चिमूर आणि सिंदेवाहीत वाघाने घेतले दोन शेतकऱ्यांचे जीव, चंद्रपूर जिल्ह्यात भीती

चंद्रपूर जिल्ह्यातील चिमूर आणि सिंदेवाही तालुक्यांत शुक्रवारी, ३० ऑक्टोबर रोजी वाघाच्या हल्ल्यात दोन शेतकऱ्यांचा मृत्यू झाला. दोन्ही घटना एकाच दिवशी घडल्या. चिमूर तालुक्यातील उरकुडपार येथे ५५ वर्षांच्या शेतकऱ्यावर वाघाने हल्ला केला, तर सिंदेवाही तालुक्यातील धुमणखेडा येथे ७५ वर्षांच्या वृद्धाचा मृतदेह सापडला. या घटनांमुळे ग्रामीण भागात संताप आणि भीती पसरली आहे.

जिल्ह्यात मानव आणि वन्यजीव यांच्यातील संघर्षात आतापर्यंत एकूण ३८ नागरिकांचा मृत्यू झाला आहे. वस्तीजवळ आणि शेतशिवारात वाघांची दहशत वाढत चालल्याचे यातून दिसते.

उरकुडपार येथील सदाशिव चिरकुटा खडसंग हे ५५ वर्षांचे शेतकरी पत्नीसह शेतात गेले होते. दुपारी साडेबारा वाजण्याच्या सुमारास शेताजवळच्या जंगलात दबा धरून बसलेल्या वाघाने त्यांच्यावर अचानक झडप घातली. नवऱ्यावर हल्ला झालेला पाहून पत्नीने आरडाओरडा केला. तो ऐकून आसपासचे शेतकरी आणि शेतमजूर धावत आले. पण तोपर्यंत वाघ सदाशिव यांना फरफटत घनदाट जंगलाकडे घेऊन गेला होता. त्यातच त्यांचा जागीच मृत्यू झाला.

घटनेची माहिती मिळताच सहाय्यक वनसंरक्षक महेश गायकवाड, वनपरिक्षेत्र अधिकारी किशोर देऊळकर, क्षेत्रसहाय्यक नैताम, राठोड, वनरक्षक अमोल नेवारे आणि भिसी, शंकरपूर व मुरपार परिसरातील वनकर्मचारी घटनास्थळी पोहोचले. त्यांनी पंचनामा केला. चिमूरचे पोलीस निरीक्षक दिनेश लबडे आणि सहाय्यक पोलीस निरीक्षक शीतल खोब्रागडे यांनीही तिथे जाऊन परिस्थितीची पाहणी केली. मृतदेह शवविच्छेदनासाठी चिमूर उपजिल्हा रुग्णालयात पाठवण्यात आला. वनविभागाने मृत शेतकऱ्याच्या कुटुंबाला ५० हजार रुपयांची रोख मदत तातडीने दिली आहे.

दुसरी घटना सिंदेवाही वनपरिक्षेत्रातील नवरगाव उपवनक्षेत्रात, धुमणखेडा येथे घडली. पत्रु रामाजी मेश्राम (वय ७५, रा. धुमणखेडा) हे दुपारी दोनच्या सुमारास गावाजवळच्या आपल्या शेतात धानाच्या पिकाची पाहणी करण्यासाठी गेले होते. संध्याकाळपर्यंत ते घरी आले नाहीत, म्हणून कुटुंबीयांनी शोध घेतला. शेतात त्यांचा चष्मा, काठी, चप्पल आणि रक्ताचे डाग दिसले.

ग्रामस्थांच्या मदतीने वनविभागाने शोधमोहीम राबवली. तेव्हा प्राथमिक आरोग्य केंद्राजवळ पत्रु मेश्राम यांचा क्षतविक्षत अवस्थेतील मृतदेह मिळाला. वाघाने त्यांना शेतातून फरफटत नेऊन ठार केले. ही घटना शुक्रवारी सायंकाळच्या सुमारास उघडकीस आली.

सिंदेवाही तालुक्यात एका आठवड्यात वाघाच्या हल्ल्यात गेलेला हा तिसरा बळी आहे. यापूर्वी २४ ऑक्टोबर रोजी पळसगाव (जाट) येथील नानाजी कामडी यांना, तर २५ ऑक्टोबर रोजी भेंडाळा शेतशिवारात अंगणवाडी सेविका प्रेमीला महाडोरे यांना वाघाने ठार केले होते. अशा सलग घटनांमुळे संपूर्ण तालुक्यात दहशत आहे.

सध्या शेतात धान कापणी आणि मशागतीची कामे शेवटच्या टप्प्यात आहेत. अशा वेळी हल्ले वाढल्याने शेतकरी आणि मजुरांना जीव मुठीत धरून काम करावे लागत आहे. संतापलेल्या ग्रामस्थांनी नरभक्षक वाघांचा बंदोबस्त करावा, त्यांना पकडण्यासाठी तातडीने पिंजरे लावावेत आणि वनविभागाने गस्त वाढवून प्रभावी उपाययोजना कराव्यात, अशी जोरदार मागणी केली आहे. दरम्यान, नागरिकांनी जंगलालगतच्या शेतात एकटे जाऊ नये, असे आवाहन वनविभागाने केले आहे.