हिंमत असेल तर बॅलेट पेपरवर निवडणुका घ्या, प्रणिती शिंदे यांचे भाजपला आव्हान

सोलापूर : देशभरात वेगवेगळ्या मुद्द्यांवरून राजकीय वातावरण तापलेले दिसत आहे. एकीकडे काँग्रेसने सत्ताधाऱ्यांविरोधात आणि निवडणूक आयोगाच्या कारभाराविरोधात आक्रमक भूमिका घेतली आहे. दुसरीकडे भाजपकडून काँग्रेससह विरोधकांवर अराजकता पसरवल्याचा आरोप केला जात आहे. या पार्श्वभूमीवर खासदार प्रणिती शिंदे यांनी सोलापुरातील विविध प्रश्नांवरून भाजप आणि सत्ताधाऱ्यांवर जोरदार टीका केली आहे.

प्रणिती शिंदे यांनी आज, मंगळवारी ३ नोव्हेंबरला, पत्रकार परिषद घेतली. या पत्रकार परिषदेत त्यांनी पंतप्रधान नरेंद्र मोदी, केंद्रीय गृहमंत्री अमित शहा आणि भाजपला थेट आव्हान दिले. "हिंमत असेल तर राजीनामा घेऊन बॅलेट पेपरवर निवडणुका घ्या," असे वक्तव्य त्यांनी केले.

सोलापुरात प्रस्तावित असलेल्या AI डेटा सेंटर प्रकल्पाला त्यांनी तीव्र विरोध दर्शवला. या प्रकल्पासाठी मोठ्या प्रमाणात पाणी लागेल, असा दावा त्यांनी केला. सोलापूरकरांना आताच सहा दिवसांनी एकदा पाणी मिळते, मग हा प्रकल्प आल्यानंतर परिस्थिती काय असेल, असा सवाल त्यांनी विचारला.

उजनी परिसरातील जैवविविधतेवरही या प्रकल्पाचा परिणाम होईल, अशी भीती त्यांनी व्यक्त केली. प्रकल्पातून स्थानिक तरुणांना रोजगार मिळेलच, याची खात्री नाही, असेही त्या म्हणाल्या. प्रकल्पाचे स्वरूप काय आहे आणि त्याचे आर्थिक व्यवहार कसे आहेत, याबद्दलही त्यांनी प्रश्न उपस्थित केले.

सोलापुरातील आरोग्य सुविधांबद्दल बोलताना प्रणिती शिंदे यांनी आरोप केला की, १ नोव्हेंबरपासून महालॅब आणि डायलिसिस सेंटर बंद झाले आहेत. सरकारकडे एक हजार कोटी रुपयांपेक्षा जास्त देणी असल्याचे सांगत त्यांनी रुग्णांच्या आरोग्याचा प्रश्न मांडला.

"संविधान वाचवा, अराजकतेविरोधात या" या घोषणेखाली सत्ताधारी मोर्चा काढत आहेत, यावरूनही त्यांनी टोला लगावला. तरुण विद्यार्थ्यांवर लाठीचार्ज करणारेच आता लोकशाही वाचवण्याच्या गोष्टी करत आहेत, अशी टीका त्यांनी केली. या मोर्चासाठी लोकांना आणण्याचे टार्गेट दिले जात आहे, असाही आरोप त्यांनी केला.

SIR प्रक्रियेवर प्रश्न उपस्थित करत प्रणिती शिंदे यांनी ज्ञानेशकुमार यांच्या राजीनाम्याची मागणी केली. राजीनामा घेऊन बॅलेट पेपरवर निवडणुका घ्या, असे आव्हानही त्यांनी दिले. पंतप्रधान नरेंद्र मोदी यांनी राहुल गांधी यांच्यासोबत खुली चर्चा करावी, अशी मागणीही त्यांनी केली.

AI डेटा सेंटरच्या मुद्द्यावर महाविकास आघाडी एकत्रितपणे भूमिका मांडणार आहे, असे प्रणिती शिंदे यांनी स्पष्ट केले. त्यामुळे सोलापुरातील या प्रकल्पावरून पुढच्या काळात राजकीय संघर्ष आणखी वाढण्याची शक्यता आहे.