शिवाजी पार्कवर CJP चे जेलभरो आंदोलन, ज्ञानेश कुमार यांच्या राजीनाम्याची मागणी

मुख्य निवडणूक आयुक्त ज्ञानेश कुमार यांनी राजीनामा द्यावा, या मागणीसाठी २ ऑक्टोबर रोजी मुंबईतल्या शिवाजी पार्क मैदानावर सीजेपीच्या वतीने जेलभरो आंदोलन झाले. सरकार आणि निवडणूक आयोगाच्या विरोधात आंदोलकांनी जोरदार घोषणाबाजी केली. "ज्ञानेश कुमार, राजीनामा द्या" अशा घोषणा त्यांनी दिल्या. मुंबईतले आजचे आंदोलन संपले असून आता दिल्लीत जंतरमंतरवर आंदोलन करण्याचा इशारा देण्यात आला आहे.

कॉक्रोच जनता पार्टीचे अभिजीत दीपके यांनी या वेळी भाषण केले. त्यांनी पंतप्रधान मोदी, गृहमंत्री अमित शाह, निवडणूक आयुक्त ज्ञानेश कुमार आणि मुख्यमंत्री देवेंद्र फडणवीस यांच्यावर जोरदार टीका केली. फडणवीस यांना उद्देशून ते म्हणाले, की तुम्ही तीन दिवस जेलमध्ये टाकायचे म्हणालात, पण तीन महिने म्हणाला असतात तर मुंबई बंद पडली असती. तुमची खुर्ची आधीच धोक्यात आहे, असे सांगून त्यांनी फडणवीस यांना मोठा इशारा दिला. तुमच्या खुर्चीचा एक पाय फेव्हिकॉलचा आहे, तर दुसरा फेव्हिस्टीकने चिकटवलेला आहे, असे ते म्हणाले.

हक्कांसाठी लढणे हीच महात्मा गांधींना खरी श्रद्धांजली आहे, असे सीजेपीचे अध्यक्ष अभिजित दीपके यांनी म्हटले. इंग्रजांपेक्षा संघी लोकांनी देशवासीयांना जास्त त्रास दिला, असा गंभीर आरोपही त्यांनी केला. पंतप्रधान नरेंद्र मोदी अमेरिकेला जातात तेव्हा अनेकदा असे म्हटले जाते की ते गांधींच्या देशातून आले आहेत, असे सांगून दीपके म्हणाले, की महात्मा गांधी हे या देशाचा आत्मा आहेत, डॉ. बाबासाहेब आंबेडकर कणा आहेत आणि पं. जवाहरलाल नेहरू मेंदू आहेत. भाजपवर टीका करताना त्यांनी आरोप केला, की "एक देश, एक निवडणूक" ही केवळ घोषणा आहे आणि प्रत्यक्षात भाजपला "एक देश, एक पक्ष" हवा आहे.

महात्मा गांधी यांचे पणतू तुषार गांधी यांनीही आंदोलनात बोलताना मुंबई कधीही मागे राहत नाही, असे सांगितले. हे आंदोलन जंतरमंतरपेक्षा कमी नाही, असे ते म्हणाले. जय जवान जय किसान ही घोषणा लाल बहादूर शास्त्री यांनी दिली होती, याची त्यांनी आठवण करून दिली. सध्या देशातले तरुण जागे झाले आहेत, लोकशाही वाचवण्यासाठी ही मोहीम सुरू ठेवू, असे तुषार गांधी यांनी म्हटले.

अभिनेत्री शबाना आझमी यांनी उपस्थितांचे मनापासून स्वागत केले. मी मुंबईची असल्यामुळे तुम्हाला इतक्या मोठ्या संख्येने पाहून मला खूप आनंद होत आहे, असे त्या म्हणाल्या. आपले मत हा आपला हक्क आणि आपला आवाज आहे, असे सांगून त्यांनी सवाल केला, की आपली नावे मतदार यादीतून काढली गेली तर आपण काय करणार?

मुंबई पोलिसांनी आमच्या आंदोलनाला शांततेने करण्याची परवानगी दिली, मुंबई हा फक्त ट्रेलर आहे, असे दीपके यांनी सांगितले. तुम्हाला जे करायचे ते करा, आम्ही अंतिम सामना जंतरमंतरवर खेळू, असेही ते म्हणाले.

अभिनेते नसरुद्दीन शाह आणि शर्लिन चोपडा यांनीही आंदोलनात सहभागी होऊन पाठिंबा दिला. नसरुद्दीन शाह यांनी दीपके यांचे कौतुक केले, तर मी तुमचा मोठा फॅन आहे, असे अभिजीत दीपके यांनी या वेळी म्हटले. शिवाजी पार्क परिसरात तरुणांची मोठी गर्दी जमली होती.

संगीतकार विशाल ददलानी हेही आंदोलनात सहभागी झाले. निवडणूक आयोगाने माझाही अर्ज बाद केला, असे ते म्हणाले. जंतरमंतरवरच्या आंदोलनानंतर ते पुन्हा शिवाजी पार्कमध्ये आले होते. त्यांनी गाणे म्हणत ज्ञानेश कुमार यांच्या राजीनाम्याची मागणी केली. या वेळी त्यांनी "मेरा रंग दे बसंती चोला" हे गाणे म्हटले.