FLNAT परीक्षा पुढे ढकलली; उल्लास नव भारत साक्षरता कार्यक्रमांतर्गत शिक्षण विभागाचे सर्व जिल्ह्यांना आदेश

उल्लास - नव भारत साक्षरता कार्यक्रमांतर्गत घेतली जाणारी प्रथम पायाभूत साक्षरता व संख्याज्ञान मूल्यमापन चाचणी, म्हणजेच एफएलएनएटी परीक्षा, पुढे ढकलण्यात आली आहे. ही परीक्षा सन २०२६-२७ या शैक्षणिक वर्षातील पहिली चाचणी असून ती २० सप्टेंबर २०२६ रोजी सकाळी १० ते सायंकाळी ५ या वेळेत ऑफलाइन पद्धतीने घेतली जाणार होती. मात्र काही अपरिहार्य प्रशासकीय कारणांमुळे शिक्षण संचालनालयाने ही परीक्षा स्थगित करण्याचा निर्णय घेतला.

शिक्षण संचालनालय (योजना) चे संचालक तथा राज्य साक्षरता अभियान प्राधिकरण, महाराष्ट्र राज्य, पुणे यांचे सदस्य सचिव कृष्णकुमार पाटील यांनी १६ सप्टेंबर रोजी याबाबत पत्र पाठवले. राज्यातील सर्व जिल्ह्यांच्या शिक्षणाधिकारी (योजना) यांच्यासह मुंबईच्या शिक्षणाधिकारी (योजना) यांनाही हे पत्र पाठवण्यात आले असून त्यात परीक्षा पुढे ढकलल्याची सूचना देण्यात आली आहे. एफएलएनएटी परीक्षेची सुधारित तारीख व वेळ अद्याप निश्चित झालेली नाही, त्यामुळे नवीन वेळापत्रक पुढे कधी जाहीर होईल हे पत्रातून स्पष्ट झालेले नाही.

परीक्षेच्या तयारीसाठी जिल्हास्तरावर परीक्षा केंद्र निश्चित करणे, परीक्षार्थींची नोंदणी व यादी तयार करणे, तसेच भौतिक व प्रशासकीय व्यवस्था उभारणे आणि संबंधित यंत्रणांशी समन्वय साधण्याचे काम आधीच सुरू झाले होते. परीक्षा पुढे ढकलल्यामुळे जिल्हास्तरावर सुरू असलेली ही सगळी पूर्वतयारी तात्पुरती थांबवण्याचे निर्देश शिक्षण संचालनालयाने दिले आहेत.

परीक्षार्थी, स्वयंसेवक, शिक्षक, मुख्याध्यापक, परीक्षा केंद्राशी संबंधित अधिकारी-कर्मचारी आणि इतर संबंधित घटकांना परीक्षा स्थगित झाल्याची माहिती द्यावी, असेही या पत्रात नमूद करण्यात आले आहे. परीक्षेसंदर्भात परीक्षार्थी व यंत्रणांमध्ये कोणताही गोंधळ किंवा संभ्रम निर्माण होणार नाही, याची दक्षता घेण्याच्या सूचना संबंधित सर्व शिक्षणाधिकाऱ्यांना देण्यात आल्या आहेत.

केंद्र सरकारच्या उल्लास - नव भारत साक्षरता कार्यक्रमांतर्गत (ULLAS - New India Literacy Programme) १५ वर्षे व त्याहून अधिक वयोगटातील असाक्षर नागरिकांसाठी ही पायाभूत साक्षरता व संख्याज्ञान मूल्यमापन चाचणी दरवर्षी घेतली जाते. राज्यातील निरक्षरतेचे प्रमाण कमी करून मूलभूत साक्षरतेचा प्रसार करणे हा या परीक्षेमागील मुख्य उद्देश आहे.

एफएलएनएटी परीक्षा एकूण १५० गुणांची असते. यामध्ये वाचन, लेखन आणि संख्याज्ञान म्हणजे गणित या तीन मूलभूत विषयांचा समावेश असतो. या उपक्रमातून केवळ अक्षर ओळख करून दिली जात नाही, तर त्यासोबतच डिजिटल साक्षरता, आर्थिक व्यवहारांचे ज्ञान, कायदेविषयक माहिती, आरोग्य तसेच आपत्ती व्यवस्थापनाचे धडेही असाक्षर नागरिकांना दिले जातात.