चंद्रपुरात रस्त्यावर धक्का लागल्यावरून वाद, पेव्हर ब्लॉकने वार; युवकाचा मृत्यू

चंद्रपूर शहरात मंगळवारी (२७ ऑक्टोबर) रात्री साडेआठच्या सुमारास जिल्हा रुग्णालयासमोर एका युवकाचा मृत्यू झाला. रस्त्याने जाताना धक्का लागला आणि त्यावरून दोघांत वाद झाला, असे पोलिसांच्या माहितीनुसार समोर आले आहे. या वादाचे रूपांतर हाणामारीत झाले आणि त्यातच युवकाचा जीव गेला.

शहरातील छोटी बाजार चौक सिग्नलजवळ असलेल्या 'श्रीमान सावजी भोजनालय'समोर ही घटना घडली. पोलिसांच्या माहितीनुसार, आरोपीने रस्त्याच्या कडेला पडलेला सिमेंटचा पेव्हर ब्लॉक उचलला आणि युवकाच्या डोक्यावर ६ ते ७ वेळा वार केले. भररस्त्यात हा प्रकार घडल्याने परिसरात खळबळ उडाली आणि घटनास्थळी नागरिकांची मोठी गर्दी जमली.

पोलिसांनी सांगितले की, मृत युवक रंजित हा रस्त्याने जात असताना अमन कुर्वे याला धक्का लागला. "तू धक्का का मारला" असे म्हणत कुर्वे यांनी वाद घातला. वाद वाढल्यावर रंजित याने अमन याचा शर्ट फाडला. त्यामुळे अमन संतापला आणि दोघांत हाणामारी झाली. रागावर ताबा न राहिल्याने अमन याने रस्त्याकडेचा पेव्हर ब्लॉक उचलून रंजित याच्या डोक्यात जोरात मारला, असे पोलिसांच्या माहितीत म्हटले आहे. रंजित खाली कोसळल्यानंतरही अमन त्याच्यावर पेव्हर ब्लॉकने हल्ला करत राहिला, असेही पोलिसांनी सांगितले.

या मुख्य मार्गावरून जाणाऱ्या नागरिकांनी हे सगळे पाहिले, मात्र कुणीही अमनला थांबवण्याचा प्रयत्न केला नाही. घटनेची माहिती मिळताच पोलीस निरीक्षक श्याम गव्हाणे पोलीस पथकासह घटनास्थळी पोहोचले. रंजितला उपचारासाठी जिल्हा सामान्य रुग्णालयात दाखल करण्यात आले, पण डोक्याला गंभीर मार लागल्याने आणि खूप रक्तस्राव झाल्याने काही वेळातच त्याचा मृत्यू झाला.

मृताची ओळख ३६ वर्षीय रंजीत सुरेश राजवंशी (रा. बल्लारशाह) अशी पटल्याचे सांगितले जाते. मात्र त्याचे नेमके नाव रंजित राजवंशी आहे की दुसरे काही, याबद्दल अजूनही संशय आहे. पोलिसांनी अधिक माहिती काढली असता तो बल्लारपूरमधील रहिवासी असल्याचे समजले. तो मूळचा छत्तीसगडमधील असल्याची माहिती पुढे आली आहे. सकाळी बल्लारपूर नगरपरिषदेजवळ त्याला फिट आल्याने तो कोसळला होता. नागरिकांनी त्याला तातडीने बल्लारपूर ग्रामीण रुग्णालयात नेले आणि तेथील डॉक्टरांनी पुढील उपचारासाठी चंद्रपूरच्या जिल्हा सामान्य रुग्णालयात पाठवले. तो बल्लारपुरात कुठे राहत होता, याचा पोलीस पुढील तपास करत आहेत.

घटनेनंतर आरोपी अमन फरार झाला होता. पोलिसांनी सीसीटीव्ही फुटेजवरून त्याची ओळख पटवली आणि काही वेळातच त्याला अटक केली. अटक केलेला आरोपी पंचशील चौक, जटपुरा वार्ड, चंद्रपूर येथील २९ वर्षीय अमन दीपक कुरवे आहे. तो चंद्रपूर शहर पोलीस ठाण्यात यापूर्वीच नोंद असलेल्या गुन्ह्यांच्या रेकॉर्डवर आहे. पोलीस निरीक्षक गव्हाणे यांनी सांगितले की, आरोपीवर २०२१ पर्यंत मारहाणीचे गुन्हे दाखल आहेत.

रस्त्याने पायी जाताना धक्का लागल्याने वाद झाला आणि पुढे भररस्त्यात खून होईल, याची कुणालाच कल्पना नव्हती. मात्र हे भयावह दृश्य पाहूनही कुणी रंजितला वाचवण्याचा प्रयत्न केला नाही, त्यामुळे माणुसकी कुठे हरवली का, असा प्रश्न यावेळी उपस्थित झाला.