सांगलीत मविआचा प्रचार मेळावा; देशमुख-जाधव आणि आसगावकर यांना जिंकवण्याचा निर्धार

पुणे पदवीधर आणि शिक्षक मतदारसंघाच्या निवडणुकीच्या पार्श्वभूमीवर सांगली येथे महाविकास आघाडीचा प्रचार मेळावा झाला. या मेळाव्यात पदवीधर मतदारसंघाच्या उमेदवार हर्षदा देशमुख-जाधव आणि शिक्षक मतदारसंघाचे उमेदवार जयंत आसगावकर यांना विजयी करण्याचा निर्धार व्यक्त करण्यात आला.

राष्ट्रवादी (शरदचंद्र पवार पक्ष) नेते जयंत पाटील, काँग्रेसचे नेते विश्वजित कदम आणि खासदार विशाल पाटील हे मेळाव्याला प्रमुख उपस्थित होते. महाविकास आघाडीतील काँग्रेस, राष्ट्रवादी काँग्रेस, शिवसेना (उद्धव बाळासाहेब ठाकरे) आणि घटक पक्षांचे पदाधिकारी व कार्यकर्ते मोठ्या संख्येने आले होते.

जयंत पाटील यांनी सांगितले की, आघाडीतील सर्व घटक पक्षांच्या पदाधिकाऱ्यांनी आणि कार्यकर्त्यांनी जबाबदाऱ्या वाटून घेऊन संघटितपणे प्रचार करावा. पदवीधर आणि शिक्षकांच्या प्रश्नांसाठी सक्षम नेतृत्व निवडण्याची ही संधी आहे, असे ते म्हणाले. पुणे पदवीधर मतदारसंघाची निवडणूक अत्यंत महत्त्वाची आहे, असेही त्यांनी सांगितले. पदवीधरांची अस्वस्थता आणि त्यांचे प्रश्न मांडण्यासाठी योग्य व्यासपीठ मिळणे आवश्यक आहे, असे पाटील म्हणाले.

हर्षदा देशमुख-जाधव या लोकांमध्ये काम करणाऱ्या कार्यकर्त्या आहेत, तर जयंत आसगावकर यांनी विधान परिषदेत शिक्षकांचे प्रश्न नेहमीच प्रभावीपणे मांडले आहेत, असे जयंत पाटील यांनी म्हटले.

काँग्रेस नेते विश्वजित कदम यांनी एमपीएससीच्या विद्यार्थ्यांचे आंदोलन आणि त्यांची अस्वस्थता यांचा संदर्भ दिला. परीक्षांमध्ये पारदर्शकता आणावी, अशी मागणी त्यांनी केली. राज्यातील दुष्काळी परिस्थितीचा उल्लेख करून शेतकऱ्यांच्या पाणीप्रश्नावर आणि विकासाच्या बाबतीत कोणत्याही भागावर दुजाभाव न करता समान न्याय देण्याची गरज आहे, असे कदम यांनी सांगितले.

हर्षदा देशमुख-जाधव म्हणाल्या की, आजची झेन-झी आणि येणारी नवी पिढी अधिक जागरूक आहे. त्यांच्या शिक्षण, रोजगार आणि भवितव्याचे प्रश्न वेळीच सोडवले नाहीत, तर ही पिढी रस्त्यावर उतरल्याशिवाय राहणार नाही, असे त्या म्हणाल्या. पदवीधर आणि शिक्षकांना सक्षम करणे हाच महाविकास आघाडीचा मानस आहे, असेही त्यांनी सांगितले.

सांगलीशी असलेल्या नात्याबद्दल बोलताना देशमुख-जाधव यांनी भावनिक आवाहन केले. त्या म्हणाल्या, "ग्रामीण आणि शहरी भागाची सांगड घालण्याचे बाळकडू मला सांगलीतूनच मिळालेले आहे. माझे आजोळ सांगली जिल्ह्यातील लेंगरे असून माझे बालपण याच मातीत गेले आहे. त्यामुळे मी सांगलीची नात व भाची आहे. आपल्या या नातीला आणि भाचीला तुमचा आशीर्वाद द्या."

सांगली हे आपले आजोळ असल्याचे सांगत त्यांनी मेळाव्यात उपस्थितांकडे आशीर्वाद मागितला. पुणे पदवीधर आणि शिक्षक मतदारसंघाच्या निवडणुकीसाठी महाविकास आघाडीने अशा प्रकारे प्रचाराला सुरुवात केली आहे.