जिल्हा बँक निवडणुकीसाठी सर्व पक्षांनी एकत्र यावे, रणजितसिंह मोहिते-पाटील यांचे आवाहन

सोलापूर जिल्हा मध्यवर्ती सहकारी बँकेच्या (DCC) आगामी निवडणुकीची चाहूल लागली आहे आणि जिल्ह्याच्या राजकारणात हालचालींना वेग आला आहे. याच पार्श्वभूमीवर अकलूज येथील शिवरत्न बंगल्यावर एक महत्त्वाची बैठक झाली. राज्याचे माजी उपमुख्यमंत्री विजयसिंह मोहिते-पाटील यांच्या नेतृत्वाखाली झालेल्या या बैठकीला जिल्ह्यातील प्रमुख सहकार नेते आणि कार्यकर्ते उपस्थित होते.

या बैठकीत माजी आमदार रणजितसिंह मोहिते-पाटील यांनी आपली भूमिका मांडली. ती भूमिका संपूर्ण जिल्ह्यात चर्चेचा विषय ठरणार असून सकारात्मक दिशा दाखवणारी ठरेल, असे या बैठकीबद्दल म्हटले जात आहे.

बँक कोणत्याही एका पक्षाची नाही, ती शेतकऱ्यांची आहे, असे रणजितसिंह मोहिते-पाटील यांनी सांगितले. बैठकीत बोलताना ते म्हणाले, "जिल्हा मध्यवर्ती बँक ही केवळ एक बँक नाही, तर ती लाखो शेतकरी, कष्टकरी आणि ग्रामीण अर्थव्यवस्थेचा कणा आहे. माझ्या शेतकरी बांधवाच्या शेतातील पीक याच बँकेच्या कर्जावर उभे राहते. त्यामुळे या निवडणुकीकडे कोणत्याही एका राजकीय पक्षाची प्रतिष्ठेची निवडणूक म्हणून न पाहता, शेतकऱ्यांच्या हिताला सर्वोच्च प्राधान्य देऊन सर्वांनी एकत्रितपणे काम करणे ही काळाची गरज आहे."

सहकार चळवळीने महाराष्ट्राच्या ग्रामीण विकासात मोठा वाटा उचलला आहे, याकडे त्यांनी लक्ष वेधले. विठ्ठलराव शिंदे आणि अभयसिंह मोहिते-पाटील यांच्यासारख्या दिग्गजांनी या सहकाराचा पाया घातला, असे त्यांनी म्हटले. ही गौरवशाली परंपरा जपण्यासाठी राजकीय मतभेद आणि पक्षभेद बाजूला ठेवावेत आणि जिल्ह्यातील सर्व पक्षांच्या नेत्यांनी एका छताखाली यावे, हीच आमची प्रामाणिक भूमिका आहे, असेही त्यांनी स्पष्ट केले.

सोलापूर जिल्ह्यातील सहकार चळवळ अधिक बळकट, पारदर्शक आणि शेतकऱ्यांच्या हिताची करण्यासाठी सर्वांना सोबत घेऊन पुढे जाण्याचा आमचा प्रयत्न राहील, असे आश्वासनही रणजितसिंह मोहिते-पाटील यांनी दिले. त्यांच्या या सर्वांना सामावून घेणाऱ्या भूमिकेचे जिल्हाभरातील सहकार क्षेत्रात स्वागत होत आहे. बँकेच्या निवडणुकीत राजकारणापेक्षा सहकार्याला प्राधान्य मिळावे, अशी अपेक्षा शेतकऱ्यांमधून व्यक्त होत आहे.

दरम्यान, निवडणुकीची घोषणा होताच भारतीय जनता पार्टीच्या वतीने पालकमंत्री जयकुमार गोरे यांच्या नेतृत्वाखाली भाजप आणि समविचारी नेत्यांची स्वतंत्र बैठक झाल्याचे समजते. त्या बैठकीतही DCC बँकेच्या निवडणुकीच्या रणनीतीवर चर्चा झाली.

आता रणजितसिंह मोहिते-पाटील यांनी सर्व पक्षांच्या एकजुटीचे आणि बिनविरोध निवडणुकीचे जे आवाहन केले आहे, त्याला भारतीय जनता पार्टी आणि पालकमंत्री जयकुमार गोरे कसा प्रतिसाद देतात, याकडे सगळ्यांचे लक्ष लागले आहे. राजकीय स्पर्धा बाजूला ठेवून शेतकऱ्यांसाठी सर्व नेते एकत्र येतात का, हा प्रश्न संपूर्ण सोलापूर जिल्ह्यात चर्चेत आहे.

सर्व नेते एकत्र आले तर सोलापूर DCC बँक खऱ्या अर्थाने शेतकऱ्यांची बँक म्हणून अधिक ताकदीने उभी राहील, अशी चर्चा सर्वसामान्य शेतकऱ्यांमध्ये सुरू आहे.