बैलगाडीला धडक देऊन पळालेला टिप्पर चालक १३ दिवसांनी तळोधी पोलिसांच्या ताब्यात

तळोधी पोलीस स्टेशनच्या हद्दीत घडलेल्या भीषण अपघातानंतर पसार झालेल्या अज्ञात टिप्पर चालकाला आणि त्याच्या वाहनाला शोधून काढण्यात तळोधी पोलिसांना अखेर मोठे यश मिळाले आहे. बैलगाडीला धडक देऊन पळून गेलेला चालक आणि त्याचा टिप्पर अपघातानंतर तब्बल १३ दिवसांनी पोलिसांच्या ताब्यात आले आहेत.

हा अपघात १० ऑक्टोबर २०२६ रोजी सकाळी ४ ते ५ वाजण्याच्या सुमारास गोमाजी दामाजी पेट्रोल पंपाजवळ हायवेरोडवर झाला होता. नागभीडकडून विरुद्ध दिशेने भरधाव वेगात, हयगयीने आणि निष्काळजीपणे टिप्पर चालवून नथ्थू श्रीराम चचाने यांच्या बैलगाडीला जोरदार धडक देण्यात आली होती. चचाने हे ५५ वर्षांचे असून तळोधीचे रहिवासी आहेत.

या धडकेत चचाने यांच्या पायाला गंभीर दुखापत झाली, तर बैलगाडीतील बैल जागीच मरण पावला. अपघातानंतर टिप्पर चालक घटनास्थळावरून पसार झाला. गंभीर जखमी झालेल्या नथ्थू चचाने यांचा नंतर उपचारादरम्यान मृत्यू झाला. फिर्यादी राजेंद्र रुषीजी कोडापे यांच्या तक्रारीवरून तळोधी पोलीस स्टेशनमध्ये याबाबत गुन्हा नोंदवण्यात आला होता.

गुन्ह्याच्या तपासात वाहनाचा तांत्रिक पद्धतीने शोध घेताना संभ्रम निर्माण होत होता. म्हणून तळोधी पोलिसांनी आपले तपास कौशल्य पणाला लावले. तळोधी रोडने चालणारी अवजड वाहने कोणाची आहेत आणि ती कुठून येतात, याची माहिती त्यांनी गुप्त बातमीदाराकडून घेतली. त्यानंतर क्रमांक नसलेल्या टिप्परचा शोध सुरू झाला.

तपासादरम्यान हे वाहन उमरेड, जि. नागपूर येथे असून ते भिवापूर रोडने मूलकडे जात असल्याची गुप्त माहिती पोलिसांना मिळाली. त्यामुळे पोलिसांनी लगेच त्याचा पाठलाग केला. पोलीस स्टेशनच्या वाहतूक कर्मचाऱ्यांना माहिती देऊन तळोधी रोडवर नाकाबंदीही करण्यात आली.

या दरम्यान टिप्पर क्रमांक MH 40 CD 4632 हा सचिन दुर्योधन देशमुख याच्या ताब्यात मिळून आला. देशमुख ३७ वर्षांचा असून तो चालक म्हणून काम करतो. तो सोमनाळा, पोस्ट मोकेर्बंडी, ता. भिवापूर, जि. नागपूर येथील रहिवासी आहे. ताब्यात मिळून आल्यानंतर पोलिसांनी त्याची विचारपूस केली.

या विचारपुसीत देशमुख याने गुन्हा केल्याची कबुली दिली. त्यामुळे त्याच्याविरुद्ध कायदेशीर कारवाई करण्यात आली आहे. गुन्ह्यात वापरलेला टिप्पर जप्त करून पोलीस स्टेशनला डिटेन करण्यात आला आहे.

ही कारवाई पोलीस अधीक्षक आयुष नोपानी, अपर पोलीस अधीक्षक ईश्वर कातकडे आणि ब्रह्मपुरीचे उपविभागीय पोलीस अधिकारी साहिल झरकर यांच्या मार्गदर्शनाखाली पार पडली. ठाणेदार सपोनी राहुल गुहे, पोउपनि राजेश उंदिरवादे, पोहवा स्वप्नील चांदेकर, पोअ. संदेश देवगडे, विजय मैद आणि अक्षय हटवार यांनी ही कारवाई केली.