दसरा-दिवाळी-छठसाठी मध्य रेल्वेच्या ४१८ जादा गाड्या, आरक्षण आजपासून

दसरा, दिवाळी आणि छठ पूजेच्या काळात प्रवाशांची होणारी गर्दी लक्षात घेऊन मध्य रेल्वेने ४१८ जादा गाड्या सोडण्याचा निर्णय घेतला आहे. मुंबई, पुणे, नागपूर आणि कोल्हापूर या शहरांहून उत्तर भारत, दक्षिण भारत आणि महाराष्ट्रातील वेगवेगळ्या शहरांसाठी या गाड्या ऑक्टोबर आणि नोव्हेंबर या महिन्यांत धावणार आहेत. या गाड्यांचे आरक्षण २७ आणि २८ सप्टेंबरपासून सुरू होणार असल्याचे मध्य रेल्वेकडून सांगण्यात आले.

मध्य रेल्वेने जाहीर केलेल्या वेळापत्रकानुसार सर्वाधिक फेऱ्या गोरखपूर मार्गावरील गाड्यांच्या असतील. छत्रपती शिवाजी महाराज टर्मिनस ते गोरखपूर दैनंदिन विशेष गाडी क्रमांक ०१०७९/०१०८० ही १६ ऑक्टोबरपासून १८ नोव्हेंबरपर्यंत एकूण ६४ फेऱ्या करेल. याच पद्धतीने हडपसर ते गोरखपूर दैनंदिन विशेष गाडी क्रमांक ०१४१५/०१४१६ देखील ६४ फेऱ्या करणार आहे.

दक्षिण भारतासाठी सीएसएमटी ते चेन्नई साप्ताहिक वातानुकूलित गाडी क्रमांक ०१०१५/०१०१६ ही १२ फेऱ्या करेल, तर सीएसएमटी ते बेंगळुरू साप्ताहिक वातानुकूलित गाडी क्रमांक ०१०१३/०१०१४ ही १४ फेऱ्या करणार आहे. एलटीटी ते तिरुवनंतपुरम नॉर्थ साप्ताहिक गाडी क्रमांक ०१४६३/०१४६४ कोकण मार्गे १२ फेऱ्या करेल, तर एलटीटी ते मडगाव साप्ताहिक गाडी क्रमांक ०११७९/०११८० १४ फेऱ्या करणार आहे. उत्तर भारतासाठी एलटीटी ते मऊ द्वि-साप्ताहिक गाडी क्रमांक ०११२३/०११२४ २४ फेऱ्या, एलटीटी ते बनारस द्वि-साप्ताहिक गाडी क्रमांक ०१०५१/०१०५२ २४ फेऱ्या आणि हडपसर ते गाझीपूर सिटी द्वि-साप्ताहिक गाडी क्रमांक ०१४३१/०१४३२ २४ फेऱ्या धावतील.

महाराष्ट्रातील प्रवाशांसाठी सीएसएमटी ते लातूर द्वि-साप्ताहिक गाडी क्रमांक ०११०५/०११०६ २६ फेऱ्या करेल, सीएसएमटी ते नागपूर साप्ताहिक सुपरफास्ट गाडी क्रमांक ०२१३९/०२१४० १२ फेऱ्या, सीएसएमटी ते कोल्हापूर साप्ताहिक गाडी क्रमांक ०१४१७/०१४१८ १२ फेऱ्या आणि पुणे ते नवीन अमरावती साप्ताहिक वातानुकूलित गाडी क्रमांक ०१४०३/०१४०४ १२ फेऱ्या करेल. नागपूर ते हडपसर दरम्यान द्वि-साप्ताहिक आणि साप्ताहिक अशा एकूण ४० फेऱ्या होतील, तर कोल्हापूर ते कलबुर्गी गाडी क्रमांक ०१४५१/०१४५२ आठवड्यातून ५ दिवस धावून ६४ फेऱ्या करेल. या सर्व गाड्यांचे आरक्षण २७ आणि २८ सप्टेंबरपासून पीआरएस केंद्र, रेल्वेच्या संकेतस्थळावर आणि रेलवन अॅपवर सुरू होईल.

मुंबईतून सुटणाऱ्या ६ जादा एकमार्गी गाड्यांचेही वेळापत्रक जाहीर झाले आहे. गाडी क्रमांक ०१११९ ही छत्रपती शिवाजी महाराज टर्मिनसहून रविवार, २७ सप्टेंबर रोजी सकाळी ११.३० वाजता सुटून दुसऱ्या दिवशी पहाटे ३ वाजता नागपूरला पोहोचेल. दुसरी नागपूर विशेष गाडी क्रमांक ०११०९ सोमवार, २८ सप्टेंबर रोजी मध्यरात्री १२.२५ वाजता सुटून त्याच दिवशी दुपारी ३.३२ वाजता नागपूरला पोहोचेल. या दोन्ही गाड्यांना दादर, ठाणे, कल्याण, नाशिक रोड, मनमाड, जळगाव, भुसावळ, मलकापूर, शेगाव, अकोला, मूर्तिजापूर, बडनेरा, धामणगाव आणि वर्धा येथे थांबे असतील.

अमरावतीसाठीची तिसरी गाडी क्रमांक ०११०७ रविवारी दुपारी ३.३० वाजता सीएसएमटीहून सुटून दुसऱ्या दिवशी पहाटे ५.२० वाजता अमरावतीला पोहोचेल, तिला बडनेरापर्यंत थांबे असतील. कोल्हापूरसाठीची चौथी गाडी क्रमांक ०१११ सोमवारी सकाळी ११.३० वाजता सीएसएमटीहून सुटून रात्री १०.४० वाजता कोल्हापूरला पोहोचेल, तिला दादर, ठाणे, कल्याण, लोणावळा, पुणे, जेजुरी, लोणंद, सातारा, कराड, सांगली, मिरज आणि हातकणंगले येथे थांबे असतील.

सोलापूरसाठीच्या पाचव्या आणि सहाव्या गाड्या म्हणजे गाडी क्रमांक ०१११५ आणि ०१११७ या लोकमान्य टिळक टर्मिनसहून रविवार आणि सोमवारी रात्री ९.३० वाजता सुटतील आणि दुसऱ्या दिवशी सकाळी ६.३० वाजता सोलापूरला पोहोचतील. या गाड्यांना ठाणे, पनवेल, लोणावळा, पुणे, दौंड आणि कुडूवाडी येथे थांबे असतील. सर्व गाड्यांमध्ये २ वातानुकूलित तृतीय श्रेणीचे डबे, १२ शयनयान डबे, ६ सामान्य द्वितीय श्रेणीचे डबे आणि २ गार्ड ब्रेक व्हॅन असणार आहेत. या गाड्यांचे आरक्षण पीआरएस केंद्र, रेल्वेचे संकेतस्थळ आणि रेलवन अॅपवर उपलब्ध असेल.