ट्रम्प यांचा IMEC कॉरिडॉरला पाठिंबा, इराणला वगळण्याचे संकेत; झेलेन्स्कींशीही युद्धावर चर्चा

जागतिक राजकारणात सध्या वेगाने घडामोडी घडत आहेत. मध्यपूर्वेतील वाढत्या तणावाच्या पार्श्वभूमीवर अमेरिकेचे अध्यक्ष डोनाल्ड ट्रम्प यांनी एक मोठा धोरणात्मक निर्णय जाहीर केला आहे. मध्यपूर्वेतील ऊर्जेच्या पायाभूत सुविधा आणि तेल वाहतुकीचे मार्ग इराणी तपासणी नाक्यांपासून दूर हलवण्याची गरज असल्याचे सांगत त्यांनी भारत-मध्य पूर्व-युरोप आर्थिक कॉरिडॉर, म्हणजे IMEC या प्रकल्पाला आपल्या प्रशासनाचा पूर्ण पाठिंबा असल्याचे जाहीर केले. यामुळे मध्यपूर्वेतील व्यापारी मार्गांचे भविष्य आणि भारताच्या सहभागाला नवे बळ मिळाले आहे.

ट्रम्प यांच्या मते, शेजारील देशांच्या व्यापारी जहाजांवर इराणकडून होणारे सततचे दहशतवादी आणि सागरी हल्ले जागतिक ऊर्जा सुरक्षेसाठी मोठे आव्हान बनले आहेत. त्यामुळे तेल आणि व्यापारी वस्तूंची वाहतूक सुरक्षित करण्यासाठी इराणी हस्तक्षेपापासून मुक्त पर्यायी मार्ग शोधणे गरजेचे बनले आहे. IMEC हा प्रकल्प जागतिक व्यापारासाठी नवा आणि सुरक्षित ऊर्जा मार्ग ठरू शकतो, असे ट्रम्प यांनी सांगितले. पाइपलाइनने असो किंवा नव्या सागरी आणि रेल्वे मार्गाने, या प्रकल्पाला अमेरिका पूर्ण ताकदीने साथ देईल, असे त्यांनी ठामपणे सांगितले. यामुळे मध्यपूर्वेला अनेक दशकांपासून त्रास देणाऱ्या सुरक्षा समस्यांवर कायमचा तोडगा निघू शकेल, असा विश्वास त्यांनी व्यक्त केला.

याच दरम्यान मंगळवारी अमेरिकेचे अध्यक्ष डोनाल्ड ट्रम्प आणि युक्रेनचे राष्ट्राध्यक्ष वोलोडिमिर झेलेन्स्की यांची उच्चस्तरीय भेट झाली. या भेटीत बऱ्याच काळापासून सुरू असलेल्या रशिया-युक्रेन युद्धावर सखोल चर्चा झाली. भेटीनंतर बोलताना ट्रम्प म्हणाले, "आमचे संबंध खूप चांगले आहेत. युक्रेनचे राष्ट्राध्यक्ष झेलेन्स्की आणि मी या युद्धावर लवकरात लवकर तोडगा काढण्याचा प्रयत्न करत आहोत आणि मला पूर्ण विश्वास आहे की यातून सकारात्मक मार्ग नक्की निघेल."

युद्धाच्या भीषणतेबद्दल बोलताना ट्रम्प यांनी सांगितले की, रशियाचे राष्ट्राध्यक्ष व्लादिमीर पुतिन आणि युक्रेनचे राष्ट्राध्यक्ष झेलेन्स्की या दोघांनाही आता हे युद्ध संपवायचे आहे. या युद्धात हजारो लोकांचा नाहक बळी गेला आहे आणि ही हिंसा कोणालाच नको आहे, त्यामुळे युद्ध थांबवण्याची योग्य वेळ आली आहे असे ते म्हणाले. दुसरीकडे झेलेन्स्की यांनी वैयक्तिक आणि द्विपक्षीय पाठिंब्याबद्दल ट्रम्प यांचे आभार मानले. येत्या हिवाळ्यापूर्वी किंवा हिवाळा सुरू होताच हे युद्ध संपवण्यासाठी अमेरिकेची मदत निर्णायक ठरेल, अशी आशा झेलेन्स्की यांनी व्यक्त केली.

जागतिक सुरक्षा आणि आर्थिक आघाड्यांवर बोलताना ट्रम्प यांनी 'शील्ड ऑफ द अमेरिकाज' या युतीचा उल्लेख केला. या युतीच्या दुसऱ्या बैठकीला उपस्थित राहून त्यांनी आनंद व्यक्त केला आणि पश्चिम गोलार्धातील ही आतापर्यंतची सर्वात मोठी आणि शक्तिशाली आर्थिक व राष्ट्रीय सुरक्षा युती असल्याचे सांगितले. त्याचबरोबर स्टीव्ह विटकॉफ आणि जेरेड कुशनर यांनी इराण करारासंबंधी मध्यस्थांची भेट घेतली असून अनेक मुद्द्यांवर सकारात्मक चर्चा पुढे सरकत असल्याचे ट्रम्प म्हणाले.

चीनचे राष्ट्राध्यक्ष शी जिनपिंग यांच्या आगामी तीन दिवसांच्या राज्य दौऱ्याबाबत बोलताना ट्रम्प यांनी दोन्ही देशांतील संबंध चांगले असल्याचे सांगितले. "त्यांना चीन आवडतो, मला अमेरिका आवडते. दोन मोठ्या राष्ट्रांमध्ये एक चांगली बैठक होणार आहे," असे म्हणत त्यांनी पुढील जागतिक समीकरणांची दिशा स्पष्ट केली. मध्यपूर्वेतील ऊर्जा सुरक्षेपासून युरोपमधील शांततेपर्यंत, अमेरिकेची ही नवी भूमिका जागतिक पातळीवर मोठे बदल घडवून आणणारी ठरेल यात शंका नाही.