सोन्याचा भाव आज, 28 सप्टेंबर: चार दिवसांची घसरण थांबली, दरात किंचित सुधारणा

सोनं आणि चांदीच्या बाजारात गेल्या काही दिवसांपासून सतत चढ-उतार सुरू होते. पण शनिवार-रविवारी वीकेंडमुळे बाजार बंद होण्याआधी एक दिलासादायक बातमी समोर आली आहे. सलग चार दिवस सुरू असलेली सोन्याच्या दरातील मोठी घसरण अखेर थांबली असून भावात थोडी सुधारणा झाली आहे.

ताज्या आकडेवारीनुसार दिल्लीच्या सराफा बाजारात 24 कॅरेट सोन्याचा दर सगळे टॅक्स धरून 1,52,600 रुपये प्रति 10 ग्रॅमवर पोहोचला आहे. मल्टी कमोडिटी एक्सचेंज म्हणजेच MCX वर 24 कॅरेट सोन्याचा वायदा भाव 1,50,700 रुपये प्रति 10 ग्रॅम इतका नोंदवला गेला. आदल्या दिवशी हाच भाव 1,50,881 रुपये प्रति 10 ग्रॅमवर बंद झाला होता. बुलियन्सच्या माहितीनुसार 24 कॅरेट सोन्याची किंमत 1,51,460 रुपये प्रति 10 ग्रॅम आहे, तर आंतरराष्ट्रीय बाजारात सोन्याचा भाव 4,320.50 रुपये प्रति औंस झाला आहे. गुडरिटर्न्सच्या माहितीनुसार 24 कॅरेट सोन्याचा दर 1,52,830 रुपये प्रति 10 ग्रॅम इतका आहे.

IBJA नुसार आजचा सकाळचा दर असा आहे - 24 कॅरेट सोनं 1,52,113 रुपये प्रति 10 ग्रॅम, 22 कॅरेट सोनं 1,38,936 रुपये प्रति 10 ग्रॅम, 18 कॅरेट सोनं 1,14,085 रुपये प्रति 10 ग्रॅम आणि 14 कॅरेट सोनं 88,986 रुपये प्रति 10 ग्रॅम.

मुंबई, पुणे, नाशिक, नागपूर, कोल्हापूर, सांगली, जळगाव आणि छत्रपती संभाजीनगर या सगळ्या शहरांमध्ये आज 24 कॅरेट सोन्याचा दर सारखाच म्हणजे 1,52,680 रुपये प्रति 10 ग्रॅम इतका आहे.

व्यापाऱ्यांच्या मते सलग चार सत्रांमध्ये सोन्याचे दर घसरल्यानंतर गुंतवणूकदारांनी खालच्या पातळीवर मोठ्या प्रमाणात खरेदी केली आणि त्यामुळेच दरात ही सुधारणा दिसून आली. तरीही संपूर्ण आठवड्याचा हिशोब केला तर सोन्याच्या किमतीत 4,000 रुपयांची म्हणजे 2.5 टक्क्यांची घसरण झाल्याचं दिसतं.

एचडीएफसी सिक्युरिटीजचे वरिष्ठ विश्लेषक सौमिल गांधी यांनी सांगितलं की शुक्रवारी सोन्याच्या दरात झालेली ही सुधारणा मौल्यवान धातूंसमोरच्या काही मुख्य अडचणी कमी झाल्यामुळे झाली. कच्च्या तेलाचे भाव आणि अमेरिकन डॉलर दोन्ही त्यांच्या अलीकडच्या उच्चांकी पातळीवरून खाली आले आहेत, असंही त्यांनी नमूद केलं. मात्र शेवटच्या दिवशी सुधारणा झाली तरी आठवड्याच्या सुरुवातीला डॉलरच्या मूल्यात झालेल्या मोठ्या वाढीमुळे संपूर्ण आठवड्यात सोन्याच्या दरात एकंदरीत घसरणच नोंदवली गेली, असं गांधी म्हणाले.

कोटक सिक्युरिटीजच्या कायनात चेनवाला यांनी सांगितलं की शुक्रवारी स्पॉट गोल्डच्या दरात किंचित वाढ झाली आणि तो पुन्हा एकदा 4,300 डॉलर प्रति औंसच्या पुढे गेला. त्याचवेळी चांदीचे दरही वाढून 65 डॉलरच्या जवळ पोहोचले, ज्यामुळे मागच्या दोन सत्रांतल्या घसरणीतून सावरायला मोठी मदत झाली. अमेरिकन डॉलरमधली नरमाई आणि बाँड यील्डमधल्या तीव्र वाढीनंतर बाँड मार्केटमध्ये आलेली स्थिरता, या दोन्ही गोष्टींनी सोन्याच्या दरातल्या या सुधारणेला चांगला आधार दिला आहे.