रेनॉल्ट फ्रान्समध्ये पुढील पाच वर्षांत १० अब्ज युरोंहून अधिक गुंतवणूक करणार, EV आणि परवडणाऱ्या गाड्यांवर भर

फ्रान्सची आघाडीची वाहननिर्मिती कंपनी रेनॉल्ट ग्रुप पुढील पाच वर्षांत आपल्या देशात, म्हणजेच फ्रान्समध्ये, १० अब्ज युरोंहून अधिक गुंतवणूक करणार आहे. कंपनीचे CEO फ्रान्स्वा फ्रोव्हो यांनी याची घोषणा केली आहे.

या गुंतवणुकीचा मुख्य भर इलेक्ट्रिक वाहनांच्या निर्मितीला वेग देण्यावर आणि ग्राहकांना अधिक परवडणाऱ्या किमतीत गाड्या उपलब्ध करून देण्यावर असेल. EV ला वाढती मागणी आहे, चीनमधील वाहन कंपन्यांकडून स्पर्धा वाढत आहे आणि युरोपातील वाहन उद्योगात बदल होत आहेत. या सगळ्या पार्श्वभूमीवर रेनॉल्टचा हा निर्णय महत्त्वाचा मानला जात आहे.

रेनॉल्ट आपल्या फ्रान्समधील उत्पादन व्यवस्थेत इलेक्ट्रिक वाहनांना जास्त महत्त्व देणार आहे. कंपनीच्या नव्या धोरणांनुसार युरोपमध्ये इलेक्ट्रीफायीड वाहनांची संख्या वाढवण्यावर भर दिला जात आहे. रेनॉल्टने २०३० पर्यंत मोठ्या प्रमाणावर नवी मॉडेल्स बाजारात आणण्याची योजना आखली आहे आणि त्यात इलेक्ट्रिक वाहनांचा मोठा वाटा असेल. कंपनीच्या म्हणण्यानुसार उत्पादन खर्च कमी करण्याबरोबरच नव्या तंत्रज्ञानाचा वापर करून EV जास्तीत जास्त ग्राहकांच्या आवाक्यात आणण्याचा प्रयत्न केला जाणार आहे.

EV क्षेत्रातले सर्वात मोठे आव्हान गाडीची किंमत हेच आहे. त्यामुळे रेनॉल्टच्या या नव्या गुंतवणुकीचा एक महत्त्वाचा भाग परवडणाऱ्या वाहनांच्या विकासासाठी वापरला जाणार आहे. कंपनीचा बजेट ब्रँड Dacia हाही कमी किमतीच्या इलेक्ट्रिक वाहनांवर लक्ष केंद्रित करत आहे.

चीनमधून युरोपात आयात होणाऱ्या स्वस्त EV शी स्पर्धा करण्यासाठी स्थानिक पातळीवर उत्पादन वाढवण्याचा रेनॉल्टचा प्रयत्न आहे. Dacia Springs या इलेक्ट्रिक कारचे युरोपातील उत्पादन चीनऐवजी स्लोव्हेनियात करण्याची योजना हे याच दिशेने टाकलेले महत्त्वाचे पाऊल आहे, असे स्पष्ट होत आहे.

रेनॉल्टच्या म्हणण्यानुसार कंपनीने मागील पाच वर्षांत फ्रान्समध्ये सुमारे १३ अब्ज युरो गुंतवले आहेत. आता पुढील पाच वर्षांसाठी आणखी १० अब्ज युरोंहून जास्त गुंतवणुकीची तयारी करण्यात आली आहे. कंपनीला २०२६ मध्ये फ्रान्समध्ये सुमारे ६.२५ लाख वाहनांचे उत्पादन होण्याची अपेक्षा आहे. हे मागील वर्षाच्या तुलनेत सुमारे २५ टक्के अधिक आहे. या वाढीत इलेक्ट्रिक वाहनांचा मोठा वाटा राहणार आहे. त्यामुळे रेनॉल्टच्या या निर्णयामुळे फ्रान्समधील वाहन उत्पादन, रोजगार आणि EV तंत्रज्ञानाच्या विकासाला चालना मिळण्याची शक्यता आहे.