ट्रूकॉलरवर आता दिसणार लिंक्डइनचे जॉब टायटल आणि कंपनीचे नाव, कंपन्यांची पार्टनरशिप

कॉलर आयडी सर्विस देणाऱ्या ट्रूकॉलरने लिंक्डइनसोबत पार्टनरशिप केल्याची घोषणा केली आहे. या पार्टनरशिपमुळे यूजर्सना त्यांच्या कॉलिंग कार्डवर आता प्रोफेशनल डिटेल्स शेअर करता येणार आहेत. हे फीचर पूर्णपणे ऑप्शनल असणार आहे, म्हणजे कोणावरही ते वापरण्याची सक्ती नसणार.

या फीचरमुळे लिंक्डइन यूजर्सना कॉलर आयडी सर्विसवर आपले लिंक्डइन-व्हेरिफाईड डिटेल्स दाखवण्याची सोय मिळणार आहे. खोटे प्रोफाईल्स आणि बनावट अकाऊंट्सना आळा घालण्यासाठी दोन्ही कंपन्यांनी हा निर्णय घेतला असून, यामुळे ट्रूकॉलर प्लॅटफॉर्म यूजर्ससाठी आणखी विश्वसनीय ठरेल असे सांगण्यात आले आहे.

ट्रूकॉलरने प्रोफेशनल सोशल मीडिया नेटवर्क लिंक्डइनसोबत केलेल्या या इंटीग्रेशनमुळे लिंक्डइन यूजर्सना ट्रूकॉलरच्या कॉलिंग कार्डवर आपली प्रोफेशनल माहिती शेअर करता येणार आहे. या फीचरमुळे ट्रूकॉलर यूजर्सना लिंक्डइनवरील आपले नाव आणि प्रोफाईल पिक्चर दाखवण्याची परवानगी मिळते.

लिंक्डइनवरील जुने आणि नवीन असे दोन्ही यूजर्स, व्हेरिफाईड ऑन लिंक्डइन या सुविधेचा वापर करून थेट आपल्या ट्रूकॉलर प्रोफाईलवर वर्कप्लेस, ऑर्गनाइजेशन आणि जॉब टायटल जोडू शकणार आहेत. एकदा ही माहिती जोडली आणि डिस्प्ले करण्याचा पर्याय निवडला की, ती डिटेल्स यूजरला कॉल करणाऱ्या कोणत्याही व्यक्तीला दिसणार आहे. त्यानंतर कॉल करणारी व्यक्ती कॉलरच्या लिंक्डइन प्रोफाईलवर टॅप करून त्याच्या प्रोफेशनल बॅकग्राऊंडबद्दल माहिती मिळवू शकते.

लिंक्डइनसोबतचे हे एकत्रीकरण फक्त आधीपासून असलेल्या यूजर्सपुरते मर्यादित नाही. नव्या ट्रूकॉलर यूजर्सनाही आता लॉगिन विथ लिंक्डइन हा पर्याय वापरता येणार आहे. या प्रक्रियेत लिंक्डइनवरील नाव आणि प्रोफाईल फोटोसारखी माहिती ट्रूकॉलर प्रोफाईलमध्ये शेअर केली जाऊ शकते. तसेच आधीपासूनचे यूजर्सही आपले लिंक्डइन अकाउंट ट्रूकॉलरशी जोडून आपली व्यावसायिक ओळख दाखवू शकतात.

ट्रूकॉलरने स्पष्ट केले आहे की लिंक्डइन प्रोफाईल कनेक्ट करणे आणि आपल्या प्रोफेशनबद्दल माहिती देणे बंधनकारक नाही. आपले वर्कप्लेस आणि जॉब टायटल कॉलर आयडीवर दाखवायचे की नाही, हे यूजर्स स्वतः ठरवू शकतात. याशिवाय, यूजर्सना कधीही आपले लिंक्डइन अकाउंट ट्रूकॉलरवरून डिस्कनेक्ट करण्याचा पर्यायही दिला जाणार आहे.

ट्रूकॉलर आणि लिंक्डइनचे हे एकत्रीकरण सध्या जगभरातील अँड्रॉईड यूजर्ससाठी उपलब्ध करून दिले जात आहे. आयफोन यूजर्ससाठी ही सुविधा काही काळाने आणली जाणार आहे. म्हणजेच सध्या फक्त अँड्रॉईडवर ट्रूकॉलर वापरणाऱ्या यूजर्सनाच लिंक्डइन व्हेरिफाईड प्रोफेशनल ओळख आपल्या कॉलर आयडीसोबत जोडण्याचा पर्याय मिळणार आहे.