पाणीटंचाईने त्रस्त तुळशी गाव विक्रीला; ५०० हून अधिक तरुणांची लग्ने रखडल्याचा दावा

सोलापूर जिल्ह्यातील माढा तालुक्यात दुष्काळाची झळ वाढत असून पाणीटंचाईचा प्रश्न गंभीर बनला आहे. या तालुक्यातील तुळशी गाव गेल्या कित्येक वर्षांपासून पाण्यासाठी संघर्ष करत आहे. ग्रामस्थांनी वारंवार मागणी केली आणि आंदोलनेही केली, तरीही हा प्रश्न सुटलेला नाही. त्यामुळे गावकऱ्यांमध्ये मोठा संताप आहे.

प्रशासनाचे लक्ष वेधून घेण्यासाठी ग्रामस्थांनी थेट गावच 'विक्रीला' काढले आहे. संपूर्ण गावात 'गाव विकणे आहे' असे फलक लावण्यात आले आहेत. पाण्यासाठी गावाला इतके टोक गाठावे लागले, हेच यातून दिसते.

तुळशी गावात पिण्याच्या पाण्याची तीव्र टंचाई निर्माण झाली आहे. पाण्यासाठी नागरिकांना मोठी कसरत करावी लागते आणि महिलांना पाण्यासाठी वणवण फिरावे लागत आहे. दुष्काळाचा मोठा फटका शेतीला बसला असून अनेक शेतजमिनी पाण्याअभावी पडून आहेत. जनावरांसाठी चारा आणि पाणी मिळवण्याचा प्रश्नही गंभीर झाला आहे.

याचा परिणाम गावातील रोजगाराच्या संधींवरही झाला आहे. गावातील तरुणांमध्ये बेरोजगारी वाढत असल्याचे ग्रामस्थांचे म्हणणे आहे.

पाणीटंचाईचा सामाजिक परिणामही आता समोर येत आहे. शेतकरी नारायण कुलकर्णी यांनी सांगितले की, त्यांच्याकडे १५ एकर शेती आहे, पण पाण्याअभावी ती पडून आहे. गावात पाणी नसल्याने हाताला काम मिळत नाही आणि तरुण बेरोजगार होत आहेत. पाणीटंचाईमुळे गावातील ५०० हून अधिक मुलांची लग्ने जुळत नाहीत, असा दावा त्यांनी केला.

पाणीप्रश्नावर नाराजी व्यक्त करताना ग्रामस्थ बापू दगडे म्हणाले, "आमच्या गावावर देव इतका का कोपलाय, समजत नाही. आता तर दुसऱ्या गावी जाऊन आपल्या गावाचे नाव सांगायलाही लाज वाटत आहे."

पाण्यासारख्या मूलभूत सुविधेसाठी गावकऱ्यांवर गावच 'विक्रीला' काढण्याची वेळ आली, यावरून परिस्थिती किती गंभीर आहे हे स्पष्ट होते. आता शासन आणि प्रशासन तुळशी गावाच्या पाणीप्रश्नाकडे गांभीर्याने लक्ष देऊन कायमस्वरूपी तोडगा काढणार का, याकडे ग्रामस्थांचे लक्ष लागले आहे.