तळेगाव दाभाडे नगरपरिषद हद्दीबाहेरील रस्त्यांसाठी दोन कोटींचा निधी; आमदार सुनील शेळके यांची घोषणा

तळेगाव दाभाडे नगरपरिषदेच्या हद्दीबाहेर असलेल्या नागरी वसाहतींमधील रस्ते आणि इतर पायाभूत सुविधांच्या कामांसाठी आमदार सुनील शेळके यांनी दोन कोटी रुपयांचा निधी देण्याची घोषणा केली. तळेगाव दाभाडे ग्रामीण भागाचा नगरपरिषदेच्या हद्दीत समावेश व्हावा, यासाठी शासनस्तरावर पाठपुरावा करण्याचेही आश्वासन त्यांनी दिले.

तळेगाव दाभाडे ग्रामीण कृती समितीने हद्दवाढ आणि पायाभूत सुविधा मिळाव्यात, या मागणीसाठी नगरपरिषदेवर मोठा मोर्चा काढला होता. मोर्चा संपल्यानंतर आमदार शेळके आंदोलनस्थळी गेले आणि त्यांनी आंदोलकांशी संवाद साधला. वेगवेगळ्या वसाहतींमधल्या अडचणी समजून घेतल्यानंतर त्यांनी रस्त्यांच्या कामासाठी दोन कोटी रुपये देणार असल्याचे जाहीर केले.

कृती समितीच्या वतीने नगराध्यक्ष संतोष दाभाडे पाटील आणि मुख्याधिकारी गिरीश दापकेकर यांना निवेदन देण्यात आले. गणपती माळ, शिंदे वस्ती, काकडे वस्ती आणि ठाकरवाडी (१ ते ३) या वस्त्यांना नगरपरिषदेकडून मूलभूत सुविधा आणि सेवा मिळाव्यात, तसेच तळेगाव दाभाडे ग्रामीण भागाचा नगरपरिषद हद्दीत समावेश करावा, अशी मागणी या निवेदनात करण्यात आली आहे.

नगराध्यक्ष संतोष दाभाडे पाटील यांनी हद्दवाढीच्या प्रस्तावावर शासनस्तरावर लवकर निर्णय व्हावा, यासाठी प्रयत्न करण्याचे आश्वासन दिले. कचरा संकलन सशुल्क पद्धतीने सुरू केले जाईल, असेही त्यांनी सांगितले. पाणीपुरवठा योजनेचे काम पूर्ण झाल्यावर नियमानुसार सर्वसाधारण सभेची मान्यता घेतली जाईल, त्यानंतर पाणीपट्टी आकारून संबंधित भागात पाणीपुरवठा करण्याचा प्रयत्न केला जाईल, असे त्यांनी सांगितले. आकार फाउंड्रीपर्यंत नगरपरिषद हद्दीतील वीजपुरवठा तातडीने सुरू करण्यासाठीही कार्यवाही केली जाईल, असेही ते म्हणाले.

मोर्चानंतर आमदार शेळके यांनी आंदोलकांच्या मागण्या ऐकून घेतल्या आणि त्यांच्या समस्या समजून घेतल्या. हद्दवाढीचा प्रश्न शासनदरबारी पाठपुरावा करून मार्गी लावण्यासाठी प्रयत्न करणार असल्याचे त्यांनी सांगितले. निधीच्या घोषणेनंतर मोर्चात सहभागी झालेल्या नागरिकांनी टाळ्यांच्या कडकडाटात स्वागत केले. गणेश शिंदे यांनी आभार मानले.

या मोर्चात नगराध्यक्ष संतोष दाभाडे पाटील, उपनगराध्यक्ष गणेश काकडे, मुख्याधिकारी गिरीश दापकेकर, भाजपचे गटनेते इंद्रकुमार ओसवाल, विविध समित्यांचे सभापती, नगरसेवक, पदाधिकारी, तसेच कृती समितीचे पदाधिकारी आणि नागरिक मोठ्या संख्येने सहभागी झाले होते. महिलांची उपस्थितीही मोठी होती.