TVS ची नवी इलेक्ट्रिक स्कूटर 86 किमी रेंजसह, किंमत फक्त 50 हजारांपासून सुरू
TVS ने ऑर्बिटर व्ही1 ही परवडणारी इलेक्ट्रिक स्कूटर लाँच केली असून बॅटरी अॅज अ सर्व्हिस घेतल्यास किंमत अवघी 49,999 रुपये आहे.
पेट्रोलचे भाव सतत वाढत असल्यामुळे आणि रोजच्या ट्रॅफिकच्या त्रासामुळे लोक आता स्वस्त, हलक्या आणि चांगली रेंज देणाऱ्या दुचाकीच्या शोधात असतात. रस्त्यातच बॅटरी संपून गाडी बंद पडेल या भीतीपोटी अनेक जण इलेक्ट्रिक स्कूटर घ्यायला घाबरतात. याच चिंतेवर उपाय म्हणून TVS कंपनीने आता टीव्हीएस ऑर्बिटर व्ही1 (TVS Orbiter V1) नावाची नवी इलेक्ट्रिक स्कूटर बाजारात आणली आहे, जी किफायतशीर आणि भरपूर रेंज देणारी आहे.
या स्कूटरमध्ये 1.8 किलोवाट पीक पॉवरची BLDC हब मोटर बसवली असून ती 30Nm इतका पीक टॉर्क तयार करते. कंपनीच्या दाव्यानुसार या स्कूटरचा टॉप स्पीड 68 किमी प्रतितास इतका आहे आणि ती अवघ्या 6.8 सेकंदात 0 ते 60 किमी प्रतितास इतका वेग गाठू शकते. यात दोन रायडिंग मोड्स आणि ऑटोमॅटिक ट्रान्समिशनचा पर्याय दिला आहे. एकदा फुल चार्ज केल्यावर ही स्कूटर तब्बल 86 किमीपर्यंत धावू शकते, असा कंपनीचा दावा आहे.
फीचर्सच्या बाबतीत बोलायचं झालं तर या स्कूटरला डिजिटल LCD क्लस्टर डिस्प्ले दिला आहे. कनेक्टिविटीसाठी TVS कनेक्ट अॅप आणि ब्लूटूथ सपोर्ट मिळतो. यात टर्न-बाय-टर्न नॅव्हिगेशन, कॉल अलर्ट, SMS अलर्ट, व्हेईकल हेल्थ अलर्ट, लाईव्ह लोकेशन आणि जिओ फेन्सिंग यासारख्या सुविधा असून ओव्हर-द-एयर म्हणजे OTA अपडेट्सही थेट मिळतात. रोजच्या वापरासाठी USB चार्जिंग पोर्ट, डिस्टन्स-टू-एम्प्टी इंडिकेटर, लो-बॅटरी इंडिकेटर, की शटर लॉक आणि सामान अडकवण्यासाठी कॅरी हुक असे फीचर्सही दिले आहेत.
ही स्कूटर हलक्या पण मजबूत अशा अर्बन एगाईल चेसिसवर बनवली आहे. पुढच्या बाजूला टेलिस्कोपिक सस्पेंशन तर मागच्या बाजूला ड्युअल शॉक अॅब्जॉर्बर दिले आहेत. सेफ्टीसाठी पुढे आणि मागे दोन्हीकडे ड्रम ब्रेकसह कंबाइंड ब्रेकिंग सिस्टीम म्हणजे CBS मिळते. यात अलॉय व्हील्स असून पुढच्या टायरचा साईझ 90/80-14 इंच आणि मागच्या टायरचा साईझ 90/90-12 इंच आहे.
या स्कूटरमध्ये 1.8kWh ची बॅटरी दिली असून कंपनीने यासाठी बॅटरी अॅज अ सर्व्हिस म्हणजे BaaS हा प्रोग्राम सुरू केला आहे. यात बॅटरीचे भाडे वेगळं भरावं लागतं. हा BaaS प्रोग्राम निवडल्यास स्कूटरची सुरुवातीची एक्स-शोरूम किंमत फक्त 49,999 रुपये इतकी येते. मात्र, बॅटरीसह संपूर्ण स्कूटर स्टँडर्ड व्हर्जनमध्ये घ्यायची असल्यास त्याची एक्स-शोरूम किंमत 84,500 रुपयांपासून 1,00,650 रुपयांपर्यंत आहे.
