सांगोल्यात २० एकर जमिनीवरून खळबळ; माजी आमदार आणि मुलावर वृद्ध दाम्पत्याचे गंभीर आरोप

सोलापूर जिल्ह्यातील सांगोला तालुक्यातील एका ७५ वर्षांच्या वृद्ध शेतकरी दाम्पत्याने राष्ट्रवादी काँग्रेसचे माजी आमदार दीपक साळुंखे आणि त्यांचे पुत्र सूर्यादित्य साळुंखे यांच्यावर गंभीर आरोप केले आहेत. या आरोपांमुळे सांगोला तालुक्यातील राजकीय वर्तुळात खळबळ उडाली आहे. हे दाम्पत्य निपुत्रिक आहे.

आपली सुमारे २० एकर शेतजमीन आधी परस्पर माजी आमदारांच्या मुलाच्या नावावर आणि त्यानंतर एका ट्रस्टच्या नावावर करण्यात आली, असा आरोप या दाम्पत्याने केला आहे. एवढेच नाही, तर तक्रार केल्यानंतर आपल्या जीविताला धोका निर्माण झाला आहे, असा दावाही त्यांनी केला आहे.

मिळालेल्या माहितीनुसार, या वृद्ध दाम्पत्याला अपत्य नाही. त्यांनी आपली सुमारे २० एकर शेतजमीन कसण्यासाठी माजी आमदार दीपक साळुंखे यांना बटाईने दिली होती. मात्र विश्वासाचा गैरफायदा घेऊन ही जमीन परस्पर सूर्यादित्य साळुंखे यांच्या नावावर करण्यात आली, असा आरोप दाम्पत्याने केला आहे.

आपल्या संमतीशिवाय जमीन दुसऱ्याच्या नावावर करण्यात आली, असा दावा करत दाम्पत्याने पोलिसांकडे तक्रार अर्ज दाखल केला आहे. त्यानंतरच्या घडामोडींबद्दलही त्यांनी आरोप केले आहेत.

तक्रारीत आणखी एक आरोप आहे. दाम्पत्याने तक्रार दिल्यानंतर प्रकरण आपल्यावर उलटण्याची शक्यता दिसल्याने ही जमीन एका ट्रस्टच्या नावावर वर्ग करण्यात आली, असे तक्रारीत म्हटले आहे. ज्या ट्रस्टच्या नावावर जमीन गेली, त्या ट्रस्टमध्ये सूर्यादित्य साळुंखे यांचाही सहभाग आहे, असा दावा दाम्पत्याने केला आहे. या सगळ्या व्यवहाराची चौकशी करून आपली जमीन आपल्याला परत मिळवून द्यावी, अशी त्यांची मागणी आहे.

माजी आमदार आणि त्यांच्या कुटुंबीयांविरोधात तक्रार केल्यापासून आपल्यावर दबाव येत आहे आणि जीविताला धोका आहे, असा आरोप दाम्पत्याने केला आहे. उतारवयात हक्काची जमीन गमावण्याची वेळ आल्याने ते हवालदिल झाले आहेत. याच पार्श्वभूमीवर हे दाम्पत्य व्हीलचेअरवरून थेट पोलीस अधिकाऱ्यांना भेटले आणि त्यांनी आपली व्यथा मांडली.

राज्याचे मुख्यमंत्री आणि प्रशासनाने या प्रकरणात तातडीने लक्ष घालावे आणि आपल्याला न्याय मिळवून द्यावा, अशी कळकळीची विनंती त्यांनी केली आहे.

या आरोपांमुळे सांगोला तालुक्याच्या राजकीय वर्तुळात जोरदार चर्चा सुरू आहे. आरोपांमध्ये किती तथ्य आहे, हे संबंधित कागदपत्रांतून आणि पोलिसांच्या तपासातून समोर येईल.