जागतिक रिअल इस्टेट प्रदर्शन सिटीस्केप पहिल्यांदाच भारतात, एप्रिल २०२७ मध्ये मुंबईत

जगातील सर्वात प्रस्थापित रिअल इस्टेट गुंतवणूक व्यासपीठांपैकी एक असलेल्या सिटीस्केपने आज सिटीस्केप इंडियाची घोषणा केली. देशातील ही पहिली आवृत्ती १६ ते १८ एप्रिल २०२७ रोजी मुंबईत जिओ वर्ल्ड कन्व्हेन्शन सेंटरच्या पॅव्हेलियन ३ मध्ये होणार आहे. २५ वर्षांहून अधिक काळाचा वारसा असलेल्या सिटीस्केपचे आयोजन याआधी दुबई, अबू धाबी, रियाध, मनामा, कैरो आणि दोहा या प्रमुख जागतिक बाजारपेठांमध्ये झाले आहे. तिथे आघाडीचे डेव्हलपर्स, गुंतवणूकदार, सरकारी संस्था आणि उद्योगक्षेत्रातील दिग्गज एकत्र आले होते.

सिटीस्केप इंडिया लक्झरी रिअल इस्टेट आणि गुंतवणूक परिसंस्थेवर लक्ष केंद्रित करणार आहे. प्रीमियम देशी आणि आंतरराष्ट्रीय डेव्हलपर्सना एचएनआय, एनआरआय, संस्थात्मक गुंतवणूकदार आणि गंभीर घर खरेदीदार यांच्याशी जोडण्याचा हेतू आहे. नेहमीच्या मालमत्ता प्रदर्शनाऐवजी हा निवडक (curated) गुंतवणूक मंच म्हणून आखला आहे, म्हणजे लोकांना माहिती घेऊन आणि ठाम विश्वासाने गुंतवणुकीचे निर्णय घेता यावेत.

"जगातील सर्वात प्रभावशाली रिअल इस्टेट प्रदर्शन आता भारतात" ही पहिल्या आवृत्तीची थीम आहे. यात ४०+ डेव्हलपर्स आणि सहयोगी भागीदार एकत्र येतील अशी अपेक्षा आहे. हे अनेक दिवस चालणारे, निवडक B2B2C स्वरूपाचे प्रदर्शन आणि परिषद असेल. एक्स्पो फ्लोअरसोबत उच्चस्तरीय परिषद कार्यक्रम, बंद दालनातील गुंतवणूक गोलमेज बैठका, खरेदीदार आणि डेव्हलपर यांच्या भेटीसाठी कॉन्सिअज सेवा, तसेच एनआरआय आणि संस्थात्मक गुंतवणूकदारांसाठी स्वतंत्र ट्रॅक असेल.

प्रदर्शकांमध्ये लक्झरी आणि प्रीमियम निवासी प्रकल्प, गेटेड टाउनशिप आणि एकात्मिक विकास प्रकल्प, हरित, स्मार्ट आणि शाश्वत घरे, व्यावसायिक, मिश्र-वापर आणि रिटेल प्रकल्प, प्रॉपटेक आणि बांधकाम तंत्रज्ञान, तसेच वित्तीय संस्था, बँका आणि गृहवित्त भागीदार असतील. प्रदर्शकांच्या सहभागाचा तपशील योग्य वेळी जाहीर केला जाईल.

भारत ही जगातील सर्वात बारकाईने पाहिली जाणारी रिअल इस्टेट आणि गुंतवणूक बाजारपेठ आहे. वाढती समृद्धी, वाढती जागतिक गतिशीलता आणि भारतीय गुंतवणूकदारांमध्ये सीमापार पोर्टफोलिओंबद्दल वाढणारी आवड यामागे आहे. देशाची आर्थिक राजधानी आणि सर्वात प्रमुख लक्झरी रिअल इस्टेट बाजारपेठ असल्याने मुंबई हे या व्यासपीठाच्या भारतातील पदार्पणासाठी नैसर्गिक ठिकाण आहे.

