पीएम किसानचा २४ वा हप्ता वाटला; शेतीत विज्ञान-तंत्रज्ञान वाढवण्यावर मोदींचा भर

शेतकऱ्यांचे उत्पन्न वाढवायचे असेल, तर फक्त आर्थिक मदत देऊन भागणार नाही. शेतीत विज्ञान आणि तंत्रज्ञानाचा वापर वाढवणे आणि इतरही सर्वांगीण उपायांना प्राधान्य देणे गरजेचे आहे, असे प्रधानमंत्री नरेंद्र मोदी यांनी सांगितले. प्रधानमंत्री किसान सन्मान निधी योजनेच्या २४ व्या हप्त्याचे वितरण गुजरातमधील बनासकांठा येथे आयोजित कार्यक्रमात झाले.

या हप्त्यापोटी महाराष्ट्रातील ९१ लाख १२ हजार ७६५ शेतकऱ्यांच्या बँक खात्यांत १ हजार ८३५ कोटी रुपये थेट जमा करण्यात आले. मुख्यमंत्री देवेंद्र फडणवीस मुंबईतील वर्षा निवासस्थानातून दूरदृश्य प्रणालीद्वारे या कार्यक्रमात सहभागी झाले. कृषी विभागाचे सचिव परिमल सिंग यावेळी उपस्थित होते.

केंद्र सरकारच्या विविध धोरणांमुळे गेल्या काही वर्षांत देशातील शेतकऱ्यांना ५० लाख कोटी रुपयांपेक्षा जास्त रक्कम मिळाली आणि त्यांच्या उत्पादन खर्चातही बचत झाली, असे मोदी म्हणाले. देशातील ८५ टक्क्यांपेक्षा जास्त शेतकरी लहान आहेत. त्यांना पीएम किसान सन्मान निधीतून आतापर्यंत सुमारे ४ लाख कोटी रुपये थेट बँक खात्यांत दिले गेले, असेही त्यांनी सांगितले.

जागतिक बाजारात खतांचे भाव वाढले असतानाही त्याचा जादा भार शेतकऱ्यांवर पडू नये, म्हणून सरकारने सुमारे १६ लाख कोटी रुपये खर्च केले, असे मोदी यांनी सांगितले. गेल्या १२ वर्षांत गहू आणि धान उत्पादक शेतकऱ्यांना किमान आधारभूत किमतीतून २४ लाख कोटी रुपये देण्यात आल्याचेही त्यांनी म्हटले.

उत्पादन खर्च कमी करण्यासाठी सरकार विविध योजना राबवत आहे. पीएम कुसुम योजनेअंतर्गत आतापर्यंत सुमारे १२ लाख सौरपंप देण्यात आले असून त्यामुळे शेतकऱ्यांचे ८० कोटी लिटरपेक्षा जास्त डिझेल वाचले, असे मोदी यांनी सांगितले. याशिवाय जादा वीजनिर्मितीतून उत्पन्न मिळवण्याची संधीही शेतकऱ्यांना मिळाली आहे.

बदलत्या हवामानाचा सामना करण्यासाठी शेतकऱ्यांना सुमारे तीन हजार नव्या सुधारित बियाण्यांच्या जाती देण्यात आल्या आहेत. प्रधानमंत्री पीक विमा योजनेतून गेल्या दहा वर्षांत शेतकऱ्यांना दोन लाख कोटी रुपयांपेक्षा जास्त भरपाई मिळाली, असेही त्यांनी नमूद केले.

शेतीसोबत पशुपालन आणि पूरक व्यवसायांनाही महत्त्व देण्याची गरज आहे, असे मोदी म्हणाले. राष्ट्रीय गोकुळ अभियानातून देशी पशुधनाचे संवर्धन आणि वैज्ञानिक पद्धतीने प्रजननाला प्रोत्साहन दिले जात आहे. लाळ्या-खुरकुत रोगापासून पशुधन वाचवण्यासाठी देशभर मोफत लसीकरण मोहीम राबवली गेली. आतापर्यंत सुमारे १५० कोटी लसमात्रा दिल्या असून आठ कोटींपेक्षा जास्त शेतकऱ्यांच्या पशुधनाला त्याचा फायदा झाला, असे त्यांनी सांगितले.

देशातील गाई आणि म्हशींचे सरासरी दैनंदिन दूध उत्पादन २०१३-१४ मध्ये पाच लिटरपेक्षा कमी होते. ते आता सुमारे आठ लिटरपर्यंत पोहोचले आहे, असेही मोदी यांनी सांगितले. सरदार वल्लभभाई पटेल यांच्या जयंतीनिमित्त ३१ ऑक्टोबरला 'रन फॉर युनिटी' आयोजित केली आहे. त्यात तरुणांसह नागरिकांनी मोठ्या संख्येने सहभागी व्हावे, असे आवाहन त्यांनी केले.