सरनाईकांच्या विजयाची जबाबदारी आमची, शिक्षकांचे प्रश्न सोडवू: उपमुख्यमंत्री शिंदे

अमरावती विभाग शिक्षक मतदारसंघातील महायुतीचे उमेदवार किरण सरनाईक यांनी शाळा आणि शिक्षकांसाठी केलेल्या कामाचा कार्यपूर्ती अहवाल प्रसिद्ध करण्यात आला. काम केले असेल तरच कार्यपूर्ती अहवाल छापण्याची हिंमत होते, असे उपमुख्यमंत्री एकनाथ शिंदे यांनी म्हटले. सरनाईक यांनी वचननाम्यात दिलेली आश्वासने पूर्ण करण्याची जबाबदारी आमची आहे, आणि शिक्षकांच्या प्रश्नांना सरकार प्राधान्य देईल, अशी स्पष्ट ग्वाही त्यांनी दिली.

अमरावती येथे सरनाईक यांच्या प्रचारासाठी आयोजित जाहीर सभेत शिंदे बोलत होते. अंबामातेचे दर्शन घेऊन आपण अमरावतीत आलो आहोत, असे सांगत त्यांनी सभेला उपस्थित मंत्री, खासदार, आमदार, माजी आमदार, महायुतीचे पदाधिकारी आणि शिक्षकांचे स्वागत केले.

शिंदे यांच्या म्हणण्यानुसार, किरण सरनाईक यांनी मतदारसंघातील प्रत्येक शाळेला भेट देऊन विकासासाठी निधी उपलब्ध करून दिला. त्यामुळे त्यांचा वचननामा हा केवळ आश्वासनांचा दस्तऐवज नाही. तो केलेल्या कामाचा कार्यपूर्ती अहवाल आहे आणि पुढील कामांचा कृतीनिश्चयही आहे, असे उपमुख्यमंत्री म्हणाले.

जुन्या पेन्शनचा प्रलंबित प्रश्न असो किंवा दीर्घकाळ सेवा केलेल्या शिक्षकांशी संबंधित परीक्षा आणि सेवाशर्तींचे प्रश्न असोत, सरकार ते सकारात्मकतेने सोडवेल, असे शिंदे यांनी सांगितले. शिक्षकांवर अशैक्षणिक कामांचा अतिरिक्त भार टाकू नये, त्यांना अध्यापन आणि विद्यार्थी घडविण्यावर लक्ष केंद्रित करता आले पाहिजे, अशी भूमिका त्यांनी मांडली. अल्पसंख्याक शाळा, आश्रमशाळा, दिव्यांग शाळा आणि सामाजिक न्याय विभागाशी संबंधित प्रश्नांवरही सरकार काम करेल, असेही त्यांनी सांगितले.

दुष्काळाच्या पार्श्वभूमीवर शेतकऱ्यांच्या मदतीचा उल्लेख करताना शिंदे म्हणाले की, दुष्काळ जाहीर करून शासनाच्या सवलतींचा लाभ शेतकऱ्यांना दिला जाईल. "सत्कार करण्याची वेळ नाही, बळीराजाच्या पाठीशी उभे राहण्याची वेळ आहे," असे ते म्हणाले.

विरोधकांवर टीका करताना शिंदे यांनी सांगितले की, महायुती सरकार सर्वसामान्य, शेतकरी, कष्टकरी, वारकरी, महिला आणि शिक्षकांसाठी काम करीत आहे. शिक्षकांचा आवाज सभागृहात प्रभावीपणे मांडण्यासाठी हक्काचा शिक्षक आमदार आवश्यक आहे, असे सांगून त्यांनी २३ ऑक्टोबरला किरण सरनाईक यांना मतदान करून विजयी करण्याचे आवाहन केले.

"दसऱ्याच्या सीमोल्लंघनापूर्वीच तुम्ही आज राजकीय सीमोल्लंघन केले आहे. दिवाळीपूर्वी सरनाईक यांच्या विजयाचे फटाके फोडायचे आहेत," असे शिंदे म्हणाले. निकालाच्या दिवशी विजयाचा गुलाल उधळण्यासाठी आपण अमरावतीत उपस्थित राहू, अशी ग्वाहीही त्यांनी दिली.

या वेळी आमदार रवी राणा, माजी खासदार नवनीत राणा, आमदार संजय कुटे, आमदार किशोरआप्पा पाटील, युवा स्वाभिमान पक्षाच्या उमेदवार ॲड. प्रीती रेवणे, शिवसेना जिल्हाप्रमुख आशिष धर्माळे, शिवसेना अमरावती जिल्हाप्रमुख सुनील डीके, अमरावती शहरप्रमुख संतोष भदे, सह-संपर्कप्रमुख श्याम देशमुख आणि शिवसेनेचे इतर सर्व प्रमुख पदाधिकारी व कार्यकर्ते मोठ्या संख्येने उपस्थित होते.