Segway ची MUXI Pro इलेक्ट्रिक कार्गो बाईक अमेरिकेत दाखल, 73 मैल रेंज आणि 750W मोटर
सामान वाहून नेण्यासाठी तयार करण्यात आलेली Segway ची नवी शॉर्ट-टेल कार्गो ई-बाईक MUXI Pro अमेरिकन मार्केटमध्ये लाँच झाली आहे.
Segway कंपनीने अमेरिकन मार्केटसाठी MUXI Pro नावाची नवी शॉर्ट-टेल कार्गो इलेक्ट्रिक बाईक सादर केली आहे. रोजचा प्रवास, ऑफिसला जाणे-येणे किंवा सामानाची ने-आण या सगळ्यासाठी ही ई-बाईक तयार करण्यात आली असून जुन्या MUXI मॉडेलच्या तुलनेत यात अनेक नवीन फीचर्स जोडण्यात आले आहेत. या बाईकची किंमत 1,999.99 डॉलर इतकी ठेवण्यात आली असून सध्या ती अमेरिकेत उपलब्ध आहे.
राइडिंग कम्फर्टच्या बाबतीत बोलायचं झालं तर MUXI Pro मध्ये 9-स्पीड इलेक्ट्रॉनिक ऑटो-शिफ्टिंग सिस्टीम देण्यात आली आहे. सोबतच 70 mm ट्रॅव्हल असलेले फ्रंट सस्पेन्शन आणि टर्न इंडिकेटर्सही या बाईकमध्ये मिळतात. फ्रंट आणि रिअर फेंडर्स स्टँडर्ड फीचर म्हणून देण्यात आले आहेत. बाईकची स्टँडओव्हर हाइट कमी ठेवण्यात आली असून राइडिंग पोझिशन सरळ आहे. तसंच सेंटर ऑफ ग्रॅव्हिटी लो ठेवण्यात आल्यामुळे सामान घेऊन बाईक चालवतानाही स्थिरता मिळावी, यावर कंपनीने भर दिला आहे.
पॉवरच्या बाबतीत MUXI Pro मध्ये 750W ची मोटर बसवण्यात आली असून ही मोटर 80 Nm इतका टॉर्क तयार करते. या बाईकमध्ये Adaptive Assist आणि Algorithm 2.0 हे तंत्रज्ञान वापरण्यात आले असून त्यामुळे गरजेनुसार मोटरची मदत बदलत राहते. चढावर जास्त पॉवर द्यायची असेल तेव्हा ही सिस्टीम जास्त ताकद देते आणि त्याचवेळी अनावश्यक ऊर्जेचा वापर कमी करण्याचा प्रयत्न करते. कंपनीने दिलेल्या माहितीनुसार एका फुल चार्जमध्ये ही बाईक 73 मैलांपर्यंत रेंज देऊ शकते.
सेफ्टीच्या दृष्टीने या बाईकमध्ये Hill Descent Control, Regenerative Braking, Hill-Start Assist आणि Traction Control System अशी फीचर्स समाविष्ट करण्यात आली आहेत. यामुळे उतारावर, चढावर तसंच घसरड्या रस्त्यावर बाईकवर नियंत्रण ठेवणं सोपं जातं असं सांगितलं जातं. यासोबतच स्मार्ट टेक्नॉलॉजीच्या यादीत Apple Find My, AirLock, Lost Mode, HD TFT डिस्प्ले, ऑटो हेडलाइट्स आणि OTA अपडेट्स यांचा समावेश आहे.
सामान वाहून नेण्याच्या दृष्टीने या ई-बाईकसोबत पॅसेंजर किट, फ्रंट बास्केट आणि मिडल बास्केट असे अॅक्सेसरीज पर्यायही उपलब्ध करून देण्यात आले आहेत. त्यामुळे रोजच्या ऑफिस कम्यूटसोबतच किराणा किंवा इतर सामान नेण्यासाठीही ही बाईक उपयोगी ठरू शकते. सध्या MUXI Pro ची विक्री अमेरिकेतील Segway च्या डीलर्सकडून तसंच कंपनीच्या अधिकृत ऑनलाइन स्टोअरमधून केली जात आहे.
