सातारा झेडपीच्या मॉडेल स्कूलमध्ये शिक्षकांची वानवा, राष्ट्रवादीच्या धस्केंचा आंदोलनाचा इशारा

सातारा जिल्हा परिषदेच्या वर्णे गटातील अंगापूर, वर्ये आणि अपशिंगे या तीन मॉडेल स्कूलवर लाखो रुपये खर्च होत असताना, त्या शाळांमध्ये विद्यार्थ्यांना शिकवायला पुरेसे शिक्षकच नसल्याचा गंभीर आरोप गुरुवारी झालेल्या पत्रकार परिषदेत करण्यात आला. राष्ट्रवादी काँग्रेस पार्टी शरदचंद्र पवार पक्षाचे प्रदेश सरचिटणीस प्रवीण धस्के यांनी हा आरोप केला आणि तिन्ही शाळांना तातडीने शिक्षक उपलब्ध करून दिले नाहीत, तर तीव्र आंदोलन उभारण्याचा इशाराही दिला.

धस्के यांनी दिलेल्या माहितीनुसार, अपशिंगे येथील शाळेत ४६८ विद्यार्थी शिकतात, अंगापूर येथे सुमारे २०० तर वर्णे येथील शाळेत २५० विद्यार्थी आहेत. एवढ्या मोठ्या विद्यार्थी संख्येसाठी तिन्ही शाळा मिळून नऊ शिक्षकांची गरज असताना प्रत्यक्षात फक्त पाच शिक्षक काम करत आहेत. यामुळे मुलांच्या शिक्षणाच्या दर्जावर परिणाम होत असल्याचा दावा त्यांनी केला.

हा प्रश्न आपण आधीच प्रशासनाकडे मांडल्याचंही धस्के यांनी सांगितलं. जिल्हा परिषदेच्या मुख्य कार्यकारी अधिकारी यशनी नागराजन यांच्याकडे दिशा समितीच्या बैठकीत दोन वेळा हा मुद्दा उपस्थित केला, तर प्राथमिक शिक्षणाधिकारी नायकवडी यांच्याकडे तीन वेळा बैठकांमधून शिक्षक द्या अशी मागणी केली. तरीही अजून एकही शिक्षक मिळाला नसल्याचा आरोप त्यांनी केला.

याशिवाय जिल्हा परिषदेच्या स्मार्ट स्कूल योजनेत या तिन्ही शाळांचा समावेश असूनही, त्यांना केंद्रप्रमुख आणि विस्तार अधिकारी अजून मिळालेले नाहीत, असा मुद्दाही धस्के यांनी मांडला. शाळांचा भौतिक विकास करण्यासाठी लाखो रुपये खर्च होतात, मग शिक्षक आणि इतर मनुष्यबळ पुरवण्याची जबाबदारी शिक्षण विभागाची नाही का, असा सवाल त्यांनी केला.

धस्के यांनी मुख्य कार्यकारी अधिकाऱ्यांच्या कामकाजावरही टीका केली. त्यांच्या केबिनमध्ये जायला पदाधिकारीसुद्धा घाबरतात, असा आरोप त्यांनी केला. ग्रामविकास मंत्री जयकुमार गोरे यांनी या प्रकरणात लक्ष घालून नायकवडी यांना तिथून हलवावं आणि त्या जागी जबाबदार शिक्षणाधिकारी नेमावा, अशी मागणी त्यांनी केली.

या तिन्ही शाळांना सीएसआरमधून सुमारे ५० लाख रुपयांचा निधी मिळाला असून, हा निधी देणाऱ्या व्यक्ती किंवा संस्थेचं नावही शाळेत कुठे लावलेलं नाही, असा आरोप धस्के यांनी केला. या काळात झालेल्या टेंडर प्रक्रियेची चौकशी मुख्य कार्यकारी अधिकारी यशनी नागराजन यांनी करावी, अशी मागणीही त्यांनी केली.

या सगळ्या मागण्यांवर लवकर कार्यवाही झाली नाही, तर जिल्हा परिषदेसमोर तीव्र आंदोलन छेडलं जाईल, असा इशारा धस्के यांनी दिला. तसंच सातारा शहरातील जिल्हा परिषदेच्या जागा वाचवण्यासाठी कायदेशीर लढाई लढण्याची भूमिकाही त्यांनी जाहीर केली.