पालक-बेसन चिला: रोजच्या नाश्त्याला द्या हेल्दी ट्विस्ट, झटपट बनवा ही सोपी रेसिपी
रोज सकाळी नाश्त्याला काय बनवायचं हा प्रश्न जवळपास सगळ्यांनाच पडतो. पोहे, उपमा किंवा इडली खाऊन कंटाळा आला असेल तर पालक-बेसन चिला हा उत्तम आणि पौष्टिक पर्याय ठरू शकतो.
रोज सकाळी नाश्त्याला काय बनवायचं हा प्रश्न जवळपास प्रत्येकालाच पडतो. पोहे, उपमा किंवा इडली खाऊन खाऊन कंटाळा येतो, हे तर खरंच. रोजची तीच तीच चव खाऊन कधी कधी नाश्त्याला काहीतरी वेगळं हवंसं वाटतं. अशा वेळी सकाळच्या धावपळीत पटकन तयार होणारा आणि पोटभर नाश्ता हवा असेल, तर पालक चिला हा एक चांगला पर्याय ठरू शकतो. घरात सहज मिळणाऱ्या पालकापासून हा चिला कमी वेळात आणि सोप्या पद्धतीने बनवता येतो. चवीला छान असल्यामुळे घरातल्या मोठ्यांसोबत लहान मुलांनाही हा नाश्ता आवडू शकतो. शिवाय पालकामुळे या पदार्थातून पोषक घटकही मिळतात, त्यामुळे नुसती चवच नाही तर आरोग्याच्या दृष्टीनेही हा नाश्ता फायदेशीर ठरतो. ताज्या हिरव्या पालकाची चव आणि मसाल्यांचा तडका यामुळे हा चिला अजून चविष्ट लागतो. चला तर मग जाणून घेऊया पालक-बेसन चिल्याची अगदी सोपी रेसिपी.
चिला बनवण्यासाठी लागणारं साहित्य असं - पालकची पाने, एक कप बेसन, दोन चमचे तांदळाचं पीठ किंवा रवा, एक चमचा आले-हिरवी मिरचीची पेस्ट, बारीक चिरलेला एक कांदा, अर्धा चमचा ओवा, चिमूटभर हिंग, हळद, अर्धा चमचा लाल तिखट, अर्धा चमचा गरम मसाला, चवीनुसार मीठ, गरजेनुसार पाणी आणि तेल किंवा तूप. हे सगळं साहित्य साधारण घरात सहज उपलब्ध असतं, त्यामुळे वेगळी खरेदी करण्याची फारशी गरज पडत नाही.
चिला बनवायची पद्धत अगदी सोपी आहे. सगळ्यात आधी पालकची पाने स्वच्छ पाण्याने दोन-तीन वेळा धुवून घ्यायची. पानांवरची माती किंवा धूळ पूर्ण निघाली की पालक बारीक चिरून घ्यायचा. एका भांड्यात बेसन आणि रवा किंवा तांदळाचं पीठ घ्यायचं. त्यात आले-मिरचीची पेस्ट, कांदा, ओवा, हिंग, हळद, लाल तिखट, गरम मसाला आणि मीठ घालायचं. मग यात चिरलेला पालक घालून सगळं साहित्य नीट मिसळायचं. थोडं थोडं पाणी घालत घट्टसर पण सहज पसरवता येईल असं पीठ तयार करायचं. पीठ ना खूप पातळ असावं ना खूप घट्ट, कारण त्यावरच चिला व्यवस्थित पसरण्याचं आणि चांगला भाजला जाण्याचं गणित अवलंबून असतं.
पीठ तयार झालं की तवा गरम करून त्यावर थोडं तेल किंवा तूप लावायचं. तयार पीठ तव्यावर ओतून गोलाकार चिला पसरवायचा. चिल्याच्या कडांना थोडं तेल किंवा तूप सोडून मध्यम आचेवर भाजायचा. एक बाजू सोनेरी आणि कुरकुरीत झाली की चिला सावकाश उलटायचा आणि दुसरी बाजूही व्यवस्थित भाजून घ्यायची. याच पद्धतीने उरलेल्या पिठाचेही चिले एकामागोमाग एक बनवायचे. गरमागरम पालकाचा चिला हिरवी चटणी, दही किंवा आवडीच्या चटणीसोबत सर्व्ह करायचा. अशा प्रकारे कमी वेळात, कमी मेहनतीत आणि सहज उपलब्ध साहित्यात हा पौष्टिक आणि चविष्ट नाश्ता तयार होतो.
