'रामायण'चे नवे पोस्टर्स रिलीज; राम-सीता-लक्ष्मणाची झलक, लंकेत उभा दिसला रावण

रणबीर कपूरचा आगामी चित्रपट 'रामायण' अजून प्रदर्शित व्हायचा आहे, पण त्याआधीच त्याची चांगली चर्चा सुरू आहे. चित्रपटाच्या ट्रेलरला प्रेक्षकांचा उत्तम प्रतिसाद मिळाल्यानंतर आता निर्मात्यांनी चित्रपटातील मुख्य पात्रांचे नवे पोस्टर्स समोर आणले आहेत. या पोस्टर्समध्ये रणबीर कपूर, साई पल्लवी, रवी दुबे आणि यश यांचे खास लूक पाहायला मिळत आहेत. हे पोस्टर्स सोशल मीडियावर शेअर होताच चाहत्यांमध्ये चित्रपटाबद्दलची उत्सुकता आणखी वाढलेली दिसतेय.

निर्मात्यांनी सुरुवातीला जे पोस्टर शेअर केलं, त्यात रणबीर कपूर रामाच्या भूमिकेत दिसतोय, तर साई पल्लवी सीतेच्या भूमिकेत आणि रवी दुबे लक्ष्मणाच्या भूमिकेत आहेत. तिघांच्याही मागे जंगलाचा परिसर दिसत असून, यावरून तिघांचाही हा लूक वनवासातील असल्याचं स्पष्ट होतंय. या पोस्टरमध्ये रणबीर कपूरच्या एका बाजूला साई पल्लवी उभी आहे, तर दुसऱ्या बाजूला रवी दुबे उभा दिसतोय. हे पोस्टर शेअर करताना निर्मात्यांनी 'धर्मात नेहमी एकत्र' असं कॅप्शन दिलं आहे.

राम, सीता आणि लक्ष्मणाच्या पोस्टरनंतर निर्मात्यांनी यशच्या भूमिकेतलं रावणाच्या रूपातलं पोस्टरही रिलीज केलं. या पोस्टरमध्ये यश रावणाच्या रूपात उभा असून, त्याच्या मागे सोन्याची लंका उभी असलेली दिसतेय. यशचा हा लूक सोशल मीडियावर लगेच चर्चेत आला आणि रावणाच्या भूमिकेतल्या त्याच्या या लूकनं चाहत्यांचं लक्ष खेचून घेतलंय. हे पोस्टर शेअर करताना निर्मात्यांनी 'तिन्ही लोकांचा राजा, रावण' असं कॅप्शन दिलं आहे.

'रामायण' चित्रपटात रणबीर कपूर, साई पल्लवी, यश आणि रवी दुबे यांच्यासोबतच विवेक ओबेरॉय, रकुल प्रीत सिंग, काजल अग्रवाल, लारा दत्ता, कुणाल कपूर, इंदिरा कृष्णन आणि शीबा चड्ढा यांसारखे कलाकारही महत्त्वाच्या भूमिकांमध्ये असणार आहेत. म्हणजेच एवढी मोठी कलाकारांची फळी या एका चित्रपटात एकत्र दिसणार आहे, आणि हीच बाब चित्रपटाबद्दलची उत्सुकता वाढवणारी ठरतेय.

चित्रपटाच्या प्रदर्शनाची प्रेक्षक आतुरतेने वाट पाहत आहेत. 'रामायण'चा पहिला भाग यंदाच्या दिवाळीत प्रदर्शित होणार आहे, तर दुसरा भाग पुढील दिवाळीत प्रेक्षकांसमोर येणार आहे. म्हणजेच चाहत्यांना या कथेचा दुसरा भाग पाहण्यासाठी पुढच्या वर्षीच्या दिवाळीपर्यंत वाट पाहावी लागणार आहे. दरम्यान, नव्या पोस्टर्समुळे चित्रपटातील पात्रांच्या लूकबद्दलची उत्सुकता आणखी वाढलेली दिसतेय.