खोपटा पुलाचे काम अंतिम टप्प्यात, दिवाळीत वाहतुकीसाठी खुला होणार

उरण तालुक्याचा पूर्व आणि पश्चिम भाग जोडणाऱ्या जुन्या खोपटा पुलाच्या दुरुस्तीचे काम आता शेवटच्या टप्प्यात आले आहे. हा पूल दिवाळीत वाहतुकीसाठी खुला केला जाणार असल्याची माहिती सार्वजनिक बांधकाम विभागाकडून देण्यात आली आहे. गेल्या अनेक महिन्यांपासून पर्यायी मार्गांनी जावे लागणाऱ्या आणि वाहतूक कोंडीचा सामना करणाऱ्या उरणकरांना त्यामुळे मोठा दिलासा मिळणार आहे.

माजी मुख्यमंत्री बॅरिस्टर ए. आर. अंतुले यांच्या संकल्पनेतून सन १९९५ मध्ये हा पूल बांधण्यात आला होता. उरण तालुक्याच्या पूर्व आणि पश्चिम भागांना जोडणारा तो एक महत्त्वाचा दुवा आहे. मात्र गेल्या काही वर्षांत या मार्गावरून अवजड वाहनांची वाहतूक मोठ्या प्रमाणात वाढली आणि त्यामुळे पुलाच्या संरचनेवर ताण निर्माण झाला होता. पुलाची दुरवस्था लक्षात घेऊन त्याची संरचनात्मक तपासणी करण्यात आली. त्या तपासणीत पुलाच्या अंतर्गत भागात मोठ्या प्रमाणात तडे गेल्याचे आणि बेअरिंग्ज खराब झाल्याचे दिसून आले.

पुलाच्या बांधकामावेळी जुन्या पद्धतीची बेअरिंग्ज बसवण्यात आली होती. अशी बेअरिंग्ज आता बाजारात मिळत नसल्यामुळे ती नव्याने तयार करून घ्यावी लागली. पूल मजबूत करण्यासाठी तडे गेलेल्या भागांवर युव्ह कटिंग करून इपॉक्सी, ग्राउट इपॉक्सी, कार्बन लॅमिनेट आणि फायबर रॅपिंग अशा आधुनिक तंत्रज्ञानाचा वापर करण्यात आला आहे. पुलावरील चार सेंट्रल हिज बेअरिंग्ज आणि आतील रोलर रॉकर बेअरिंग्जही बदलण्यात आली आहेत. सुरक्षेच्या दृष्टीने पुलावर नवीन रेलिंगही बसवण्यात आल्या आहेत.

सध्या पुलावर नवीन लेअरिंगचे तसेच यूएचपीएफआरसी तंत्रज्ञानाशी संबंधित काम सुरू असून ते वेगाने पूर्ण केले जात आहे. हे अत्यंत मजबूत आणि टिकाऊ काँक्रिट संपूर्ण भारतात फक्त तीन ठिकाणी वापरले गेले आहे. मुंब्रा, पुणे आणि आता खोपटा पूल अशी ती तीन ठिकाणे आहेत. हे मलेशियन तंत्रज्ञान अत्यंत गुंतागुंतीचे आहे आणि त्यामध्ये फायबर व सिमेंटचे प्रमाण जास्त असते.

काँक्रिटीकरण पक्के करताना तापमानावर नियंत्रण ठेवावे लागते. त्यासाठी हे मिश्रण रात्रीच्या वेळी बर्फाच्या साहाय्याने भिजवून तयार करावे लागते. म्हणूनच हे काम रात्रीच्या वेळीच केले गेले आहे. आतापर्यंत एकूण २६८ मीटर लांबीचे काँक्रिटीकरण पूर्ण झाले आहे.

उरण सार्वजनिक बांधकाम विभागाचे उपअभियंता दामोदर पाटील यांनी सांगितले, "हे काम जवळपास पूर्ण झाले आहे. काँक्रिट सुकल्यानंतर दिवाळीत हा पूल सुरू करण्यात येणार आहे." म्हणजेच पूल सुरू होणे हे काँक्रिट सुकण्यावर अवलंबून आहे, असेही त्यांच्या या म्हणण्यातून दिसते.