रिव्ह्यू निगेटिव्ह तरी 'द वन'ने ओपनिंग डेला केली इतक्या कोटींची कमाई

सिद्धार्थ मल्होत्रा आणि तमन्ना भाटिया यांचा नवीन सिनेमा 'द वन' म्हणजेच Vvan २५ सप्टेंबरला थिएटरमध्ये आला. बिहारमधलं वन देवीचं मंदिर आणि छठ पूजेचं महत्व या विषयावर आधारित असल्यामुळे सिनेमाकडून प्रेक्षकांच्या बऱ्याच अपेक्षा होत्या. वेगळा विषय आणि वेगळी मांडणी असल्यामुळे हा सिनेमा चर्चेत होता. पण रिलीज झाल्यावर मात्र प्रेक्षक आणि समीक्षक दोघांनाही हा सिनेमा फारसा भावला नाही. असं असूनही ओपनिंग डेला सिनेमाने बऱ्यापैकी कमाई करून दाखवली, हे विशेष.

SACNILK ने दिलेल्या माहितीनुसार 'द वन'ने भारतात पहिल्या दिवशी ८.५१ कोटी रुपयांची नेट कमाई केली, तर ग्रॉस कलेक्शन १०.२० कोटी रुपयांवर पोहोचलं. देशभरात १,४२० शो लागले होते, पण थिएटरमध्ये फक्त २६ टक्के ऑक्युपन्सी नोंदवली गेली, म्हणजे बहुतांश खुर्च्या रिकाम्याच राहिल्या. सिद्धार्थच्या आधीच्या दहा सिनेमांनी बॉक्स ऑफिसवर फारशी कमाल दाखवली नव्हती, त्या तुलनेत 'द वन'ची ओपनिंग चांगली मानली जात आहे. मागच्या सिनेमांच्या तुलनेत या सिनेमाने पहिल्या दिवशी जास्त पैसे कमावले आहेत, हीच काय ती दिलासादायक बाब.

आकडेवारी ठीकठाक असली तरी समीक्षकांनी सिनेमाला पूर्णपणे नाकारलं आहे. इंडियन एक्सप्रेसच्या समीक्षक शुभ्रा गुप्ता यांनी या सिनेमाला 'टॉर्चर' असं संबोधलं असून फक्त अर्धा स्टार दिला आहे. सोशल मीडियावरही सिनेमाचे मीम्स बनत असून लोक ट्रोल करत आहेत. वन देवीची गोष्ट आणि छठ पूजेचा विषय चांगला असूनही कथा इतकी भरकटली आहे की बघवत नाही, असं प्रेक्षकांचं म्हणणं आहे. सिनेमा शेवटपर्यंत खिळवून ठेवत नाही आणि वेगवेगळे ट्रॅक टाकून आणखी गोंधळ वाढवला आहे, अशीही टीका होत आहे.

या सिनेमाकडून लोकांच्या अपेक्षा जास्त होत्या, कारण याचं दिग्दर्शन TVF ने केलं आहे. 'पंचायत'सारखी लोकप्रिय वेबसिरीज बनवणारे दीपक कुमार मिश्रा यांनी या सिनेमातून पहिल्यांदाच मोठ्या पडद्यावर दिग्दर्शन केलं आहे. एवढी मोठी वेबसिरीज बनवल्यानंतर त्यांच्याकडून सिनेमातही तेवढंच चांगलं काम अपेक्षित होतं. कल्पना चांगली होती आणि कलाकारांनीही मेहनत घेतल्याचं दिसतं, पण रिसर्च नीट न झाल्यामुळे आणि कथा विस्कळीत राहिल्यामुळे तसंच गरज नसताना जास्त गोष्टी दाखवल्यामुळे एक चांगली रहस्यमय कथा उभी राहू शकली नाही, असं प्रेक्षकांचं म्हणणं आहे. दिग्दर्शन ठीक असलं तरी VFX अजून चांगलं करायला हवं होतं, अशीही चर्चा आहे. या सिनेमाची निर्मिती एकता कपूर, शोभा कपूर, अरुणाभ कुमार आणि नीरज कोठारी यांनी केली आहे.