विलिनीकरणावर शरद पवारांची स्पष्ट भूमिका, "यायचं असेल तर आमच्यासोबत या"

राष्ट्रवादी काँग्रेसमध्ये विलिनीकरण होणार का, याबाबत गेल्या काही दिवसांपासून राजकीय वर्तुळात जोरदार चर्चा सुरू होती. दोन्ही राष्ट्रवादी गट एकत्र येणार असल्याची तसेच शरद पवारांचा गट NDA सोबत जाणार असल्याचीही बोलणी सुरू होती. या पार्श्वभूमीवर राष्ट्रवादी काँग्रेसच्या बैठकीत बोलताना शरद पवारांनी स्वतःच आपली भूमिका स्पष्ट केली. "आम्ही कुठेही जाणार नाही, आम्ही कुणासोबतही जाणार नाही. यायचं असेल तर आमच्यासोबत या," असे शरद पवार म्हणाले.

शरद पवारांच्या या वक्तव्यानंतर पक्षाचे प्रदेशाध्यक्ष शशिकांत शिंदे यांनीही पक्षाची भूमिका मांडली. विलिनीकरण करायचे झाल्यास ते शरद पवारांच्या राष्ट्रवादी काँग्रेसमध्येच व्हावे, असे शशिकांत शिंदे म्हणाले. शशिकांत शिंदे यांच्या मते, दोन्ही राष्ट्रवादींच्या विलिनीकरणाची चर्चा आधीही झाली होती. अजित पवार हयात असताना यासंदर्भात काही मुद्दे निश्चित झाले होते आणि शरद पवारांच्या सूचनेनुसार पुढची प्रक्रिया करण्याचे ठरले होते. मात्र अजित पवारांच्या निधनानंतर हा विषय मागे पडला आणि त्यानंतर विलिनीकरणाबाबत सतत चर्चा सुरूच राहिली, ज्यामुळे कार्यकर्त्यांमध्ये अस्वस्थता असल्याचे चित्र रंगवले जात होते. आता शरद पवारांनी स्वतः भूमिका स्पष्ट केल्याचे शशिकांत शिंदे यांनी सांगितले. विलिनीकरणाचा मुद्दा सतत चर्चेत ठेवण्याची गरज नसून, ज्यांना विलीन व्हायचे आहे त्यांनी शरद पवारांच्या राष्ट्रवादीत यावे, हीच भूमिका असल्याचे शशिकांत शिंदे यांनी स्पष्ट केले.

दुसरीकडे, शरद पवार आणि भाजपच्या वरिष्ठ नेत्यांमध्ये झालेल्या भेटींमुळे तसेच पंतप्रधान नरेंद्र मोदी यांच्यासोबतच्या भेटीगाठींमुळे शरद पवारांचा पक्ष NDA सोबत जाणार असल्याच्याही चर्चा रंगल्या होत्या. "आम्ही कुणासोबतही जाणार नाही, यायचं असेल तर आमच्यासोबत या," या त्यांच्या वक्तव्यातून या चर्चांनाही उत्तर मिळाल्याचे मानले जात आहे. या वक्तव्याचा अप्रत्यक्ष रोख उपमुख्यमंत्री सुनेत्रा पवार आणि त्यांच्या गटाकडे असल्याची चर्चा राजकीय वर्तुळात सुरू आहे, मात्र त्याचा नेमका अर्थ काय याबद्दल वेगवेगळी मते व्यक्त होत आहेत.

शरद पवारांच्या वक्तव्यावर अजित पवार यांच्या राष्ट्रवादीचे प्रदेशाध्यक्ष सुनील तटकरे यांनीही प्रतिक्रिया दिली. शरद पवार गेल्या 6 दशकांपासून देशाच्या राजकारणात असून त्यांच्या वक्तव्याचा अर्थ अनेकदा लगेच स्पष्ट होत नाही, त्यामुळे याचे उत्तर काळाच्या ओघात मिळेल, असे सुनील तटकरे म्हणाले. दुष्काळी परिस्थितीबाबतच्या शासन निर्णयावर शरद पवारांनी नाराजी व्यक्त केल्याच्या मुद्द्यावरही तटकरे बोलले. सरकारने दुष्काळाच्या पार्श्वभूमीवर पावले उचलली असून महायुती सरकार संवेदनशील आहे, ट्रिगर 1 नुसार दुष्काळी तालुक्यांची पहिली आकडेवारी जाहीर झाली असून केंद्राकडूनही मदत अपेक्षित असल्याचे तटकरे यांनी सांगितले. शेतकऱ्यांची बाजू सरकारसमोर मांडणे हा शरद पवारांचा स्वभाव असल्याचेही तटकरे म्हणाले.

सुप्रिया सुळे यांनी आपण लढण्याच्या भूमिकेत असल्याचे म्हटल्याच्या चर्चेवर सुनील तटकरे यांनी सांगितले की, आपण ते वक्तव्य ऐकलेले नाही आणि सुप्रिया सुळे यांनी नेमक्या कोणत्या मुद्द्यावर ही भूमिका मांडली हे समजून घेणे गरजेचे आहे. राज्यात आणि देशात अनेक प्रश्न असल्याने 'लढणे' म्हणजे लोकांच्या प्रश्नांसाठी लढणे, असाही अर्थ होऊ शकतो, असे तटकरे म्हणाले.

दरम्यान, शशिकांत शिंदे यांनी राज्यातील विविध प्रश्नांवर महाविकास आघाडीतील सर्व पक्षांनी एकत्र येऊन आंदोलन करण्याची गरज असल्याचे मत मांडले. सर्व विरोधी पक्षांनी एकत्रित आंदोलन केल्यास त्याचा परिणाम अधिक प्रभावी होईल, असे ते म्हणाले. ठाकरे गटाकडून मुख्य निवडणूक आयुक्त ज्ञानेश कुमार यांच्याविरोधात 4 ऑक्टोबरला काढण्यात येणाऱ्या मोर्चाबाबत बोलताना, राष्ट्रवादी काँग्रेसला अद्याप कोणतेही निमंत्रण आलेले नसल्याचे शशिकांत शिंदे यांनी स्पष्ट केले, मात्र निमंत्रण आल्यास त्यावर विचार केला जाईल, असेही ते म्हणाले.