सांगली जिल्हा बँक निवडणुकीत हालचालींना वेग; विशाल पाटील, डॉ. विश्वजीत कदम, देवराज पाटील यांच्यासह दिग्गजांचे

सांगली : सांगली जिल्हा मध्यवर्ती सहकारी बँकेच्या निवडणुकीसाठी उमेदवारी अर्ज भरण्याच्या तिसऱ्या दिवशी राजकीय हालचालींना वेग आला. मंगळवारी तब्बल ४७ उमेदवारांनी मिळून ६४ अर्ज दाखल केले. यात खासदार विशाल पाटील आणि आमदार डॉ. विश्वजीत कदम यांच्यासह संग्रामसिंह देशमुख, देवराज पाटील, शैलजा पाटील, पूजा विशाल पाटील, स्वाती सुशांत खाडे, अस्मिता बाळासाहेब होनमोरे, शशिकांत नागे, भालचंद्र पाटील, दिग्विजय सूर्यवंशी आणि रावसाहेब पाटील यांचा समावेश आहे.

मंगळवारअखेर जिल्हा बँकेसाठी भरलेल्या एकूण उमेदवारी अर्जांची संख्या १२१ वर पोहोचली आहे. अर्ज भरण्यासाठी आता फक्त दोन दिवस शिल्लक आहेत. गुरुवारी, १ ऑक्टोबर हा अर्ज भरण्याचा शेवटचा दिवस आहे. त्यामुळे या शेवटच्या दोन दिवसांत प्रमुख राजकीय गटांकडून आणखी अर्ज येण्याची शक्यता आहे.

सोसायटी गटात मोठ्या नावांची गर्दी दिसली. या गटातून खासदार विशाल पाटील, पूजा विशाल पाटील, शैलजा प्रकाशबापू पाटील, भालचंद्र पाटील, देवराज पाटील, आमदार डॉ. विश्वजीत कदम, महेश पवार, काकासो काशीद, विनायक मोहिते, तानाजी महिंद आणि शिवाजी पाटील यांनी अर्ज भरले.

महिला गटातून सहा अर्ज आले. पूजा विशाल पाटील, छाया खरमाटे, शीतल पवार, स्वाती सुशांत खाडे, अस्मिता बाळासाहेब होनमोरे आणि मंदाताई लालासो करंडे यांनी हे उमेदवारी अर्ज दाखल केले.

अनुसूचित जाती गटातून अरुण कांबळे, प्रकाश कदम, शशिकांत नागे, मोहन वनखंडे, विलास सर्जे आणि तानाजी सातपुते यांनी अर्ज भरले. विमुक्त जाती-भटक्या जमाती गटातून गजानन शेंडगे, विष्णू माने, शंकर माने आणि मुकुंद ठोंबरे यांनी अर्ज दिले.

प्रक्रिया गटातून अमोल पाटील, मनोज शिंदे, पूजा पाटील, विशाल पाटील आणि स्वप्निल पाटील यांनी अर्ज दाखल केले. नागरी बँका व पतसंस्था गटातून पूजा विशाल पाटील, विशाल पाटील, प्रा. मोहन वनखंडे, देवराज पाटील, दिग्विजय सूर्यवंशी, रावसाहेब पाटील आणि स्वाती खाडे यांनी अर्ज भरले. इतर संस्था गटातून सुनील कबाडगे, मोहन वनखंडे आणि शंकर माने यांनी उमेदवारी अर्ज दिले.

अर्ज भरण्याची मुदत संपायला दोनच दिवस उरल्याने राजकीय गटांच्या हालचालींना वेग आला आहे. काही उमेदवारांनी एकापेक्षा जास्त गटांतून अर्ज भरले आहेत, त्यामुळे सध्या उमेदवारांची संख्या मोठी दिसत आहे. आधी अर्जांची छाननी होईल, त्यानंतर माघारीची प्रक्रिया पार पडेल आणि अंतिम उमेदवार यादी जाहीर होईल. त्यानंतरच जिल्हा बँकेच्या निवडणुकीचे खरे चित्र स्पष्ट होणार आहे.