एसी, टीव्ही, फ्रिज महागणार; सणासुदीत यंदाची तिसरी दरवाढ 1 ऑक्टोबरपासून
सणासुदीचे दिवस तोंडावर आले असतानाच ग्राहकांना पुन्हा एकदा महागाईचा फटका बसणार आहे. एसी, एलईडी टीव्ही, वॉशिंग मशीनसारख्या इलेक्ट्रॉनिक वस्तूंच्या किमती 1 ऑक्टोबरपासून वाढण्याची शक्यता आहे. या वर्षातली ही सलग तिसरी दरवाढ असेल.
तांबे, ॲल्युमिनियम, स्टील, प्लास्टिक आणि कच्च्या तेलाशी संबंधित उत्पादनांच्या किमती वाढल्यामुळे, तसेच मालवाहतुकीचा खर्च आणि डॉलरच्या तुलनेत रुपयातील चढउतारामुळे ही दरवाढ करावी लागत असल्याचं कंपन्यांचं म्हणणं आहे. कच्च्या मालाच्या वाढत्या किमतींमुळे प्रमुख कंपन्या आपल्या उत्पादनांच्या किमती पाच ते आठ टक्क्यांनी वाढवण्याच्या तयारीत आहेत.
एसीच्या किमती साधारण पाच ते आठ टक्क्यांनी वाढू शकतात, तर वॉशिंग मशीन, फ्रिज आणि एलईडी टीव्हीच्या किमतीत काही कंपन्या तीन ते चार टक्क्यांनी वाढ करत आहेत. काही कंपन्या मात्र अजून परिस्थितीचा अंदाज घेत आहेत. दरवाढीमुळे मागणीवर परिणाम होईल अशी भीती काही कंपन्यांना आहे, तर काहींच्या मते डीलर आणि वितरकांकडे जुन्या दरातला माल आधीच असल्यामुळे परिणाम मर्यादित राहील. ब्लू स्टार, गोदरेज अप्लायन्सेस, हायर, डायकिन आणि सुपर प्लास्ट्रॉनिक्स या कंपन्यांनी वेगवेगळ्या वस्तूंवर दरवाढीची घोषणा आधीच केली आहे.
एलजी आणि हिताची या ब्रँडचे एसी विकणाऱ्या बॉश होम कम्फर्टनेही एसीच्या दरात सुमारे पाच टक्के वाढ केली आहे. पॅनासोनिक कंपनी सध्या दरवाढीबाबत आढावा घेत आहे. ब्लू स्टारचे व्यवस्थापकीय संचालक बी. थियागराजन यांनी सांगितलं की, वाढत्या कच्च्या मालाच्या किमतीमुळे एसी आणि डीप फ्रीझरचे दर आधीच पाच ते आठ टक्क्यांनी वाढवण्यात आले असून कंपनीने या वर्षी आतापर्यंत तीन वेळा दरवाढ केली आहे.
गोदरेज एंटरप्रायझेस ग्रुपचे व्यवसाय प्रमुख आणि कार्यकारी उपाध्यक्ष कमल नंदी यांच्या मते, आधीच्या दर आढाव्यापासून कच्च्या मालाच्या किमती आठ ते दहा टक्क्यांनी वाढल्या आहेत, त्यामुळे विविध वस्तूंवर पाच ते सात टक्के दरवाढ अटळ आहे. मात्र जुन्या दरात घेतलेला माल बाजारात आणखी एक ते दीड महिना मिळू शकतो, असंही त्यांनी सांगितलं.
डायकिन एअर कंडिशनिंग इंडियाचे अध्यक्ष आणि व्यवस्थापकीय संचालक कंवलजीत जावा यांनी सांगितलं की, कंपनीने 16 सप्टेंबरपासूनच किमतीत आठ ते दहा टक्के वाढ केली आहे. तांब्याच्या किमती सुमारे 25 ते 35 टक्क्यांनी वाढल्यामुळे आणि डॉलर मजबूत झाल्यामुळे कंपन्यांवरचा खर्चाचा ताण आणखी वाढला आहे, असं ते म्हणाले. सुपर प्लास्ट्रॉनिक्स प्रायव्हेट लिमिटेड ही कंपनी ऑक्टोबरनंतर टीव्हीच्या किमतीत सुमारे सात टक्के वाढ करण्याच्या विचारात असून, इतर घरगुती उपकरणांच्या किमती आधीच चार ते पाच टक्क्यांनी वाढवल्याचं कंपनीने सांगितलं.
नवरात्री आणि दिवाळीच्या काळात कंपन्या सवलती देत असल्यामुळे इलेक्ट्रॉनिक आणि घरगुती उपकरणांच्या विक्रीत नेहमी मोठी वाढ होते. त्यामुळे या दरवाढीचा सणासुदीतल्या मागणीवर परिणाम होईल, अशी चिंता उद्योगाला आहे. तरीही, ऑगस्ट-सप्टेंबरमध्ये डीलर आणि वितरकांनी जुन्या दरात पुरेसा साठा करून ठेवल्यामुळे काही वस्तू दिवाळीपर्यंत जुन्याच किमतीत मिळू शकतील, असं कंपन्यांचं म्हणणं आहे.
