नागपुरात तेल कंपनीच्या संचालकाला खोट्या तक्रारीत गोवण्याचा कट उघड, आग्र्याचा आदित्य गुप्ता अटकेत

राजस्थानातील एका तेल कंपनीच्या संचालकाला खोट्या गुन्ह्यात अडकवून मोठी रक्कम उकळण्याचा कथित कट नागपूरच्या तहसील पोलिसांनी उधळून लावला. या प्रकरणात आदित्य सुरेशचंद्र गुप्ता (३०, रा. आग्रा) याला अटक झाली आहे. न्यायालयाच्या आदेशानंतर त्याला कारागृहात पाठवण्यात आले आहे. पोलिस उपायुक्त राहुल मदणे यांनी शनिवारी पत्रकार परिषदेत ही माहिती दिली.

राजस्थानातील रतनगढ येथे इरफान अली सलीम तेली (३२) यांची तेल कंपनी आहे. त्यांच्याविरुद्ध खोटी तक्रार दाखल करून त्यांच्याकडे तीन कोटी रुपयांची खंडणी मागण्याचा प्रयत्न झाला, असे पोलिस तपासात समोर आले आहे. त्यासाठी नागपुरात शिकणाऱ्या १९ वर्षांच्या विद्यार्थिनीला पाच लाख रुपये देण्याचे आमिष दाखवले गेले, असा आरोप आहे.

आदित्यच्या सांगण्यावरून या विद्यार्थिनीने तहसील पोलिस ठाण्यात इरफान यांच्याविरुद्ध तक्रार दिली. सुरुवातीला तिच्या तक्रारीवरून पोलिसांनी इरफान यांच्यावर गुन्हा नोंदवला होता. पुढच्या तपासात मात्र प्रकरणाला वेगळे वळण मिळाले. आदित्यने पुण्यातही इरफान यांच्याविरुद्ध असाच गुन्हा दाखल करून घेतल्याची माहिती पोलिसांनी दिली. त्या गुन्ह्यात इरफान सध्या कारागृहात आहेत. तहसील पोलिसांनी त्यांना ताब्यात घेऊन चौकशी केली, तेव्हा या प्रकरणातील संशयास्पद गोष्टी उघड होऊ लागल्या.

तक्रारीत एका व्हिडिओ पुराव्याचा उल्लेख होता. तो जप्त करण्यासाठी विद्यार्थिनीची चौकशी सुरू होती. त्या वेळी तिच्यासोबत आलेला आदित्य बोलण्यात वारंवार मध्ये येत असल्याचे पोलिसांच्या लक्षात आले. म्हणून पोलिसांनी त्याला बाजूला बसवले आणि विद्यार्थिनीला वेगळे घेऊन चौकशी केली. ही चौकशी पोलिस निरीक्षक संजय मेंढे यांच्या मार्गदर्शनाखाली हवालदार धनराज चिंगुवार करत होते.

या स्वतंत्र चौकशीत विद्यार्थिनीने सांगितले की ती इरफान यांना ओळखत नाही. 'मीका' या अॅपवर तिने त्यांच्याशी कधीही संवाद साधला नाही आणि आदित्यच्या सांगण्यावरूनच तक्रार दिली, असेही तिने पोलिसांना सांगितल्याचे उपायुक्त मदणे यांनी सांगितले.

त्यानंतर पोलिसांनी विद्यार्थिनीच्या मोबाइलमधील माहिती तपासली. आदित्यनेच इरफान यांच्याविरुद्ध कट रचल्याचे त्यातून निष्पन्न झाले, असा पोलिसांचा दावा आहे. त्या आधारावर आदित्यला अटक करण्यात आली.

ही विद्यार्थिनी मूळची चंद्रपूरची आहे. गेली तीन वर्षे ती नागपुरात भाड्याच्या खोलीत राहते आणि शहरातील एका नामांकित महाविद्यालयात शिकते. एका पार्सलमुळे आदित्यला तिचा मोबाइल क्रमांक मिळाला. त्यातून दोघांची ओळख झाली आणि पुढे याच ओळखीचा वापर करून तिला तक्रार करायला भाग पाडले, असा आरोप आहे.

ही कारवाई पोलिस उपायुक्त राहुल मदणे आणि सहायक पोलिस आयुक्त शिवप्रसाद पारवे यांच्या मार्गदर्शनाखाली झाली. वरिष्ठ पोलिस निरीक्षक संजय मेंढे, उपनिरीक्षक संदीप भिताळे आणि पोलिस हवालदार धनराज चिंग्वार यांनी ती पार पाडली.