सुजुकी हायाबुसा स्पेशल एडिशन लाँच, किंमत Rs 19.90 लाख; नव्या इलेक्ट्रॉनिक्ससह आणखी खास
सुजुकी मोटरसायकल इंडियाने हायाबुसाची 2026 साठीची स्पेशल एडिशन Rs 19.90 लाख एक्स-शोरूम दिल्ली किंमतीत लाँच केली आहे.
सुजुकी मोटरसायकल इंडियाने हायाबुसाची 2026 साठीची नवी स्पेशल एडिशन लाँच केली आहे. जगभरातील बाइकप्रेमींच्या मनात या बाइकचे वेगळे स्थान आहे, आणि आता तिला स्पेशल एडिशनचा नवा अवतार मिळाला आहे. या स्पेशल एडिशनची किंमत Rs 19.90 लाख एक्स-शोरूम दिल्ली अशी ठेवण्यात आली आहे.
स्टँडर्ड हायाबुसाची किंमत Rs 18.99 लाख आहे. म्हणजेच स्पेशल एडिशन घेणाऱ्या ग्राहकांना Rs 91,000 जास्त द्यावे लागणार आहेत.
स्पेशल एडिशनला Pearl Vigor Blue हा रंग देण्यात आला आहे. त्यावर खास डेकल्स, वेगळ्या फिनिशची व्हील्स आणि फ्युल टँकवर 3D सुजुकी लोगो मिळतो. याशिवाय टँकवर स्पेशल एडिशन पॉटिंग एम्ब्लेम, अॅनोडाइज्ड मफलर एंड आणि हीट-गार्ड पार्ट्स देण्यात आले आहेत. सिंगल-सीट काऊलही स्टँडर्ड म्हणून मिळतो. त्यामुळे बाइकच्या मूळ डिझाइनमध्ये मोठा बदल न करता तिचा प्रीमियम लूक अधिक उठून दिसतो.
स्पेशल एडिशनसोबतच स्टँडर्ड हायाबुसासाठी 3 नवीन कलर कॉम्बिनेशन्स सादर करण्यात आली आहेत. याशिवाय बाइकच्या इलेक्ट्रॉनिक्समध्येही काही महत्त्वाचे बदल झाले आहेत. नवीन ELIIY Power लिथियम-आयन बॅटरी आधीच्या युनिटपेक्षा हलकी आणि कॉम्पॅक्ट आहे. लोडच्या वेळी अधिक स्थिर व्होल्टेज मिळावे, यासाठी ती तयार करण्यात आली आहे.
हायाबुसाच्या Launch Control System आणि Power Mode Selector च्या सेटिंगमध्येही सुधारणा करण्यात आली आहे. Smart Cruise Control मध्ये झालेला बदल विशेष लक्षवेधी आहे. आता गियर बदलतानाही ही सिस्टम सक्रिय राहते. त्यामुळे रायडरला प्रत्येक गियर शिफ्टच्या वेळी थ्रॉटल सांभाळण्याची गरज कमी होते आणि लांब पल्ल्याच्या राइडमध्ये अधिक सहज अनुभव मिळू शकतो.
मेकॅनिकल सेटअपमध्ये मोठे बदल करण्यात आलेले नाहीत. बाइकला 1,340 cc चे लिक्विड-कूल्ड, फ्युल-इंजेक्टेड, 4-सिलिंडर DOHC इंजिन आहे. हे इंजिन 190 PS पॉवर आणि 150 Nm टॉर्क तयार करते आणि 6-स्पीड गिअरबॉक्ससोबत जोडलेले आहे. ट्विन-स्पार अॅल्युमिनियम फ्रेम, KYB इन्व्हर्टेड फोर्क्स, Bridgestone BATTLAX HYPERSPORT S22 टायर्स आणि Brembo Stylema फ्रंट कॅलिपर्स हेही कायम आहेत.
याशिवाय Motion Track Traction Control, बाय-डायरेक्शनल क्विकशिफ्टर, Suzuki Easy Start, Low RPM Assist आणि Slope Dependent Control ही फीचर्स मिळतात. त्यामुळे हायाबुसा केवळ वेगासाठीच नाही, तर रायडिंगच्या अनुभवासाठीही टेक्नोलॉजीने सज्ज आहे. स्पेशल एडिशन आता देशभरातील सुजुकी मोटरसायकल इंडियाच्या डीलरशिपवर उपलब्ध आहे.
