SBI कडून edX वर मोफत ऑनलाईन कोर्सेस, AI ते फायनान्सपर्यंत शिकण्याची संधी
भारतीय स्टेट बँकेने edX या प्लॅटफॉर्मवर AI, मार्केटिंग आणि फायनान्स क्षेत्रातील अनेक कोर्सेस मोफत उपलब्ध करून दिले आहेत.
फक्त पदवीच्या जोरावर आजकाल नोकरी मिळवणं आणि करिअर घडवणं अवघड झालंय. त्यामुळे नवीन कौशल्ये शिकणं ही काळाची गरज बनली आहे. हीच गरज लक्षात घेऊन भारतीय स्टेट बँकेने 'edX' या प्लॅटफॉर्मवर वेगवेगळे ऑनलाईन कोर्सेस उपलब्ध करून दिले आहेत. आर्टिफिशियल इंटेलिजन्स, जेनेरेटिव्ह AI, मार्केटिंग, पर्सनल ब्रँडिंग, फायनान्स आणि बँकिंग अशा महत्त्वाच्या विषयांचा यात समावेश आहे.
या कोर्सेसचं खास वैशिष्ट्य म्हणजे ते 'ऑडिट' पद्धतीने कोणतीही फी न भरता शिकता येतात. मात्र ज्यांना व्हेरीफाइड सर्टिफिकेट हवं असेल, त्यांना त्यासाठी शुल्क भरावं लागेल.
AI आणि जेनेरेटिव्ह AI शी संबंधित कोर्सेसमध्ये 'AI and Generative AI for Business Automation' हा कोर्स महत्त्वाचा आहे. बिझनेस प्रक्रिया सुधारण्यासाठी AI आणि जेनेरेटिव्ह AI कसं वापरायचं, हे इथे शिकवलं जातं. या कोर्ससाठी कोडिंग किंवा टेक्निकल बॅकग्राउंडची गरज नाही. यासोबतच 'Generative AI and its Applications in Finance' आणि 'Introduction to Machine Learning for Finance' हे कोर्सेसही उपलब्ध आहेत.
डिजिटल मार्केटिंग किंवा कंटेंट क्रिएशनमध्ये इंटरेस्ट असणाऱ्यांसाठी 'Content Marketing Strategy' हा कोर्स आहे. डिजिटल मार्केटिंग इकोसिस्टम कसं काम करतं, कंटेंट कसं तयार करायचं, ते प्रमोट कसं करायचं आणि ग्राहकांपर्यंत कसं पोहोचवायचं, हे यात शिकवलं जातं. याशिवाय 'Relationship Marketing Strategy for Financial Services' आणि 'Marketing Psychology for Financial Services' हे कोर्सेसही लिस्टमध्ये आहेत.
फायनान्समध्ये रस असणाऱ्यांसाठी 'Introduction to Behavioural Finance', 'Financial Markets and Products', 'Ratio Analysis Fundamentals' आणि 'Financial Management of Enterprise - For Beginners' असे अनेक पर्याय उपलब्ध आहेत. 'Behavioural Finance' या कोर्समध्ये माणसाची विचारसरणी आणि भावनिक निर्णयक्षमता फायनान्शियल मार्केटवर कसा परिणाम करते, हे शिकवलं जातं.
SBI ने पर्सनल ब्रँडिंगचा कोर्सही उपलब्ध करून दिला आहे. यात पर्सनल ब्रँड आणि सामान्य ब्रँडमधला फरक, त्याची गरज आणि तो घडवण्यासाठी लागणारी कौशल्ये शिकवली जातात. हा कोर्स २५ सप्टेंबर ते ३० डिसेंबर २०२६ या काळात चालणार आहे.
या कोर्सेसचा सगळ्यात मोठा फायदा म्हणजे विद्यार्थी आणि नोकरी करणारे लोक आपल्या अभ्यासासोबत किंवा जॉबसोबतच घरबसल्या, स्वतःच्या सोयीनुसार नवीन कौशल्ये शिकू शकतात. SBI च्या माहितीनुसार edX वरची ही कोर्स लिस्ट खूप मोठी असून त्यात बँकिंग, फायनान्स, मार्केटिंग, टेक्नॉलॉजी आणि लीडरशिपशी संबंधित अनेक विषयांचा समावेश आहे.
