लग्नाचं आमिष दाखवून महिलेला २० लाखांचा गंडा; 'गुजरात गँग'चे सात आरोपी अटकेत

नागपूर. ऑनलाइन ओळखीतून लग्नाचं आमिष दाखवून एका महिलेला २० लाख रुपयांचा गंडा घालण्यात आला आहे. या प्रकरणात क्राइम ब्रांचच्या युनिट ३ ने अनेक राज्यांत पसरलेल्या 'गुजरात गँग'चा पर्दाफाश केला आहे. या टोळीतील सात आरोपींना आता अटक करण्यात आली आहे.

अटक केलेल्यांमध्ये जयेश अमृत ठाकूर (२०), यशपाल आमसिंह चौहान (२४), कुलदीप सिंह विक्रम जडेजा (२६), राजेंद्र सिंह राणा वाघेला (३४), नरपत बाबू सिंह (२७), उपेंद्र नागजीभाई जोशी (२८) आणि भानुसिंह जसवंतसिंह वाघेला (२९) यांचा समावेश आहे. हे सगळे जण गुजरातचे रहिवासी आहेत. त्यांचा हवाला रॅकेटशीही संबंध असल्याचा संशय आहे.

तक्रारदार महिला ५० वर्षांची आहे. व्हॉट्सअॅपवरून तिची ओळख कथित मो. विशाल चोपडा याच्याशी झाली. आपण यूकेमध्ये राहतो, असं चोपडानं तिला सांगितलं. आपला सोन्याचा आणि गारमेंटचा मोठा व्यवसाय असल्याचंही त्यानं सांगितलं. भारतात येऊन राहायची त्याची इच्छा आहे आणि इथे लग्न करायचाही विचार आहे, असं सांगून त्यानं महिलेला लग्नाचं आमिष दाखवलं.

एवढ्यावरच तो थांबला नाही. महिलेला व्हिडिओ कॉल करून त्यानं आपलं कथित घरही दाखवलं. आपण दिल्लीला पोहोचत असल्याचं सांगून, आपल्याजवळ ७० तोळे सोनं आणि ७० हजार डॉलर असल्याची माहितीही त्यानं महिलेला दिली.

त्यानंतर महिलेला एका कथित कस्टम अधिकाऱ्याचा फोन आला. चोपडाला पकडल्याचं त्यानं सांगितलं. चोपडाच्या सुटकेच्या बदल्यात महिलेकडून २० लाख रुपये उकळण्यात आले. एवढी रक्कम दिल्यानंतरही पुन्हा २५ लाख रुपयांची मागणी करण्यात आली.

आपली फसवणूक होत असल्याचा संशय आल्यावर महिलेनं गणेशपेठ पोलीस स्टेशनमध्ये तक्रार दिली. पोलिसांनी गुन्हा दाखल केला. त्यानंतर क्राइम ब्रांचनं तपास सुरू केला आणि आरोपींना अटक केली.

हे आरोपी बऱ्याच काळापासून फसवणुकीचं रॅकेट चालवत असल्याचा आरोप आहे. घटस्फोटित किंवा विधवा महिलांना ते जाळ्यात ओढतात, असंही सांगितलं जातं. बदनामीच्या भीतीमुळे अशा फसवणुकीतले पीडित तक्रार दाखल करत नाहीत. आता आरोपींच्या चौकशीत आणखी अनेक गोष्टी उघड होऊ शकतात.