विराट कोहलीचा स्लिपमधला भन्नाट झेल व्हायरल, धोनी यांचा विक्रम मोडला

ऑकलंडमध्ये आजपासून भारत आणि न्यूझीलंड यांच्यात पाच वनडे सामन्यांच्या मालिकेला सुरुवात झाली आहे. या मालिकेतला पहिला सामना सध्या सुरू आहे. या सामन्यात भारतीय संघाने आपली पकड मजबूत केल्याचे दिसून येत आहे. कर्णधार शुभमन गिल यांनी टॉस जिंकला आणि प्रथम गोलंदाजी करण्याचा निर्णय घेतला होता.

प्रथम गोलंदाजी करताना भारतीय गोलंदाजांनी अचूक मारा केला आणि न्यूझीलंडचा संघ 185 रन्सवर ऑल आउट झाला. त्यामुळे न्यूझीलंडने भारताला जिंकण्यासाठी 186 रन्सचे टार्गेट दिले आहे. मात्र यावेळी सगळ्यात जास्त चर्चा विराट कोहलीची होत आहे. भारताचा माजी कर्णधार असलेल्या कोहलीने स्लिपमध्ये एक अत्यंत अशक्य आणि अद्भुत असा झेल पकडला. फिल्डिंग करतानाच्या या झेलचा व्हिडिओ सोशल मीडियावर व्हायरल झाला आहे.

भारत आणि न्यूझीलंड यांच्यातील या वनडे सामन्यात भारतीय खेळाडूंच्या अप्रतिम कामगिरीने चाहत्यांचे मन जिंकले आहे. वेगवान गोलंदाज अंशुल कंबोज आणि अनुभवी विराट कोहली यांचा एक अनोखा क्षण मैदानावर दिसून आला. हा थरार 29 व्या ओव्हरमध्ये घडला.

भारताचा तरुण वेगवान गोलंदाज अंशुल कंबोज ही 29 वी ओव्हर टाकत होता. ओव्हरमधल्या तिसऱ्या बॉलवर न्यूझीलंडचा बॅटसमन नेथन स्मिथ याने चांगला शॉट मारण्याचा प्रयत्न केला. पण बॉल त्याच्या बॅटला लागून दुसऱ्या स्लिपच्या दिशेने गेला. तिथे दुसऱ्या स्लिपमध्ये विराट कोहली उभा होता. त्याने उजव्या बाजूला जबरदस्त डाईव्ह मारली आणि बॉल हवेतच पकडला.

कोहलीने इतका अशक्य झेल पकडला की मैदानावरचे सगळे खेळाडू आणि प्रेक्षकही चकित झाले. झेल पकडला गेला आहे की नाही, हे नीट तपासण्यासाठी थर्ड अंपायरने रिप्ले पाहायला सुरुवात केली. रिप्लेमध्ये झेल पूर्ण झाल्याचे दिसले. अंशुल कंबोजच्या गोलंदाजीवर कोहलीने घेतलेला हा झेल सामन्याचे मुख्य आकर्षण ठरला.

आपल्या शानदार फिल्डिंगमुळे कोहलीने क्रिकेटच्या इतिहासात आपले नाव कोरले आहे. या 'सुपरमॅन' झेलच्या बळावर त्याने भारताचा माजी कर्णधार महेंद्रसिंग धोनी यांचा एक अत्यंत खास विक्रम मोडला आहे. न्यूझीलंडमध्ये इंटरनॅशनल क्रिकेटमध्ये झेल पकडणारा कोहली आता सर्वात वयस्कर खेळाडू ठरला आहे.

हा पराक्रम करताना कोहलीचे वय 37 वर्षे आणि 364 दिवस इतके आहे. याआधी हा विक्रम धोनी यांच्या नावावर होता. आता तो कोहलीच्या नावावर झाला आहे. सामना अजून सुरू असून भारताला 186 रन्स करायचे आहेत.