रत्नागिरी गोव्यासारखे पर्यटन आकर्षण होणार, दोन वर्षांत विकास केंद्र उभारणार - उदय सामंत

रत्नागिरी जिल्हा आता गोव्याच्या तोडीस तोड पर्यटनस्थळ म्हणून पुढे येतो आहे, असे पालकमंत्री उदय सामंत यांनी सांगितले. जिल्ह्याच्या विकासासाठी आणि पर्यटनाला चालना देण्यासाठी शासन ठाम असल्याचे त्यांनी नमूद केले. हॉटेल आणि फळप्रक्रिया या दोन्ही व्यवसायांना उद्योगाचा दर्जा द्यायचा शासनाचा विचार आहे, आणि हा दर्जा मिळाला तर या क्षेत्रात मोठा फरक पडेल, असे ते म्हणाले. पुढच्या दोन वर्षांत पर्यटकांना माहिती देणारे स्वतंत्र पर्यटन विकास केंद्रही उभे केले जाणार आहे, अशी घोषणा त्यांनी केली. हॉटेल विवा येथे रविवारी रत्नागिरी पर्यटन सहकारी सेवा संस्था मर्यादित, समृद्ध मराठी चेंबर्स ऑफ कॉमर्स (मुंबई) आणि पर्यटन संचालनालय यांच्या वतीने आयोजित जागतिक पर्यटन दिन कार्यक्रमात मंत्री सामंत बोलत होते. या वेळी आमदार ज्ञानेश्वर म्हात्रे, नगराध्यक्ष शिल्पा सुर्वे आणि इन्फिगो आय केअरचे व्यवस्थापकीय संचालक डॉ. श्रीधर ठाकुर उपस्थित होते.

पर्यटन वाढीसाठी सतत प्रयत्न करणारे आणि पर्यटन परिषद, कार्यशाळांमधून व्यासपीठ उपलब्ध करून देणारे राजू भाटलेकर यांचे मंत्री सामंत यांनी या वेळी कौतुक केले. दिवाळी, ३१ डिसेंबर, शिमगा आणि गणेशोत्सव अशा काळात रत्नागिरीतील हॉटेल्स ९० ते ९५ टक्क्यांपर्यंत फुल्ल असतात, असे त्यांनी सांगितले. रत्नागिरीत विमानतळ होणार का, यावर एकेकाळी शंका घेतली जायची आणि टीकाही व्हायची, याची आठवणही त्यांनी करून दिली.

मात्र आता १०० कोटी रुपये खर्च करून येथील एअरस्ट्रिप १४०० मीटरवरून २१०० मीटरपर्यंत लांब आणि ३० मीटरवरून ४५ मीटरपर्यंत रुंद करण्यात आली आहे. या विस्तारामुळे ८२ सीटर एटीआर विमान सहज उतरू शकेल आणि त्यातून पर्यटनाला आणखी गती मिळेल, असे सामंत म्हणाले. उडाण योजनेअंतर्गत देशात कुठेही पाहायला मिळणार नाही, इतकी सुसज्ज टर्मिनल बिल्डिंग रत्नागिरीत उभी करण्यात आली आहे. या इमारतीत पाऊल टाकताच छत्रपती शिवाजी महाराज आणि कोकणी सरकली यांचे दर्शन घडते.

कोकणातल्या उत्पादनांना जागतिक पातळीवर पोहोचवण्यासाठी टर्मिनल बिल्डिंगमध्ये ६ खास स्टॉल्स उभारले आहेत. यामुळे मुंबई किंवा इतर ठिकाणांहून येणाऱ्या पर्यटकांना कोकम सरबत आणि सोलकढीसारख्या स्थानिक पदार्थांची ओळख होणार आहे. रत्नागिरी विमानतळावरून येत्या जानेवारीच्या पहिल्या आठवड्यापासून मुंबई आणि हैदराबादसाठी विमानसेवा सुरू होणार असून, नागरिकांना आता विमानाने प्रवास करता येईल, अशी घोषणाही मंत्री सामंत यांनी या वेळी केली.

कार्यक्रमाच्या प्रास्ताविकात सुधीर तथा भाई रिसबूड यांनी कोकणातील पर्यटन आणि पालकमंत्री उदय सामंत यांच्या संकल्पनेतून रत्नागिरीत राबवलेले प्रकल्प व उपक्रम यांची माहिती दिली. पालकमंत्र्यांचा भर फक्त संकल्पना मांडण्यावर नसून त्या प्रत्यक्षात अमलात आणण्यावर असतो, हे त्यांनी आवर्जून सांगितले. कार्यक्रमाचे सूत्रसंचालन राजेश आयरे यांनी केले.