Video Viral : ३ कोटींच्या नोटांनी सजले बाप्पा! तेलंगणातील हे मंदिर पाहून डोळ्यांचे पारणे फिटेल; मुकुट अन्

गणेशोत्सवात दरवर्षी निरनिराळ्या पद्धतीने बाप्पाची सजावट केली जाते आणि त्यातील अनेक व्हिडिओ सोशल मीडियावर शेअर होत असतात. गणेश पंडालातील अशा अनोख्या सजावटींवर नेहमीच लोकांचे लक्ष असते आणि निरनिराळ्या रुपात विराजमान झालेल्या गणेशाची अनेक सुंदर दृश्ये सोशल मीडियावर पाहायला मिळतात. अशातच आता एक नवीन व्हिडिओ मोठ्या प्रमाणात व्हायरल होत आहे, ज्यात गणपतीची मूर्ती चक्क पैशांच्या नोटांनी सजवण्यात आलेली दिसते. ही सजावट पाहून अनेकांचे डोळे दिपले असून कोट्यवधी रुपयांच्या नोटा वापरून ही मूर्ती सजवण्यात आल्याचे समोर आले आहे.

मिळालेल्या माहितीनुसार, तेलंगणा राज्यातील बापुजी नगरमध्ये गणेशाची ही खास सजावट करण्यात आली होती. या सजावटीसाठी एकूण २.९० कोटी रुपयांच्या नोटा वापरण्यात आल्याचे सांगितले जात आहे. या सर्व नोटा बँका, व्यापारी आणि भाविकांनी दिलेल्या देणग्यांमधून जमा करण्यात आल्या होत्या, असा दावा केला जात आहे. तेलंगणातील पलवंचा भागात ही सजावट पाहायला मिळाली, जी लोकांची श्रद्धा दाखवते असे म्हटले जात आहे. मात्र यासोबतच इतक्या मोठ्या खर्चावर काहींनी टीकाही केली आहे. देशात गरीबी असताना देवाच्या सजावटीवर इतके पैसे खर्च करणे योग्य नाही, या पैशांत गरिबांना जेवण देता आले असते, अशा प्रतिक्रिया अनेकांनी दिल्या आहेत.

खरे तर तेलंगणामध्ये दोन वेगवेगळ्या ठिकाणी अशी नोटांची सजावट करण्यात आली आहे. यातील एक सजावट कापू समाजाने केली असून त्यासाठी १.४ कोटी रुपयांच्या चलनी नोटांचा वापर करण्यात आला. तर पलवंचा येथे बाप्पाची मूर्ती १.५ कोटी रुपयांच्या नोटांनी झाकण्यात आली होती. व्हायरल व्हिडिओत मूर्तीबरोबरच तिचा मुकुट आणि गळ्यातील माळ यावरही नोटा लावलेल्या दिसतात. विशेष म्हणजे केवळ मूर्तीच नाही तर संपूर्ण पंडालही या नोटांनी सजवण्यात आला होता. या दोन्ही ठिकाणच्या सजावटींमध्ये वापरण्यात आलेल्या नोटांची एकूण किंमत पाहता, ही सजावट किती मोठ्या प्रमाणात करण्यात आली होती याची कल्पना येते.

हा व्हिडिओ सोशल मीडियावर पसरल्यानंतर यूजर्सनी कमेंट सेक्शनमध्ये आपापल्या प्रतिक्रिया नोंदवल्या आहेत. एका यूजरने लिहिले की, भक्तीची कल्पना वेगळी असू शकते, पण इतक्या पैशांचा असा वापर नको करायला हवा होता. दुसऱ्या एका यूजरने टिप्पणी केली की, गोरगरिबांना मदत करण्यासाठी यांचे हात पुढे येत नाहीत आणि धार्मिक विधीत असा खर्च करण्यासाठी हे सर्वात पुढे असतात. तर आणखी एका यूजरने लिहिले, यामुळेच देशातील गरीबी कमी होत नाहीये. अशा वेगवेगळ्या प्रतिक्रियांमधून या सजावटीबाबत लोकांमध्ये संमिश्र मतप्रवाह दिसून येत आहे.