सुरेश रैना पुन्हा सीएसकेमध्ये येणार? कोचिंग स्टाफमध्ये जागा मिळावी, अशी इच्छा व्यक्त

आयपीएल 2027 ची तयारी सर्व संघांनी आतापासूनच सुरू केली आहे. चेन्नई सुपर किंग्सच्या संघातही मोठ्या घडामोडी घडत असल्याचे दिसून येत आहे. चेन्नईचा स्टार आणि भारताचा माजी कर्णधार महेंद्रसिंह धोनी 2027 मध्ये खेळणार की नाही, अशी चर्चा सुरू असतानाच सुरेश रैनाही सीएसकेमध्ये परतणार की काय, अशी चर्चा सुरू झाली आहे. त्याबद्दल अधिक सविस्तर माहिती पाहूया.

चेन्नई सुपर किंग्सचा दिग्गज खेळाडू आणि भारताचा माजी स्फोटक फलंदाज सुरेश रैना चेन्नईसोबत जोडला जाण्यासाठी उत्सुक असल्याचे म्हटले जात आहे. रैनाने नुकतीच सीएसकेच्या कोचिंग स्टाफसोबत जोडले जाण्याची इच्छा व्यक्त केली आहे. तसेच त्याने थेट फ्रँचायझीसमोर कोचिंग सेटअपमध्ये स्थान देण्याची मागणीही केली असल्याचे म्हटले जात आहे. त्यामुळे रैना पुन्हा सीएसकेच्या जर्सीत दिसणार का, हे आता पाहावे लागणार आहे.

रैनाने सीएसकेचा आणि भारताचा माजी खेळाडू आर. अश्विन यांच्यासोबत एका यूट्यूब चॅनलवर संवाद साधला. त्या वेळी तो म्हणाला, 'मी फ्रँचायझीसमोर माझी इच्छा सांगितली आहे. आता अंतिम निर्णय त्यांना घ्यायचा आहे. माझ्यासाठी सर्वात महत्त्वाची गोष्ट म्हणजे चेन्नई सुपर किंग्सशी जोडलेले राहणे आणि संघाला पुन्हा एकदा आयपीएल ट्रॉफी जिंकण्यास मदत करणे हीच असणार आहे.'

सुरेश रैना हा भारताचा माजी फलंदाज आणि सीएसकेचा माजी खेळाडू आहे. 2008 ते 2021 पर्यंत तो सीएसकेचा खेळाडू होता. आयपीएलच्या इतिहासातील तो एक सर्वोत्कृष्ट फलंदाज आहे. आयपीएलच्या वर्तुळात त्याला 'मिस्टर आयपीएल' या नावाने ओळखले जाते.

आयपीएलच्या प्रत्येक हंगामात 500 पेक्षा जास्त रन्स करण्याचा रेकॉर्ड त्याच्या नावावर आहे. विशेषतः चेन्नई सुपर किंग्सकडून खेळताना त्याने अनेक सामन्यांमध्ये एकहाती विजय मिळवून दिले आहेत.

इंटरनॅशनल क्रिकेटमधून निवृत्ती घेतल्यानंतर रैनाने क्रिकेट तज्ज्ञ आणि समालोचक म्हणून आपली छाप पाडली. आता मात्र तो एका नव्या भूमिकेत आयपीएलमध्ये काम करण्यास उत्सुक आहे. मैदानावर थेट सीएसकेसाठी रणनीतीकार म्हणून काम करण्यास तो उत्सुक असल्याचे दिसून येत आहे.

त्यामुळे येत्या काळात सीएसकेकडून सुरेश रैना प्रशिक्षक किंवा कोचिंग स्टाफचा भाग म्हणून दिसण्याची शक्यता आहे. अंतिम निर्णय फ्रँचायझीला घ्यायचा आहे, असे रैनानेच सांगितले आहे.