धाराशिवमध्ये मराठवाडा मुक्तीसंग्रामातील १७ हुतात्म्यांचा स्मृतीस्तंभ बुलडोझरने पाडला

धाराशिव शहरातील छत्रपती संभाजी महाराज उद्यानात असलेला मराठवाडा मुक्तीसंग्रामातील हुतात्म्यांचा स्मृतीस्तंभ नगरपालिकेने बुलडोझरच्या सहाय्याने पाडल्याचा प्रकार समोर आला आहे. मराठवाड्याला निजामाच्या गुलामीतून मुक्त करण्यासाठी प्राणांचे बलिदान देणाऱ्या हुतात्म्यांच्या स्मृतींशी हा स्तंभ जोडलेला होता. शहराच्या मध्यवर्ती भागातील या स्तंभाची अक्षरशः राखरांगोळी झाल्याने नागरिकांमध्ये तीव्र संताप व्यक्त होत आहे. (शीतलकुमार शिंदे, धाराशिव)

हा स्मृतीस्तंभ आधी शहरातील जुन्या पोलीस ठाण्यासमोर होता. काही वर्षांपूर्वी तो छत्रपती संभाजी महाराज उद्यानात हलवण्यात आला होता. स्तंभावर मराठवाडा मुक्तीसंग्रामात प्राणांची आहुती देणाऱ्या १७ हुतात्म्यांची नावे कोरलेली होती. मागील बाजूस भारतीय संविधानाची उद्देशिका कोरली होती, तसेच राष्ट्रीय प्रतीक असलेले सिंहचिन्ह आणि अशोकचक्रही त्यावर होते.

त्यामुळे हा फक्त दगड-मातीचा बांधकामाचा भाग नव्हता. मराठवाडा मुक्तीसंग्रामाच्या इतिहासाची आणि हुतात्म्यांच्या बलिदानाची आठवण जपणारे प्रतीक म्हणून लोक त्याकडे पाहत होते.

स्तंभाची देखभाल करण्याची जबाबदारी प्रशासनाची असताना त्याकडे सतत दुर्लक्ष झाले, असा आरोप नागरिक करत आहेत. स्वच्छता, रंगरंगोटी आणि परिसराची निगा प्रशासनाकडून अपेक्षित होती. प्रत्यक्षात स्थानिक नागरिक आणि हुतात्म्यांचे नातेवाईकच पुढाकार घेऊन देखभाल करत होते. विविध राष्ट्रीय व ऐतिहासिक दिनांच्या निमित्ताने तिथे हुतात्म्यांना अभिवादनही केले जात होते.

नियमित देखभाल करण्याऐवजी प्रशासनाने अखेर स्तंभावर बुलडोझर फिरवला, म्हणून लोकांचा संताप वाढला आहे. ज्या हुतात्म्यांच्या बलिदानामुळे मराठवाड्याला स्वातंत्र्य मिळाले, त्यांच्या स्मृतीचे जतन करता आले नाही आणि उलट स्मृतीस्तंभच जमीनदोस्त केला गेला, अशी संतप्त प्रतिक्रिया नागरिकांमधून उमटत आहे.

स्तंभ पाडण्याचा निर्णय नेमका कोणी घेतला, त्यासाठी कोणाची परवानगी घेतली गेली, हे प्रशासनाने स्पष्ट करावे, अशी मागणी होत आहे. पाडण्यापूर्वी हुतात्म्यांच्या नातेवाईकांना किंवा संबंधित नागरिकांना कल्पना दिली होती का, हाही प्रश्न विचारला जात आहे. स्तंभावरील हुतात्म्यांची नावे, संविधानाची उद्देशिका आणि राष्ट्रीय प्रतीके यांचे पुढे काय केले, याबद्दलही प्रशासनाने भूमिका मांडावी, असे नागरिकांना वाटते.

या प्रकाराची चौकशी करून स्तंभ पाडण्याचे आदेश देणारे अधिकारी आणि प्रत्यक्ष कारवाई करणारे कर्मचारी यांची जबाबदारी निश्चित करावी, तसेच दोषींवर कठोर कारवाई करावी, अशी मागणी नागरिक आणि हुतात्म्यांचे नातेवाईक करत आहेत.

हुतात्म्यांच्या स्मृतीशी संबंधित स्थळांचे जतन करण्याऐवजी त्यांची अशी अवस्था होणे हा गंभीर प्रशासकीय प्रश्न आहे, असे नागरिकांचे म्हणणे आहे. नगरपालिकेने फक्त खुलासा न करता जबाबदारी निश्चित करावी आणि स्मृतीस्तंभाचे पुनर्स्थापन व योग्य पद्धतीने जतन करण्याचा ठोस निर्णय घ्यावा, अशी मागणी जोर धरत आहे.