परदेशी कमाईवर १ ऑक्टोबर २०२६ पासून EDF फॉर्म बंधनकारक, हा टॅक्स नाही

तुम्ही फ्रीलान्सिंग करता, यूट्यूबवरून कमाई करता किंवा परदेशातील क्लायंटसाठी काम करून डॉलरमध्ये पैसे मिळवता का? मग एक नवीन नियम तुमच्यासाठी आहे. १ ऑक्टोबर २०२६ पासून परदेशातून पैसे घेणाऱ्यांना Export Declaration Form म्हणजेच EDF भरावा लागणार आहे.

सोशल मीडियावर अनेक जण याला नवीन टॅक्स म्हणत आहेत, पण ते साफ चुकीचे आहे. हा कोणताही टॅक्स नाही. परदेशातून येणाऱ्या पैशावर लक्ष ठेवण्यासाठी आणलेली ही एक नवीन सिस्टीम आहे.

आधी हा फॉर्म फक्त वस्तू परदेशात पाठवणाऱ्यांना किंवा मोठ्या IT कंपन्यांना RBI कडे भरावा लागत होता. त्याला SOFTEX म्हणत. आता RBI ने सगळ्या डिजिटल सेवा देणाऱ्यांना यात आणले आहे. म्हणजे तुम्ही एकटे घरी बसून फ्रीलान्सिंग करत असलात, तरी आता तुम्ही सरकारच्या दृष्टीने 'सेवा निर्यातदार' आहात आणि हे नियम तुम्हालाही पाळावे लागतील.

पहिला नियम ३० दिवसांचा आहे. ज्या महिन्यात तुम्ही परदेशी क्लायंटला बिल दिले, तो महिना संपल्यापासून ३० दिवसांच्या आत बँकेत EDF द्यायचा आहे. प्रत्येक बिलासाठी वेगळा फॉर्म भरण्याची गरज नाही. RBI ने सांगितले आहे की पूर्ण महिन्याच्या सगळ्या बिलांचा मिळून एकच फॉर्म चालेल. त्यामुळे छोट्या फ्रीलान्सर्सना फार त्रास होणार नाही.

दुसरा नियम ९ महिन्यांचा आहे. काम केल्यानंतर किंवा बिल दिल्यानंतर ९ महिन्यांच्या आत ते पैसे तुमच्या भारतीय बँक खात्यात जमा झाले पाहिजेत. यापेक्षा जास्त वेळ लावता येणार नाही.

तिसरा नियम कागदपत्रांचा आहे. क्लायंटसोबत झालेले बोलणे, त्याचा मेल, तुम्ही दिलेले इनव्हॉईस आणि बँकेकडून मिळणारे FIRC सर्टिफिकेट हे सगळे नीट जपून ठेवावे लागणार आहे.

छोट्या यूट्यूबर्स आणि फ्रीलान्सर्सना सगळ्यात मोठा दिलासा देण्यात आला आहे. तुमच्या एका बिलाचे मूल्य १० लाख रुपयांपेक्षा कमी असेल, म्हणजे साधारण १२ हजार डॉलर्सपेक्षा कमी असेल, तर जास्त कागदपत्रांच्या मागे धावावे लागणार नाही. तुम्ही थेट बँकेच्या वेबसाईटवर जाऊन Self-Declaration करू शकता. हे काम फक्त ५ ते १० मिनिटांत होते, त्यामुळे घाबरण्याचे कारण नाही.

फॉर्म भरला नाही तर काय होईल? हा टॅक्स नसला तरी तो RBI च्या EDPMS नावाच्या सिस्टीमला जोडलेला आहे. ही एक मोठी डिजिटल सिस्टीम आहे, जिथे सगळ्या निर्यातीचा डेटा जमा होतो. वेळेत फॉर्म न भरल्यास परदेशातून येणारे पेमेंट अडकू शकते आणि बँक तुमचे पैसे होल्डवर ठेवू शकते. योग्य पर्पज कोड आणि इनव्हॉईस दिल्याशिवाय ते पैसे खात्यात येणार नाहीत. एवढेच नाही, तर पुढे GST रिफंड घेताना किंवा ITR भरतानाही अडचण येऊ शकते.

त्यामुळे Google AdSense, Upwork, Fiverr किंवा थेट बँक ट्रान्सफरने पैसे घेत असाल, तर आताच बँकेच्या फॉरेन डिपार्टमेंटला भेटा किंवा तुमच्या CA शी बोला. फॉर्म वेळेत भरला, तर तुमचे कष्टाचे पैसे कोणत्याही त्रासाशिवाय खात्यात येतील.