वर्षाच्या सुरुवातीपासून सोन्याचे भाव सुमारे 20 टक्क्यांनी उतरले; 24 कॅरेट 1,48,138 रुपये
अमेरिका-इराण युद्धानंतर झालेली प्रॉफिट बुकिंग आणि फेडरल रिझर्व्हच्या व्याजदराच्या अंदाजाचा सोन्यावर परिणाम झाला आहे.
या वर्षी सोने-चांदीच्या किंमतींनी उच्चांकी पातळी गाठली होती. पण अमेरिका-इराण युद्धानंतर अपेक्षेच्या उलट मोठी प्रॉफिट बुकिंग दिसली. वर्षाच्या सुरुवातीपासून आतापर्यंत सोन्याच्या किंमतीत सुमारे 20 टक्क्यांची घसरण नोंदवली गेली आहे.
आंतरराष्ट्रीय बाजारात शुक्रवारी स्पॉट गोल्ड सुमारे 0.9 टक्क्यांनी घसरून 4140 डॉलर प्रति औंसवर बंद झाले. संपूर्ण आठवड्यात एकूण 3.4 टक्क्यांची नरमाई राहिली.
साधारणपणे भू-राजकीय तणाव किंवा युद्धजन्य परिस्थितीत सुरक्षित गुंतवणूक म्हणून सोन्याचे भाव वाढतात. यावेळी मात्र चित्र पूर्णपणे वेगळे राहिले. इराण आणि अमेरिका यांच्यातील लष्करी संघर्षामुळे कच्चे तेल आणि जीवनावश्यक वस्तूंच्या किंमती भडकतील आणि जागतिक पातळीवर महागाई अनियंत्रित होईल, अशी दाट भीती बाजारात आहे. या महागाईला आळा घालण्यासाठी अमेरिकेची मध्यवर्ती बँक फेडरल रिझर्व्ह व्याजदर वाढवू शकते, या शक्यतेमुळे गेल्या काही महिन्यांपासून सोन्यावर मोठा दबाव आहे.
सुरुवातीला या महिन्याच्या अखेरीस फेडरल रिझर्व्हकडून व्याजदरात वाढ होण्याची दाट शक्यता वर्तवली जात होती. मात्र अमेरिकेतून महागाईचे काही नरमाईचे आकडे अलीकडेच समोर आले आणि हा अंदाज बदलला. बाजारातील तज्ज्ञांच्या मते, येत्या 28 ऑक्टोबरच्या बैठकीत फेडरल रिझर्व्ह व्याजदर सध्याच्या पातळीवरच स्थिर ठेवण्याची शक्यता आहे. व्याजदर वाढीची शक्यता आधी 70 टक्क्यांच्या घरात सांगितली जात होती, ती आता घसरून केवळ 22 टक्क्यांच्या आसपास आली आहे. व्याजदर वाढले नाहीत, तर या निर्णयामुळे सोन्याच्या किंमतींना मोठा सपोर्ट मिळू शकतो.
भारतात 2 ऑक्टोबर रोजी गांधी जयंतीनिमित्त सराफा बाजार आणि एमसीएक्स (MCX) बंद होते. त्यामुळे आंतरराष्ट्रीय बाजारातील शुक्रवारची घसरण लगेच भारतीय बाजारात दिसली नाही. सोमवारी, 5 ऑक्टोबर रोजी लॉन्ग वीकेंडनंतर बाजार उघडेल, तेव्हा आंतरराष्ट्रीय बाजारातील कमजोरीचा सुरुवातीचा परिणाम भारतीय बाजारावरही होण्याची शक्यता वर्तवली जात आहे. पुढे सोन्याची दिशा पूर्णपणे फेडरल रिझर्व्हच्या भूमिकेवर आणि येत्या निर्णयांवर अवलंबून असेल.
इंडिया बुलियन अँड ज्वेलर्स असोसिएशनच्या (IBJA) माहितीनुसार, रविवारी (4 ऑक्टोबर) 24 कॅरेट सोन्याचा भाव प्रति 10 ग्रॅम 1,48,138 रुपये आहे. त्याच दिवशी 22 कॅरेट सोन्याचा दर प्रति 10 ग्रॅम 147545, 20 कॅरेटचा 135694, 18 कॅरेटचा 111104 आणि 14 कॅरेटचा 86661 असा आहे.
शहरांच्या दराबद्दल सांगायचे तर मुंबई, ठाणे, रत्नागिरी, पुणे, नागपूर, कोल्हापूर, छत्रपती संभाजीनगर, जळगाव, सांगली आणि बारामती या सर्व शहरांत सोन्याचा दर प्रति 10 ग्रॅम 148138 आहे. चांदीचा दर IBJA नुसार रविवारी (4 ऑक्टोबर) 2,20,829 रुपये प्रति किलोग्रॅम आहे.
