सॅफ चॅम्पियनशिपमध्ये भारताचा पाकिस्तानवर ३-२ ने विजय; सुहेल भट्टचे दोन गोल

सॅफ चॅम्पियनशिप २०२६ चा पहिला सामना भारत आणि पाकिस्तान यांच्यात खेळला गेला. या सामन्यात भारतीय संघाने पाकिस्तानचा ३-२ ने पराभव केला. अशा प्रकारे भारताने या स्पर्धेची सुरुवात विजयाने केली आहे.

हा सामना बांग्लादेशातील ढाका नॅशनल स्टेडियमवर खेळवला गेला. भारतीय खेळाडूंनी सुरुवातीपासूनच सामन्यावर आपली पकड ठेवली आणि पहिल्याच हाफमध्ये तीन गोल केले. सामन्याच्या शेवटच्या क्षणी पाकिस्तानने पुनरागमनाचा प्रयत्न करत दोन गोल केले, तरी ते भारताला जिंकण्यापासून रोखू शकले नाहीत. भारताच्या या विजयाचा हिरो सुहेल भट्ट ठरला, ज्याने सामन्यात दोन गोल केले.

पहिल्या हाफमध्ये भारतीय खेळाडूंनी सुरुवातीपासूनच आक्रमक पवित्रा घेतला होता. सामन्याच्या १३ व्या मिनिटाला मोहम्मद सोहेलने दिलेल्या अप्रतिम पासवर सुहेल भट्टने गोल केला आणि भारताला १-० अशी आघाडी मिळवून दिली. त्यानंतर सात मिनिटांनी, म्हणजे १९ व्या मिनिटाला, भट्टने पुन्हा एकदा गोल केला आणि भारताची आघाडी २-० अशी वाढली.

भारतीय संघाने आपले आक्रमण तिथेच थांबवले नाही. २३ व्या मिनिटाला मंगलनथांग किपगेनने तिसरा गोल करून पाकिस्तानच्या अडचणीत भर घातली. पाकिस्तानच्या गोलरक्षकाने चेंडू थांबवण्याचा प्रयत्न केला, पण तो अयशस्वी ठरला. त्यामुळे पहिल्या हाफच्या अखेरीस भारताकडे ३-० अशी भक्कम आघाडी होती. दुसरीकडे, पाकिस्तानच्या संघाला पहिल्या हाफमध्ये भारतीय बचाव भेदता आला नाही.

दुसऱ्या हाफमध्येही भारतीय संघाने आपले वर्चस्व कायम ठेवले आणि पाकिस्तानला गोल करण्याची एकही संधी दिली नाही. त्यामुळे भारत हा सामना ३-० ने सहज जिंकेल असे वाटत होते. पण इंज्युरी टाइममध्ये पाकिस्तानने अचानक सामन्याचे चित्र पालटले. ९१ व्या मिनिटाला नजीब उल्लाहने पाकिस्तानचा पहिला गोल केला आणि स्कोअर ३-१ झाला.

त्यानंतर पाकिस्तानचे खेळाडू आक्रमक झाले आणि ९४ व्या मिनिटाला अली खान गाझीने विलक्षण चपळाई दाखवत दुसरा गोल केला. या गोलमुळे स्कोअर ३-२ झाला. मात्र, त्यानंतर पाकिस्तानला बरोबरीचा गोल करता आला नाही. अखेरीस भारतीय खेळाडूंनी आपली आघाडी टिकवून ठेवली आणि सामना ३-२ ने जिंकला.