उन्हाच्या झळा तीव्र: दुपारच्या शाळेमुळे विद्यार्थ्यांचे हाल, सिंधुदुर्गातील शाळा सकाळी भरवण्याची मागणी

मान्सून परतीच्या वाटेवर असतानाच संपूर्ण महाराष्ट्रात उन्हाचा चटका चांगलाच वाढला आहे. 'ऑक्टोबर हीट'चा तडाखा तीव्र झाला आहे. कोकणातील सिंधुदुर्ग जिल्ह्यात पावसाने ताण दिला असून कडक ऊन पडत आहे. त्यामुळे तापमानाचा पारा दिवसेंदिवस चढतच चालला आहे.

या वाढत्या उन्हाच्या झळांमुळे शाळेत जाणाऱ्या विद्यार्थ्यांचे हाल होत आहेत आणि त्यांच्या आरोग्यावर वाईट परिणाम होत आहे. या पार्श्वभूमीवर सिंधुदुर्ग जिल्ह्यातील शाळा दुपारऐवजी सकाळच्या सत्रात भरवाव्यात, अशी आग्रही मागणी माजी आमदार वैभव नाईक यांनी केली आहे. त्यांनी राज्याचे शालेय शिक्षणमंत्री दादाजी भुसे यांना यासाठी पत्र लिहिले आहे.

वैभव नाईक यांनी शिक्षणमंत्र्यांना लिहिलेल्या पत्रात म्हटले आहे की, सध्या संपूर्ण सिंधुदुर्ग जिल्ह्याचा समावेश दुष्काळाच्या यादीत झाला आहे. जिल्ह्यात पाऊस पूर्णपणे थांबला आहे. कडक उन्हामुळे उकाडा आणि तापमान दिवसेंदिवस वाढत आहे.

सध्या शाळांची वेळ दुपारच्या सत्रातली असल्याने लहान मुलांना भर उन्हातून शाळेत जावे-यावे लागते. त्यामुळे आरोग्याच्या समस्या निर्माण होत आहेत. विद्यार्थी आणि पालकांना या तीव्र उन्हापासून मोठा दिलासा मिळावा, यासाठी जिल्ह्यातील सर्व शाळा तातडीने सकाळच्या सत्रात सुरू कराव्यात, अशी विनंती त्यांनी पत्रात केली आहे. म्हणजेच मुलांना दुपारच्या कडक उन्हातून प्रवास करावा लागू नये, हीच या मागणीमागची भूमिका आहे.

दुसरीकडे, मुंबई आणि आसपासच्या परिसरातही हवामान खात्याने (IMD) पुढील 3 दिवस उष्णतेची लाट येण्याचा अंदाज वर्तवला आहे. गेल्या काही दिवसांत मुंबईत तापमानाचा पारा 37 अंश सेल्सिअसच्या वर गेला आहे. त्यामुळे नागरिक प्रचंड उकाड्याने त्रस्त झाले आहेत.

3 ते 5 ऑक्टोबरपर्यंत मुंबई, ठाणे आणि रायगड जिल्ह्यांत प्रचंड दमट आणि तीव्र उष्ण हवामान राहण्याची शक्यता वर्तवण्यात आली होती. आता हवामान विभागाने 7 ऑक्टोबरपासून ठाणे आणि मुंबई परिसरात हवामान मुख्यत्वे कोरडे राहण्याचा अंदाज व्यक्त केला आहे.

हवामान तज्ज्ञांच्या म्हणण्यानुसार, तापमान आणि हवेतील आर्द्रता अचानक वाढल्याचा माणसाच्या शरीराच्या तापमान नियंत्रण प्रणालीवर थेट आणि विपरीत परिणाम होऊ शकतो. सध्या दिवसा तीव्र आणि कडक सूर्यप्रकाश असतो, तर रात्री सौम्य गारवा जाणवतो. अशा विषम वातावरणामुळे हवेतील दमटपणा म्हणजेच आर्द्रता खूप वाढली आहे.