ठाण्यात 17 वर्षांच्या विद्यार्थ्याचा खून, दोन वर्गमित्र ताब्यात; तीन आठवड्यांनी गुन्ह्याचा उलगडा

ठाणे शहरातील कासारवडवली पोलीस ठाण्याच्या हद्दीतून बेपत्ता झालेल्या एका 17 वर्षांच्या विद्यार्थ्याच्या खुनाचा छडा पोलिसांनी तब्बल तीन आठवड्यांनी लावला आहे. या प्रकरणात मृत मुलाच्याच दोन वर्गमित्रांना ताब्यात घेण्यात आले आहे. दोघेही अल्पवयीन आहेत. सोन्याची साखळी लुटण्यासाठी हा कट रचला गेल्याचे तपासात पुढे आले आहे.

हा विद्यार्थी 24 सप्टेंबर रोजी मित्रांना भेटायला जातो असे सांगून घरातून बाहेर पडला होता. तो घरी परतलाच नाही. खूप शोध घेऊनही तो सापडला नाही, तेव्हा त्याच्या वडिलांनी कासारवडवली पोलीस ठाण्यात अपहरणाची तक्रार दिली.

तपासात असे पुढे आले की, आरोपींपैकी एकाला नवी बाईक घ्यायची होती, तर दुसऱ्याला आपला वाढदिवस जोरात साजरा करायचा होता. त्यासाठी दोघांना पैसे हवे होते. त्या मुलाच्या गळ्यातली सोन्याची साखळी पाहून त्यांच्या मनात लालच निर्माण झाली, असे तपासात समोर आले आहे. त्यानंतर दोघांनी खुनाचा प्लॅन आखला, असा आरोप आहे.

सिगारेट ओढायची आहे असे कारण सांगून आरोपी त्याला ब्रह्मांड परिसरातील एका निर्जन झाडाझुडपात घेऊन गेले, असे तपासात पुढे आले. तिथे त्याच्यावर चाकूने वार करण्यात आले आणि दगडाने ठेचून त्याला मारण्यात आले. पुरावा नष्ट करण्यासाठी नंतर मृतदेहावर पेट्रोल टाकून तो जाळण्यात आला, असेही तपासात समोर आले आहे.

पोलिसांची दिशाभूल करण्यासाठी आरोपींनी 'दृश्यम' चित्रपटाचा आधार घेतल्याचे सांगण्यात आले. मृत मुलाचा मोबाईल फोन त्यांनी चालत्या बसमध्ये टाकून दिला. त्यामुळे फोनचे लोकेशन सतत बदलत राहील आणि पोलिसांचा गैरसमज होईल, असा त्यांचा हेतू होता.

यातील एक आरोपी तपासादरम्यान पोलिसांसमोर वारंवार येत होता. आपला मित्र हरवल्याचे दुःख त्याने दाखवले. तो मुलगा एका अनोळखी माणसासोबत दुचाकीवरून गेला, अशी खोटी माहिती त्याने पोलिसांना दिली, असे सांगण्यात आले.

पोलिसांनी परिसरातील सुमारे 80 ते 90 सीसीटीव्ही कॅमेऱ्यांचे फुटेज तपासले आणि मोबाईलचे तांत्रिक विश्लेषणही केले. मात्र या मित्राने दिलेली माहिती आणि सीसीटीव्ही फुटेज यांचा कुठेच मेळ बसत नव्हता. त्यामुळे पोलिसांचा संशय वाढला.

पोलिसांनी 15 ऑक्टोबर रोजी त्या संशयित मित्राला पुन्हा चौकशीसाठी ताब्यात घेतले. कसून चौकशी झाल्यावर त्याने पोलिसांसमोर गुन्ह्याची कबुली दिली. आरोपींनी दाखवलेल्या जागेवरून पोलिसांनी अर्धवट जळालेला मृतदेह ताब्यात घेतला.

या प्रकरणी दोन्ही अल्पवयीन आरोपींना ताब्यात घेण्यात आले असून खुनाच्या कलमांखाली पुढील कायदेशीर कारवाई सुरू आहे. या घटनेमुळे ठाणे परिसरात मोठी खळबळ उडाली आहे.