भारताचे रिअल इस्टेट क्षेत्र २०३० पर्यंत १ ट्रिलियन अमेरिकन डॉलरपर्यंत पोहोचेल असा अंदाज आहे. त्यामुळे ही जगातील सर्वात मोठ्या आणि सर्वात वेगाने वाढणाऱ्या मालमत्ता बाजारपेठांपैकी एक ठरते, आणि निवासी विक्रीत वार्षिक ८% वाढ झाली. एकट्या नवी मुंबईत १३,६१७ घरांची नोंदणी झाली. दर २२% वाढून Rs १४,८०० वरून Rs १८,१०० प्रति चौरस फूट झाले, ही मागील वर्षाच्या तुलनेत ८.९% वार्षिक वाढ आहे. नवीन विमानतळ, ट्रान्स-हार्बर लिंक आणि मेट्रो विस्तारामुळे मार्गिकांचा (corridors) विकास होत आहे. त्यामुळे भारतात येणाऱ्या जागतिक रिअल इस्टेट ब्रँडसाठी मुंबई हे प्रवेशद्वार आहे.

सिटीस्केप इंडिया गर्दीवर नव्हे, तर गुंतवणुकीचा हेतू आणि संवादाच्या दर्जावर आधारित असेल. प्रीमियम देशी आणि आंतरराष्ट्रीय डेव्हलपर्सची निवडक फळी पात्र प्रेक्षकांना भेटेल. बाजारपेठेचा आढावा, जागतिक गतिशीलता आणि पोर्टफोलिओ वैविध्य यावर केंद्रित, गुंतवणूकदारांना प्राधान्य देणारा कार्यक्रम त्याला पाठबळ देईल.

इन्फॉर्मा मार्केट्स इन इंडियाचे व्यवस्थापकीय संचालक योगेश मुद्रास यांनी या शुभारंभाबद्दल सांगितले, "भारताची रिअल इस्टेट बाजारपेठ मोठ्या बदलाची साक्षीदार आहे, ज्यामागे वाढती समृद्धी, गुंतवणूकदारांची वाढती परिपक्वता आणि प्रीमियम मालमत्तांबद्दलची वाढती आवड आहे."

इंडिया सोथबीज इंटरनॅशनल रिअल्टी आणि सीआरई मॅट्रिक्स यांच्या म्हणण्यानुसार, एकट्या मुंबईतील लक्झरी निवासी विभागात २०२६ च्या पहिल्या सहामाहीत Rs १८,५१२ कोटींचे विक्रमी व्यवहार झाले. ही वार्षिक १२% वाढ आहे. मुद्रास यांच्या शब्दांत, ही गती आणि आंतरराष्ट्रीय मालमत्ता बाजारपेठांमध्ये भारतीय गुंतवणूकदारांची वाढती रुची सिटीस्केपसारख्या जागतिक व्यासपीठासाठी आकर्षक संधी निर्माण करते. सिटीस्केप इंडियाचे पदार्पण हे प्रीमियम डेव्हलपर्स, जागतिक भांडवल आणि चोखंदळ गुंतवणूकदारांना जोडण्याच्या दिशेने धोरणात्मक पाऊल आहे, असेही ते म्हणाले.

सिटीस्केप इंडियात प्रीमियम डेव्हलपर्स, एचएनआय, एनआरआय, संस्थात्मक गुंतवणूकदार आणि गंभीर घर खरेदीदार तीन दिवस निवडक चर्चा, बाजारपेठेतील अंतर्दृष्टी आणि गुंतवणुकीच्या संधींसाठी एकत्र येतील.

सिटीस्केपची स्थापना २००२ मध्ये दुबईत झाली. बुर्ज खलिफा आणि लंडनमधील बॅटरसी पॉवर स्टेशन यांसह जगातील काही सर्वाधिक ओळखल्या जाणाऱ्या रिअल इस्टेट प्रकल्पांचे प्रदर्शन त्याने केले आहे. रियाध येथील सिटीस्केप ग्लोबल २०२५ मध्ये चार दिवसांत SAR २३७ अब्ज (US$ ६३.२ अब्ज) चे सौदे आणि व्यवहार नोंदवले गेले. त्यात १२०+ देशांतील १,६४,०००+ उपस्थित आणि ४२ देशांतील ५७७ प्रदर्शक एकत्र आले होते.

दुबईतील सुरुवातीपासून सिटीस्केप सौदी अरेबिया, इजिप्त, कतार आणि बहरीनपर्यंत पोहोचले आहे. कुवेत, भारत आणि मोनॅको या नवीन बाजारपेठा जोडल्या जात आहेत. आपल्या पोर्टफोलिओमध्ये त्याने ५,००,००० हून अधिक उद्योग व्यावसायिकांना आणि १० लाखांहून अधिक कार्यक्रम व डिजिटल अभ्यागतांना जोडले आहे.