाणे यांची स्वतंत्र चौकशीची मागणी

वाई नगरपरिषदेच्या ब्राह्मणशाही घाट आणि आसपासच्या परिसरात सुमारे तीन कोटी रुपयांचे पाथवेचे काम करण्यात आले आहे. या कामात वापरलेल्या दगडाचे दर आणि बांधकामाचा दर्जा याबाबत विरोधी पक्षनेते विजय ढेकाणे यांनी प्रश्न उपस्थित केले आहेत. अंदाजपत्रकातील दर, प्रत्यक्षात वापरलेले साहित्य आणि झालेला खर्च यांची निष्पक्ष व सखोल चौकशी व्हावी, अशी मागणी त्यांनी केली आहे. जनतेच्या पैशांचा अपव्यय खपवून घेणार नाही, असा इशाराही त्यांनी दिला.

ढेकाणे यांच्या म्हणण्यानुसार, या कामासाठी वापरलेल्या दगडाचा बाजारभाव सुमारे २५० ते ३०० रुपये आहे. तरीही संबंधित कन्सल्टंटने अंदाजपत्रकात त्याचा दर ७५० रुपये दाखवला आहे. बाजारभाव आणि अंदाजपत्रकातील दर यांच्यात एवढी तफावत कशी आली, असा सवाल त्यांनी केला. दर ठरवताना कोणता आधार घेतला गेला, असेही त्यांनी विचारले आहे.

हा दगड कोल्हापूर येथून आणण्यात आला असून त्याची किंमत आणखी कमी असल्याचे ढेकाणे यांचे म्हणणे आहे. त्यामुळे प्रत्यक्षात वापरलेल्या दगडाचा प्रकार, गुणवत्ता, जाडी आणि बाजारमूल्य तपासावे आणि त्याची तुलना अंदाजपत्रकातील दराशी करावी, अशी मागणी त्यांनी केली.

कामाच्या दर्जाबाबतही त्यांनी आक्षेप घेतला आहे. या कामात आरएमसी म्हणजेच रेडी मिक्स काँक्रीट वापरण्याच्या सूचना होत्या, पण प्रत्यक्षात साधे मिश्रण वापरले गेल्याचा आरोप त्यांनी केला. मंजूर तांत्रिक निकषांप्रमाणे काम झाले आहे का, हे स्वतंत्र तज्ज्ञांकडून प्रत्यक्ष पाहणी करून तपासण्याची गरज असल्याचे त्यांनी सांगितले.

हे काम नगरपरिषदेच्या प्रशासकीय काळात झाले असल्याने प्रशासकीय मान्यता, कन्सल्टंटची नियुक्ती, अंदाजपत्रक, निविदा प्रक्रिया, मंजूर दर, वापरलेले साहित्य आणि दिलेली बिले यांची चौकशी करावी, असे ढेकाणे यांनी म्हटले आहे. केवळ कागदपत्रे तपासून थांबू नये, प्रत्यक्ष कामाचा दर्जाही तपासावा, असा त्यांचा आग्रह आहे.

"वाईकर जनतेच्या पैशातून हे काम झाले आहे. त्यामुळे प्रत्येक रुपयाचा हिशेब जनतेला मिळाला पाहिजे. अंदाजपत्रकातील दर आणि बाजारभावातील तफावतीची चौकशी झाली पाहिजे. कामाचा दर्जाही तपासला गेला पाहिजे. जनतेने आम्हाला मोठ्या मताधिक्याने निवडून दिले असून, त्यांचा विश्वास जपणे ही आमची जबाबदारी आहे. जनतेच्या पैशांची उधळपट्टी होत असेल, तर ती खपवून घेणार नाही. गरज पडल्यास जनतेच्या हितासाठी रस्त्यावर उतरून आंदोलन करू," असा इशारा ढेकाणे यांनी दिला.

या कामाच्या प्रशासकीय मान्यतेपासून अंतिम बिलापर्यंतची सर्व कागदपत्रे सार्वजनिक करावीत, तसेच दर आणि गुणवत्तेबाबत उपस्थित केलेल्या प्रश्नांचा उलगडा स्वतंत्र चौकशीतून करावा, अशी मागणीही त्यांनी केली आहे.