फ्लायदुबई विमानात कॉकपिटमध्ये हल्ला; इराणचा नेतान्याहूंवर कटाचा आरोप, ट्रम्प यांचा इशारा

दुबईहून इस्रायलमधील तेल अवीवकडे निघालेल्या 'फ्लायदुबई FZ1073' (Flydubai FZ1073) या विमानात कथित दहशतवादी कट रचला गेल्याने जगभर खळबळ उडाली आहे. या विमानात १७४ प्रवासी आणि कर्मचारी होते आणि त्यात प्रामुख्याने इस्रायली नागरिक होते. या घटनेनंतर अमेरिका, इस्रायल आणि इराण हे तीन देश थेट आमनेसामने आले असून मध्य-पूर्वेत युद्धाची ठिणगी पडण्याची शक्यता निर्माण झाली आहे.

बुधवारी विमानाने उड्डाण घेतल्यावर थोड्याच वेळात कॉकपिटमध्ये हा प्रसंग घडला. विमानातील ओमान वंशाच्या सह-वैमानिकाने भारतीय वंशाचे मुख्य वैमानिक कॅप्टन स्मित मच्छर यांच्यावर अचानक चाकूने हल्ला केला. हे विमान कोसळवून मोठा अपघात घडवण्याचा त्याचा हेतू होता.

गंभीर जखमी होऊन रक्तबंबाळ झालेले असतानाही कॅप्टन मच्छर यांनी हार मानली नाही. त्यांनी कॉकपिटचा दरवाजा उघडण्यात यश मिळवले. दरवाजा उघडताच सतर्क प्रवाशांनी कॉकपिटमध्ये धाव घेऊन हल्लेखोर सह-वैमानिकाला पकडले आणि त्याला सीटला बांधून ठेवले. त्यानंतर एका प्रवाशाच्या मदतीने जखमी अवस्थेतच स्मित मच्छर यांनी विमान सौदी अरेबियाच्या विमानतळावर सुरक्षितपणे उतरवले आणि १७४ जणांचे प्राण वाचवले. त्यांचे धैर्य आणि समयसूचकता सध्या जगभर चर्चेत आहे.

या घटनेचे पडसाद आंतरराष्ट्रीय राजकारणात तीव्रतेने उमटत आहेत. अमेरिकेचे राष्ट्राध्यक्ष डोनाल्ड ट्रम्प यांनी इराणला थेट इशारा दिला आहे. प्रसारमाध्यमांशी बोलताना ट्रम्प म्हणाले, "आम्ही या संपूर्ण घटनेची कसून चौकशी करत आहोत. प्राथमिक माहितीनुसार यात इराणचा हात असण्याची दाट शक्यता नाकारता येत नाही. जर तपासात इराणचा या कटात सहभाग असल्याचे सिद्ध झाले, तर अमेरिका गप्प बसणार नाही. आम्ही तेहरानवर भीषण हल्ला करू आणि संपूर्ण इराण नष्ट करू." ट्रम्प यांच्या या आक्रमक पवित्र्यामुळे जगभर चिंतेचे वातावरण आहे.

दुसरीकडे, इराणने या घटनेत आपला कोणताही सहभाग नसल्याचे सांगून अमेरिका आणि इस्रायलचे सर्व आरोप ठामपणे फेटाळले आहेत. इराणच्या सरकारी वृत्तवाहिनी 'प्रेस टीव्ही'वर (Press TV) प्रसिद्ध झालेल्या अहवालात इराणी अधिकाऱ्यांनी एक खळबळजनक दावा केला आहे. इराणच्या दाव्यानुसार, फ्लायदुबई विमानातील अपहरणाचा हा कट खुद्द इस्रायलचे पंतप्रधान बेंजामिन नेतान्याहू यांनीच रचला होता.

इराणच्या म्हणण्यानुसार, इस्रायलमध्ये आगामी काळात होणाऱ्या निवडणुकांत नेतान्याहू यांना पराभवाची भीती वाटत आहे आणि सध्याच्या राजकीय परिस्थितीत त्यांच्या आघाडीला बहुमत मिळणे कठीण आहे. त्यामुळे स्वतःची खुर्ची वाचवण्यासाठी आणि अमेरिकेला इराणसोबतच्या नव्या युद्धात ओढण्यासाठी नेतान्याहूंनी हा पूर्वनियोजित कट आखल्याचा आरोप इराणने केला आहे.

इराणने पुढे असेही म्हटले आहे की, ही घटना घडण्याच्या अवघ्या तीन दिवस आधी पंतप्रधान नेतान्याहू यांनी संयुक्त अरब अमिरातीचा (UAE) दौरा केला होता. त्या दौऱ्यात इस्रायलचे अनेक वरिष्ठ लष्करी आणि गुप्तचर अधिकारी त्यांच्यासोबत होते. याच दौऱ्यात या कथित विमान अपहरणाच्या योजनेवर चर्चा होऊन ती अंतिम करण्यात आली, असा इराणचा आरोप आहे. मात्र, इराणने आपल्या या दाव्याच्या समर्थनात कोणताही ठोस पुरावा सादर केलेला नाही. सध्या अमेरिका आणि इस्रायलच्या गुप्तचर यंत्रणा या प्रकरणाची कसून चौकशी करत आहेत.