राज ठाकरे आणि राहुल गांधी यांच्यात संवाद सुरू असल्याचा संजय राऊत यांचा दावा

महाराष्ट्र नवनिर्माण सेनेचे (मनसे) अध्यक्ष राज ठाकरे आणि काँग्रेसचे नेते राहुल गांधी यांच्यात थेट संवाद सुरू आहे, असा दावा ठाकरे गटाचे खासदार संजय राऊत यांनी केला आहे. आज सकाळी माध्यमांशी बोलताना त्यांनी हे सांगितले. "सर्व विरोधी पक्षांमधील प्रमुख नेत्यांमध्ये असा संवाद का असू नये?" असा थेट सवालही राऊत यांनी विचारला.

केंद्र सरकार आणि केंद्रीय निवडणूक आयुक्तांच्या विरोधात देशभरातून विरोधाचे सूर उमटू लागले आहेत. ज्ञानेश कुमार यांच्या राजीनाम्याची मागणी वाढत आहे आणि निवडणूक आयोगाविरोधात देशभरातील विरोधी पक्ष एकवटल्याचे दिसत आहे. अशा वेळी राऊत यांच्या या दाव्यामुळे देशात नवी राजकीय समीकरणे तयार होण्याची शक्यता व्यक्त केली जात आहे.

आजचे आंदोलन हे राहुल गांधी यांनी सुरू केलेल्या आंदोलनाचाच एक भाग आहे, असे राऊत यांनी सांगितले. माजी मुख्यमंत्री ममता बॅनर्जी याही आता बैठकीला येत आहेत आणि त्यांच्याशीही संवाद सुरू आहे, असे ते म्हणाले. आजच्या बैठकीचा अजेंडा मुख्य निवडणूक आयुक्त ज्ञानेश कुमार यांच्या गैरकारभाराविरोधातील आहे, असेही त्यांनी सांगितले.

शरद पवार यांच्या एनडीए प्रवेशाबद्दल विचारले असता राऊत म्हणाले की, पवार यांनीच "आम्ही कुठेही जाणार नाही, ज्यांना यायचे आहे त्यांनी आमच्यासोबत यावे" असे म्हटले आहे. त्यामुळे ते कुठेही जाणार नाहीत, असे राऊत यांचे म्हणणे आहे. शरद पवार हे महाविकास आघाडी आणि इंडिया आघाडीचे प्रमुख नेते आहेत आणि त्यांच्या नेतृत्वाखालील मूळ राष्ट्रवादी कुठेही जाणार नाही, असेही ते म्हणाले.

पवार यांच्या भाजप नेत्यांसोबतच्या भेटींबद्दल विचारल्यावर राऊत म्हणाले की, सहकार क्षेत्र, बँकिंग किंवा कौटुंबिक कारणांसाठीही राजकीय नेत्यांच्या भेटीगाठी होत असतात आणि त्यात राजकारण आणणे चुकीचे आहे. शरद पवार यांचा मूळ पक्ष महाविकास आघाडीसोबत पूर्ण ताकदीने विरोधी आघाडीतच ठाम राहील, असे त्यांनी ठामपणे सांगितले.

राज्यातील दुष्काळाबद्दल बोलताना राऊत म्हणाले की, कर्ज काढण्यापेक्षा कॅबिनेट मंत्री आणि इतर मंत्र्यांना ५००-५०० कोटींची ठेकेदारी देऊन दलाली वसूल केली गेली. सरकार जनतेला खर्च कमी करायला सांगत आहे, पण सरकारनेच खर्च कमी करावा, असे ते म्हणाले. वारंवार चार्टर्ड प्लेनने दिल्लीला जाणे कशासाठी, आणि ५० कोटी, १०० कोटींना आमदार-खासदार विकत घेणे कशासाठी, असा सवाल करून तो खर्च कमी करून दुष्काळग्रस्तांना द्या, हे अधिक सोपे आहे, असे राऊत यांनी म्हटले. कर्ज काढून सण साजरे करणे ही तिजोरीची लूट आहे, असेही ते म्हणाले. लाडकी बहीण योजनेच्या नावाखाली पुरुषांनाही लाभ दिला गेला, तिथे खर्च कमी करा, असा टोलाही त्यांनी लगावला.

पंतप्रधान नरेंद्र मोदी यांच्या बारामती दौऱ्यांबद्दल विचारण्यात आले. त्यावर राऊत म्हणाले, "मोदीजी बारामतीला येतात-जातात, ती त्यांची ट्रॅव्हलिंग कंपनी आहे आणि ते फ्री तिकिटे वाटत असतात." अजित पवार किंवा एकनाथ शिंदे यांचे पक्ष त्यांचे स्वतःचे नसून ते गृहमंत्री अमित शाह यांचे पक्ष आहेत, असे राऊत म्हणाले. अमित शाह दिल्लीच्या राजकारणात नसतील तेव्हा या पक्षांचे भवितव्य काय असेल, यावर त्यांनी चिंतन बैठक घेतली पाहिजे, असे राऊत यांनी सांगितले. भविष्यात नरेंद्र मोदीच हे सगळे पक्ष बुडवतील, असा टोलाही राऊत यांनी लगावला.