ताडोबा होणार वाइल्डलाइफ सफारी हब! MTDC 25 हेक्टरमध्ये उभारणार 5-स्टार टुरिझम प्रोजेक्ट
MTDC नं राज्यातलं पर्यटन वाढवण्यासाठी मोठा प्लान आखलाय. ताडोबात 25 हेक्टर जागेवर फाइव्ह स्टार रिसॉर्टसह वाइल्डलाइफ सफारी हब उभारलं जाणार आहे.
राज्यातलं पर्यटन आणखी वाढवण्यासाठी MTDC नं एक मोठा प्लान आखलाय. या प्लाननुसार राज्यातल्या पाच महत्त्वाच्या पर्यटन ठिकाणांचा त्यांच्या खासियतीनुसार विकास केला जाणार आहे. या पाच ठिकाणांपैकी प्रत्येकाला त्याच्या स्वतःच्या वैशिष्ट्यांनुसार वेगळ्या पद्धतीनं विकसित करण्याचा MTDC चा विचार आहे.
यातलंच एक ठिकाण म्हणजे विदर्भातलं प्रसिद्ध ताडोबा. इथं 25 हेक्टर जागेवर एक भव्य फाइव्ह स्टार टुरिझम रिसॉर्ट उभारलं जाणार आहे. या मोठ्या आणि महत्त्वाकांक्षी प्रोजेक्टसाठी सुरुवातीचं सर्व्हे काम सुरू झालंय आणि लवकरच याचा मास्टर प्लॅनही तयार होणार आहे.
नागपूर विभागाच्या पर्यटन नकाशावर ताडोबाचं स्थान सगळ्यात महत्त्वाचं मानलं जातं. या नव्या प्रोजेक्टमध्ये ताडोबात 25 हेक्टर परिसरात पसरलेल्या वर्ल्ड क्लास फाइव्ह स्टार रिसॉर्टबरोबरच एक 'वाइल्डलाइफ सफारी हब' सुद्धा उभारला जाणार आहे.
याशिवाय इथं पर्यटकांसाठी फाइव्ह स्टार लक्झरी व्हिला, कॉन्फरन्स हॉल, नेचर इंटरप्रिटेशन सेंटर आणि इको लॉज अशा आधुनिक सुविधाही तयार केल्या जाणार आहेत. हा एकत्रित प्रोजेक्ट सुरू झाल्यावर ताडोबाला येणाऱ्या पर्यटकांना निसर्गसौंदर्याबरोबरच मजामस्तीचाही भारी अनुभव मिळणार आहे.
नागपूर शहराशी थेट जवळीक आणि कनेक्टिव्हिटी असल्यामुळं हा प्रोजेक्ट संपूर्ण विभागाचं आर्थिक आणि पर्यटन चित्रच बदलून टाकणार आहे. नागपूरच्या डॉ. बाबासाहेब आंबेडकर आंतरराष्ट्रीय विमानतळावर उतरणारे देशी-विदेशी पर्यटक आता ताडोबात येऊन आंतरराष्ट्रीय दर्जाच्या लक्झरी सुविधांचा आनंद घेऊ शकतील.
याचबरोबर या मेगा प्रोजेक्टमुळं नागपूर आणि चंद्रपूर भागातल्या तरुणांना हॉस्पिटॅलिटी, गाइडिंग, ट्रान्सपोर्टेशन आणि लोकल हस्तकला क्षेत्रात रोजगाराच्या भरपूर नव्या संधी मिळणार आहेत.
ताडोबाबरोबरच महाराष्ट्र राज्यातल्या इतर पर्यटन ठिकाणांचंही इन्फ्रास्ट्रक्चर मजबूत केलं जातंय. महाबळेश्वरमध्ये 6.07 हेक्टरवर 4-स्टार रिसॉर्ट उभारलं जाणार आहे, तर हरिहरेश्वरमध्ये 5.98 हेक्टरवर 3-स्टार प्रोजेक्ट साकारला जाणार आहे. मिठबावमध्ये 4.85 हेक्टरवर कोस्टल टुरिझम हब, बोटिंग आणि हेरिटेज स्टे उभारलं जाणार आहे, तसंच माथेरानमध्ये पर्यावरणपूरक हेरिटेज रिसॉर्ट विकसित केलं जाणार आहे.
पर्यटन क्षेत्रातल्या तज्ज्ञांच्या मते या पावलामुळं विदर्भासह संपूर्ण राज्यातल्या पर्यटन व्यवसायाला मोठी गती मिळेल.
